1, 2. Кызьы Тонилэн учырез возьматэ, адями воштӥськыны быгатэ шуыса?

 ТОНИ бадӟым классъёсын дышетске вал ини, но школазэ куштыны малпаз. Со атайтэк будӥз, но дышетскон сое туж ик ӧз тунсыкъяськыты. Вань шутэтскон нуналъёссэ со киноын яке эшъёсыныз ортчытъяз. Тони йыртэмаса но наркотикъёсын вырыса ӧз улы. Солэн улоназ нокыӵе ужпумез ӧй вал, но со уг тоды вал, вань-а Инмар, ӧвӧл-а. Одӥг пол Тони кузпалъёсын тодматскиз. Соос Иеговалэн Адӟись-Ивортӥсьёсыз вал. Тони вераз соослы, со Инмарлы туж ик уг оскы шуыса, но соослы куд-ог юанъёс сётъяз. Адӟись-Ивортӥсьёс солы кык брошюра сётӥзы — «Улонлэн кылдэмез. Вить юанъёс, кудъёсызлы валэктонъёс шедьтоно» но «Улон кылдытэмын-а вал?».

² Куке кузпалъёс выльысь пумиськизы Тониен, солэн чылкак мукет мылкыдыз вал ини. Солы кельтэм брошюраосты со сомында лыдӟем, соос посӥськиллям но кырсесь луиллям. «Инмар вань ик, дыр»,— шуиз  соослы Тони. Со Библиез дышетыны соглаш кариськиз но пумен улон шоры мукет сямен учкыны кутскиз. Со сяна, нырысь со урод дышетске вал, нош табере умой дышетскисьёс пӧлы потӥз. Школалэн директорез но туж паймемын вал. Со юаз: «Тон Иеговалэн Адӟись-Ивортӥсьёсыныз эшъяськид, соин астэ умойгес возьыны но умойгес дышетскыны кутскид-а?» «Соин»,— шуиз Тони, но соос Библия сярысь туж умой вераськизы. Со школазэ умой йылпумъяз но али кенешын пионер но кенешлы юрттӥсь луыса ужа-тырше. Со туж шумпотэ, табере солэн туж умой Атаез, Иегова, вань шуыса (Пс. 67:6).

3. Кыӵе визь-кенеш сётэ Иегова егитъёслы?

³ Тониен луэм учыр возьматэ, Иеговалэн егитъёслы юрттэмез потэ шуыса. Солэн потэ, тынад улонэд азинлыко но шумпотон вайись мед луоз шуыса, соин ик со тыныд таӵе визь-кенеш сётэ: «Пинал дыръяд тодад вай аслэсьтыд Кылдытӥсьтэ» (Екк. 12:1). Туала вакытэ со секыт ке но, луымон. Инмарлэн юрттэменыз, тынад егит дыръёсыд гинэ ӧвӧл, нош вань улонэд шудо луоз. Сое умойгес валан понна, ойдо вераськомы со сярысь, кызьы Израиль калык Сӥзем музъемез киултӥз но кызьы Давид Голиафез вормиз.

4, 5. Малы дышетэ милемыз со, кызьы израиль пиос Ханаан музъемез киултӥзы но кызьы Давид Голиафез вормиз? (Учке статья кутсконысь суредъёсты.)

⁴ Мар карыны косӥз Инмар израиль пиосты, куке соос Сӥзем музъем доры вуизы? Ожмаськыны дышетскыны-а? Ожмаськон быгатонлыкъёссэс волятыны-а? Ӧз (К. Зак. 28:1, 2). Иегова косӥз соосты солэн курон-косонъёсызлэсь кылзӥськыны но солы оскыны (Иис. Н. 1:7—9). Адями синмын учкыса, сыӵе косон паймымон кадь потыны быгатысал. Но ӵапак со израиль пиослы юрттӥз выльысь но выльысь хананейёсты вормыны (Иис. Н. 24:11—13). Инмарлэсь кылзӥськон понна, оскон кулэ — сотэк азинлыко нокызьы но уд луы. Азьвыл но со озьы вал, туннэ но со озьы ик.

⁵ Голиаф кышкыт куинь метр ӝужда ожгарчи вал, но солэн туж умой ожмаськон тӥрлыкез вал (1 Экс. 17:4—7). Нош Давидлэн из зӥръянэз но аслаз Инмарезлы, Иеговалы, осконэз гинэ вал. Соослэн син азязы, кинлэн осконэз ляб вал, Давид визьзэ ыштэм мурт кадь адӟиськиз. Но макем соос янгыш вал! Давид визьзэ ыштэм мурт ӧй вал, Голиаф визьзэ ыштэм мурт вал (1 Экс. 17:48—51).

6. Мае ми эскеромы таяз статьяын?

⁶ Талэсь азьло статьяын ми эскеримы, мар юрттоз милемлы шудо луыны. Со — Инмар доры матэ кариськыны юрттӥсь тодон-валан, эшъёс, кудъёссэ ми Инмарлы луыса шедьтӥмы, Инмарлы ужан-тыршонын пуктэм ужпумъёс но эрик, кудӥз Иеговалэн калыкезлэн вань. Ойдо пыр-почгес со сярысь вераськомы но саклыкмес висъяломы 15-тӥ Псаломын гожтэм возетъёслы.

7. а) Кызьы тӥ верасалды, кыӵе со духовной адями? б) Мае возьмато Давидлэн «Кузё-Инмар — со мынам басьтоно люкетэ» кылъёсыз но кыӵе солэн шӧдонъёсыз кылдо вал соин сэрен?

⁷ Духовной адями Инмарлы оске но котьку солэсь малпанзэ лыдэ басьтэ. Со Инмарлэсь визь-кенешсэ утча но котьку солэсь кылзӥськыны тырше (1 Кор. 2:12, 13). Та удысын туж умой пример возьматӥз Давид. Со гожтӥз: «Кузё-Инмар — со мынам басьтоно люкетэ, чашае» (Пс. 15:5). Мае верамез потэ вал Давидлэн «Кузё-Инмар — со мынам басьтоно люкетэ» кылъёсын? Та кылъёсын Давидлэн верамез потэ вал, солэн Иеговаен матысь кусыпъёсыз шуыса но со солы оскиськыса улэ шуыса (Пс. 15:1). Соин ик Давид гожтӥз: «Мынам сюлэмы шумпотӥз». Иеговаен матысь кусыпъёс сяна, номыр сое сокем шум ӧз потты ни. (Лыдӟе Псалтирез 15:9, 11.)

8. Мар кулэ, адями зэмзэ ик шудо мед луоз шуыса?

⁸ Соос, кинъёс шулдыръяськон но коньдон сярысь гинэ малпасько, ноку но уз басьтэ сыӵе шумпотон, кыӵе шумпотон басьтӥз Давид (1 Тим. 6:9, 10). Тани мар вера Канадаысь одӥг вын-агай: «Со, мае ми улонлэсь басьтыны быгатӥськомы, зэмос шуд уг вайы, нош зэмос шуд вае со, мае ми сётыны быгатӥськомы Кылдытӥсьмылы, кудӥз милемлы сомында кузьымъёс кузьма» (Иак. 1:17). Зэм, Иеговалы оскон но солы ужан-тыршон тынэсьтыд улондэ шудо но азинлыко карозы. Мар юрттоз тыныд оскондэ юнматыны? Со понна тыныд кулэ Инмарлэсь Кылзэ лыдӟыны, солэсь кылдытэмъёссэ чакланы-эскерыны но солэн сямъёсыз вылын малпаськыны, кылсярысь, солэн тонэ яратэмез вылын (Рим. 1:20; 5:8).

9. Кызьы Инмарлэн Кылыз милемыз дышетыны быгатэ?

⁹ Куддыръя Иегова аслэсьтыз яратэмзэ возьматэ, милемыз тупатыса, озьы ик, кызьы атай аслэсьтыз нылпиоссэ лякытэн тупатэ. Давид Иеговалэн визьнодамезлы шумпотэ вал. Со гожтӥз: «Визь сётӥсь Кузё-Инмарез данъяло; уйёсы но сюлмы монэ дышетэ» (Пс. 15:7). Давид малпаськиз со вылын, кызьы Инмар малпаське, тыршиз дышетскыны со кадь малпаськыны но лэзиз Инмарлэн Кылызлы сое дышетыны. Тон но озьы лэсьтӥд ке, тынад Иеговаез яратонэд будоз но котьку солэсь кылзӥськемед потоз. Озьы тынад Инмарен кусыпъёсыд юнмалозы. Кристин нимо сузэр вера: «Кыӵе ке юанэз эскерыкум но лыдӟеме вылын малпаськыкум, мыным потэ, Иегова тае юри мыным гожтӥз шуыса!»

10. Исаиялэн 26:3 верамъя, маин юрттэ милемлы духовной адями луон?

¹⁰ Духовной адями та дунне шоры но со шоры, мар луоз дуннеен азьланяз, Инмарлэн синмыныз учке. Иегова тыныд аспӧртэмлыко тодон-валан но визьнод сётэ. Малы? Солэн потэ, тон мед валалод шуыса, мар улонын валтӥсез луэ, шонер ужпумъёс мед кутод но азьланяз осконэн мед учкод шуыса. (Лыдӟе Исаиялэсь 26:3.) Джошуа, кудӥз Огазеяськем Штатъёсын улэ, вера: «Иеговаен матысь кусыпъёс ваньмыз шоры шонер учкыны юртто». Макем со шонер вера!

11. Кыӵе адямиосты Давид аслыз эшлы бырйылӥз?

¹¹ Лыдӟе Псалтирез 15:3. Давид тодэ вал, кин солы умой эш луоз. Иеговаез яратӥсь адямиосын дырзэ ортчытъян солы бадӟым шумпотон вае вал. Со соосты «святойёс» шуыса нимаз, малы ке шуоно соос Инмарлэн вылӥ эсэпъёсызъя улӥзы. Со сярысь, кызьы умой эшъёс шедьтоно, гожъяз мукетыз псаломъёсты гожъясь: «Тынэсьтыд кышканэн улӥсьёсын, косонъёстэ утисьёсын мон огкылын улӥсько» (Пс. 118:63). Кызьы верамын вал талэсь азьвыл статьяын, тон но трос умой эшъёс шедьтыны быгатӥськод соос пӧлысь, кинъёс Иеговалэсь кышканэн уло но котьку солэсь кылзӥсько. Соос пӧлын пӧртэм аресъем адямиос луыны быгато.

12. Малы Давид но Ионафан умой эшъёс вал?

¹² Давид огъёзъёсыныз гинэ ӧз эшъяськы. Тодӥськод-а, кин Давидлэн одӥгез матысь эшез вал? Со Ионафан. Соос туж умой пример возьматӥзы, кызьы эшъяськоно. Нош тон тодӥськод вал-а, Ионафан Давидлэсь ог 30 ареслы бадӟымгес вал шуыса? Мар меда соосты огазея вал? Инмарлы оскон, ог-огзэс мур гажан но кышкасьтэм сям, кудзэ котькудӥз возьматӥз тушмонъёсын нюръяськыкуз (1 Экс. 13:3; 14:13; 17:48—50; 18:1).

13. Кызьы тросгес эшъёс шедьтоно? Вералэ пример.

¹³ Давид но Ионафан сямен, ми но бадӟым шумпотон басьтӥськомы, эшъяськыса соосын, кинъёс Иеговаез ярато. Кира сузэр, кудӥз кема аръёс ӵоже Инмарлы ужа-тырше ини, вера: «Мынам быдэс дунне вылын эшъёсы вань. Со пӧртэм калыкъёсысь вын-агайёс но сузэр-апайёс». Трос эшъёс шедьтыса, тон адӟод, макем кужмо Инмарлэн Кылыз но солэн духез — соос адямиосты огазеяло.

14. а) Мар юрттоз Инмарлы ужан-тыршонын ужпумъёс пуктыны? б) Мар верало куд-ог егит адямиос ужан-тыршонын пуктэм ужпумъёс сярысь?

¹⁴ Лыдӟе Псалтирез 15:8. Давидлэн улонэз Инмарлы ужан-тыршон котырын берга вал. Тынад улонад но Иеговалы ужан-тыршон валтӥсез луиз ке но со удысын тон ужпумъёс пуктӥд ке, тынад улонэд зэмзэ ик шудо луоз. Тани мар вера Стивен нимо вын-агай: «Куке тон пуктэм ужпумдэ быдэстыны тыршиськод, быдэстӥськод сое но емышъёссэ адӟиськод, со туж бадӟым шумпотон вае». Нош тани Германиысь егит вын-агайлэн кылъёсыз, кудӥз али мукет шаерын ужа-тырше: «Мынам ӧй потысал пересьмем дыръям, ортчем улонэ шоры учкыса, валаме, мон ачим понна гинэ улӥ шуыса». Соглаш-а тон та вын-агаен? Соглаш ке, соку вань кужымдэ но быгатонлыкъёстэ сёт, Инмарез данъян но адямиослы юрттон понна (Гал. 6:10). Инмарлы ужан-тыршонын ужпумъёс пукты но, соосты быдэстон понна, Иеговалы вӧсяськы. Сыӵе вӧсяськонъёсты со шумпотыса кылзэ (1 Иоанн 3:22; 5:14, 15).

15. Кыӵе ужпумъёс тон аслыд пуктыны быгатӥськод? (Учке « Кыӵе ужпумъёс пуктоно?» рамкаез.)

¹⁵ Кыӵе ужпумъёс тон пуктыны быгатӥськод? Кылсярысь, кенешлэн пумиськонъёсаз эскеронэ пыриськыку, аслад кылъёсыныд валэктонъёс сётъяны, пионер луыса яке Вефильын ужаны-тыршыны яке выль кыл дышетыны, со кылын вераськись адямиослы ӟеч иворез веран понна. Барак, егит вын-агай, кудӥз вань дырзэ сётыса ужа-тырше, вера: «Котькуд ӵукна сайканы но валаны, тон вань кужымдэ Иеговалы ужан-тыршон понна сётӥськод шуыса,— солэсь но умоез мар ке вань на шат?»

16. Кызьы Давид учке вал Инмарлэн шонерлыко возетъёсыз шоры? Малы?

¹⁶ Лыдӟе Псалтирез 15:2, 4. Кызьы валэктэмын вал талэсь азьвыл статьяын, Инмарлэн шонерлыко законъёсыз но возетъёсыз милемыз эрико каро но юртто уродэз-лекез адӟемпотостэм карыны, нош ӟечлыкез яратыны (Ам. 5:15). Псаломъёсты гожъясь Давид вала вал, вань ӟечез Иегова бордысь потэ шуыса. Иегова котьку но котьмае шонер лэсьтэ, но ваньзэ умойзэ, мармы милям вань, Иегова сётӥз. Давид вань кужмысьтыз тыршиз Иеговалэсь адӟем карыны но яратыны сое, мае со яратэ. Со дыре ик со адӟемпотостэм карыны дышетскиз сое, мае Инмар адӟемпотостэм каре, кылсярысь, сульдэр-идолъёслы йыбыртъянэз, малы ке шуоно со адямиез Иеговалэн син азяз ултӥя но Иеговалэсь данзэ тала, кудзэ басьтыны Иегова гинэ ярась луэ (Ис. 2:8, 9; Усьт. 4:11).

17, 18. а) Мар вераз Давид со сярысь, кыӵе бервылъёсы вуттэ сульдэръёслы-идолъёслы йыбыртъян? б) Маин сэрен туннэ адямиослэн куректон-кайгузы йылэ?

¹⁷ Вашкала дыръёсы сульдэръёслы-идолъёслы йыбыртъян ӵем дыръя азон-калгонэн герӟаськемын вал (Ос. 4:13, 14). Трос адямиослы сульдэръёслы-идолъёслы йыбыртъян яра вал,  малы ке шуоно со тырбыдэстэм мугорлэсь куронъёссэ быдэсъяны лэзе вал. Но со соослы зэмос шумпотон вае вал-а? Уг. Давид гожтӥз, мурт инмаръёс доры мынӥсьёслэн куректон-кайгузы йылэ шуыса. Кӧня нылпиосты соос быдтӥзы, зэмос луисьтэм инмаръёслы курбонэ вайыса! (Ис. 57:5). Сыӵе лек ужъёс Иеговалы юрӟым пото вал (Иер. 7:31). Тон со вакытэ улысалыд ке, веранэз ӧвӧл, шумпотысалыд, тынад анаед но атаед Иеговалы оско но солэсь кылзӥсько шуыса.

¹⁸ Туннэ но зэмос луисьтэм религия ӵем дыръя азон-калгонэз умойтэмен уг лыдъя. Со сяна, со пиосмуртлы пиосмуртэн, нош кышномуртлы кышномуртэн кузпалъяськыны лэзе. Но вашкала дыръёсысен номыр ӧз воштӥськы: соослэн, кинъёс азыса-калгыса улонэ кыстӥсько, куректон-кайгузы йылэ (1 Кор. 6:18, 19). Тон ачид но сое адӟиськод, дыр. Соин ик кылзӥськы инмысь Атаедлэсь. Оскы, кылзӥськемед тыныд котьку пайда ваёз шуыса. Умой малпаськы со вылын, кытчы вуттэ азон-калгон. Соку тон адӟод, азон-калгон огдырлы шумпотон вае ке но, со солэсь но бадӟым изъян вае шуыса (Гал. 6:8). Джошуа, кудӥз сярысь азьлогес верамын вал ини, вера: «Эрикез кутыны луэ озьы, кызьы мылыд потэ, но сое шонертэм кутӥд ке, со тыныд шуд уз вайы».

19, 20. Кызьы бакель каремын луозы егит пиос но нылъёс, кудъёсыз Иеговалы оско но солэсь кылзӥсько?

¹⁹ Иисус аслаз дышетскисьёсызлы вераз: «Мынам кылыя улӥды ке, тӥ зэмзэ но Мынам дышетскисьёсы луоды, зэмлыкез тододы, нош зэмлык тӥледыз эрико кароз» (Иоанн 8:31, 32). Иеговалы луыса ми зэмос луисьтэм религилэн сьӧлтэтъёсызлэсь, тодытэк-валатэк улонлэсь но пӧртэм тодметъёсты чакланлэсь мозмытэмын. Нош азьланяз со милемлы «Инмар нылпиослэн кадь ик данлыко эрикез» кузьмалоз (Рим. 8:21). Сыӵе эрикез али ик ини веръяны луэ, Христослэн «кылызъя», яке солэн дышетонъёсызъя, улыса. Озьы тон «зэмлыкез тодод», со сярысь тодон-валан басьтыса гинэ ӧвӧл, нош соя улыса но.

²⁰ Дунъя эрикез, кудзэ тыныд Инмар кузьмаз, сое визьмо уже кут — озьы тон шудо луыны быгатод. Одӥг егит вын-агай вераз: «Тон егит дыръяд эриктэ визьмо уже кутӥськод ке, бератаз эшшо но кулэ луисьгес юанъёсын ужпум кутыны быгатод, кылсярысь, кытын ужано, семья кылдытоно-а яке кӧня ке возьмано-а».

21. Мар юрттоз милемлы «быронтэм улонэ» нуись сюрес вылысь кожытэк улыны?

²¹ Та дуннеын адями лыдъя ке но, солэн улоназ ваньмыз умой но радызъя мынэ шуыса, одӥг адями но уг тоды, мар сое ӵуказе возьма, малы ке шуоно улон туж ӝог ортче (Иак. 4:13, 14). Соин ик визьмо лэсьтэ со, кин «быронтэм улонэ» нуись сюрес вылысь уг кожы (1 Тим. 6:19). Но Иегова милемыз та сюрес вылтӥ кужмысь мыныны уг косы. Ми асьмеос бырйиськомы. Лыдъя Иеговаез «басьтоно люкетэныд». Дунъя вань ӟеч кузьымъёстэ, кудзэ со тыныд сётӥз (Пс. 102:5). Оскы, Иеговалы луыса тынад улонэд пырак дауръёс ӵоже шудо луоз шуыса! (Пс. 15:11).