1, 2. Sugad han iginpapakita han eksperyensya han usa nga hayskul nga estudyante, ano nga pagbag-o an posible mahitabo?

AN USA nga hayskul nga estudyante nga hi Tony nagpaplano nga diri na magpadayon pag-eskwela. Waray na hiya tatay, ngan diri hiya interesado pag-eskwela. Ngan kon Sabado ngan Domingo, nagkikinita la hiya hin mga salida o nakikig-upod-upod ha iya mga kasangkayan. Diri hiya madarahog, ngan diri hiya adik ha droga. Waray la katuyoan an iya kinabuhi. Ngan nagruruhaduha hiya kon may-ada gud ba Dios. Ha urhi, may nakilala hiya nga Saksi nga mag-asawa ngan iginsumat niya ha ira an iya mga pagruhaduha ngan mga pakiana. Gintagan hiya han mag-asawa hin duha nga brosyur​—an The Origin of Life—​Five Questions Worth Asking ngan an Ginlarang ba an Kinabuhi?

² Han binisita utro an mag-asawa, nagbag-o na an panhunahuna ni Tony. Gin-inadman gud niya an mga brosyur salit nagkapilopilo ngan medyo nakunot na ito. “May-ada gud Dios,” siring niya. Kinarawat hiya hin pag-aram ha Biblia, ngan hinay-hinay nga nagbag-o an iya pagtagad ha kinabuhi. Hadto, diri hiya maopay nga estudyante, pero ha urhi, nagin usa hiya han pinakamagkarit ha ira eskwelahan. Bisan an prinsipal, nga maaram han bag-o nga gintotoohan ni Tony, nahipausa gud. Hiya nagsiring: “Daku  gud an imo igin-uswag ha imo batasan ngan grado. Tungod ba ito han imo pakig-upod ha mga Saksi ni Jehova?” Binaton hi Tony nga oo ngan ginsangyawan niya an prinsipal. Natapos niya an hayskul ngan yana regular payunir hiya ngan ministeryal nga surugoon. Malipayon liwat hiya nga may-ada na hiya mahigugmaon nga Amay, hi Jehova.​—Sal. 68:5.

3. Ano nga klase hin kinabuhi an karuyag ni Jehova para ha mga batan-on?

³ An eksperyensya ni Tony nagpapahinumdom ha aton nga interesado gud hi Jehova ha iyo nga mga batan-on. Karuyag niya nga magkaada kamo malampuson ngan malipayon gud nga kinabuhi. Salit nagsasagdon hiya ha iyo: “Hinumdumi . . . an [iyo] Magburuhat ha mga adlaw han [iyo] pagkabatan-on.” (Ekles. 12:1) Diri pirme masayon an pagbuhat hito yana. Pero diri ito imposible. Pinaagi han bulig han Dios, maglalampos kamo, diri la ha iyo pagkabatan-on kondi ha bug-os niyo nga kinabuhi. Kitaon naton an leksyon nga aton mahibabaroan ha asoy mahitungod ha pagsakop han mga Israelita ha Tuna nga Iginsaad ngan ha pakig-away ni David kan Goliat.

4, 5. Ano nga mapulsanon nga leksyon an aton mahibabaroan ha asoy mahitungod ha pagsakop han mga Israelita ha Canaan ngan ha pakig-away ni David kan Goliat? (Kitaa an retrato ha tinikangan hini nga artikulo.)

⁴ Han hirani na an mga Israelita ha Tuna nga Iginsaad, waray hira sugoa han Dios nga bansayon an ira abilidad ha pakig-away o magbansay para ha girra. (Deut. 28:1, 2) Lugod, ginsidngan niya hira nga kinahanglan nira sugton an iya mga sugo ngan sumarig ha iya. (Jos. 1:7-9) Ha panhunahuna han tawo, bangin diri ito maopay nga sagdon! Pero ito gud an pinakamaopay nga sagdon, kay gintagan ni Jehova an iya katawohan hin sunod-sunod nga kadaogan kontra ha mga taga-Canaan. (Jos. 24:11-13) Oo, an pagin masinugtanon ha Dios nagkikinahanglan hin pagtoo, pero ito nga pagtoo pirme nagriresulta ha kalamposan. Ini nga kamatuoran diri nababag-o ha paglabay han panahon. Aplikado la gihapon ini yana.

⁵ An maisugon nga girriro nga hi Goliat mga siyam ngan tunga ka piye an kahitaas ngan kompleto hin armas. (1 Sam. 17:4-7) Pero hi David may duduha la nga butang: an iya labyog ngan an iya pagtoo ha iya Dios nga hi Jehova. An mga tawo nga waray pagtoo bangin maghunahuna nga diri maaramon hi David. Pero sayop gud hira! Hi Goliat an diri maaramon.​—1 Sam. 17:48-51.

6. Ano an aton hihisgotan hini nga artikulo?

⁶ An nahiuna nga artikulo naghisgot hin upat nga butang nga makakabulig nga magin malipayon ngan malampuson kita ha kinabuhi: An pagtagbaw han aton espirituwal nga panginahanglan, pag-apresyar ha hatag han Dios nga kasangkayan, paghimo hin mapulsanon nga mga tumong, ngan pagpabili han aton kagawasan sugad nga katawohan han Dios. Hini nga artikulo, dugang nga hihisgotan naton ini nga mga topiko pinaagi ha pag-usisa han pipira nga prinsipyo ha Salmos 16.

7. (a) Paonan-o mo ihuhulagway an tawo nga mahunahunaon ha espirituwal? (b) Ano an “bahin” ni David, ngan paonan-o ito nakaapekto ha iya?

⁷ An espirituwal nga tawo may pagtoo ha Dios ngan nangangalimbasog nga hunahunaon an mga butang uyon ha panhunahuna han Dios. Nagpapagiya hiya ha Dios ngan determinado hiya nga sumugot ha Iya. (1 Cor. 2:12, 13) Hi David usa nga maopay nga ehemplo. Hiya nagkanta: “Hi Jehova amo an bahin han akon panorondon ngan han akon tagayan.” (Sal. 16:5) Mapasalamaton hi David tungod han iya “bahin,” an iya duok nga relasyon ha Dios, ngan inayop hiya ha Iya. (Sal. 16:1) Sugad nga resulta, nakasiring hiya: ‘Ako nagrarayhak.’ Oo, waray iba nga nakaghatag kan David hin mas daku nga kalipay kay han iya duok nga relasyon ha Dios.​—Basaha an Salmos 16:9, 11.

8. Ano an pipira nga butang nga makakabulig ha imo nga magkaada malipayon gud nga kinabuhi?

⁸ An kalipay nga gin-abat ni David diri maieksperyensyahan han mga tawo nga nakapokus ha kalipayan ngan karikohan. (1 Tim. 6:9, 10) An usa nga brother nga taga-Canada nagsiring, “An tinuod nga kalipay nagtitikang, diri ha kon ano an aton  napapahimulosan ha kinabuhi, kondi ha kon ano an aton iginhahatag ha Humaratag han tagsa nga maopay nga regalo, hi Jehova nga Dios.” (San. 1:17) Oo, pinaagi ha pagparig-on han iyo pagtoo kan Jehova ngan pag-alagad ha iya, magkakaada katuyoan an iyo kinabuhi ngan magigin malipayon gud kamo. Paonan-o niyo mapaparig-on an iyo pagtoo? Kinahanglan maggahin kamo hin panahon kaupod niya, siring pa, pinaagi ha pagbasa han iya Pulong, pag-obserbar han iya mga linarang, ngan pagpamalandong han iya mga kalidad, upod na an iya gugma ha iyo.​—Roma 1:20; 5:8.

9. Ano an imo mahimo buhaton basi mamolde ka han Pulong han Dios, pariho han nahitabo kan David?

⁹ Usahay, iginpapakita han Dios an iya gugma ha aton pinaagi ha pagtadong ha aton kon ginkikinahanglan, pariho han ginbubuhat han usa nga mahigugmaon nga amay. Ginkarawat ni David an sugad nga mahigugmaon nga sagdon. Hiya nagsiring: “Magbibendision [o, magdadayaw] ako kan Jehova, nga naghatag ha akon hin kasalagdonan; oo, an akon kasingkasing nagtututdo ha akon ha mga kagab-ihon.” (Sal. 16:7) Oo, ginpamalandong ni David an panhunahuna han Dios, iya ito ginsubad ngan gintugotan nga magmolde ha iya. Kon ito liwat an iyo bubuhaton, maghihilarom an iyo gugma ha Dios ngan an iyo hingyap nga sugton hiya. Magigin hamtong liwat kamo ha espirituwal. An sister nga hi Christin nagsiring, “Kon nagsasaliksik ako ngan ginpapamalandong ko an akon mga ginbasa, inaabat ko nga iginpasurat ito ni Jehova para gud ha akon!”

10. Sumala ha Isaias 26:3, ano an mga kapulsanan han pagin mahunahunaon ha espirituwal?

¹⁰ An pagin mahunahunaon ha espirituwal naghahatag liwat ha iyo hin hilarom nga kahibaro ngan pagsabot nga nabulig ha iyo nga makita an kalibotan ngan an tidaraon hito uyon ha pagkita ni Jehova. Kay ano nga gintatagan kamo han Dios han sugad nga kahibaro ngan pagsabot? Karuyag niya nga maghimo kamo hin mapulsanon nga mga prayoridad ha kinabuhi, magin maaramon ha iyo mga desisyon, ngan pamulaton an tidaraon nga may kompyansa! (Basaha an Isaias 26:3.) Hi Joshua nga taga-Estados Unidos nagsiring, “An pagpabilin nga duok kan Jehova nabulig ha akon nga magkaada husto nga panhunahuna ha mga butang.” Tinuod gud ito, ngan naghahatag ito hin daku nga kalipay!

11. Ano an ginsiring ni David mahitungod ha kon paonan-o magkakaada tinuod nga kasangkayan?

¹¹ Basaha an Salmos 16:3. Maaram hi David kon paonan-o magkakaada tinuod nga kasangkayan. Inabat niya an ‘bug-os nga kalipay’ ha pakigsangkay ha mga nahigugma kan Jehova. Iya hira iginhulagway sugad nga “mga baraan” kay nangangalimbasog hira nga sundon an limpyo nga mga suruklan ni Jehova ha moral. Sugad liwat hito an inabat han usa pa nga salmista may kalabotan ha iya ginpili nga kasangkayan. Hiya nagsurat: “Kaupdanan [o, sangkay] ako hadton ngatanan nga nahadluk ha imo, ngan hadton mga magbabantay han imo mga turumanon.” (Sal. 119:63) Sugad han aton hinbaroan ha nahiuna nga artikulo, mahimo liwat kamo magkaada damu nga mag-opay nga sangkay ha mga nahahadlok ngan masinugtanon kan Jehova. Syempre, nag-uupod ito han ngatanan nga indibiduwal, anoman an ira edad.

12. Ano an pundasyon han pagkamagsangkay nira David ngan Jonathan?

¹² An salmista nga hi David nakigsangkay diri la ha iya mga kaedad. Nahinunumdoman ba niyo an usa nga nagin hinigugma gud nga sangkay ni David? Hiya hi Jonathan. Ngani, an ira pagkamagsangkay usa han pinakamaopay nga ehemplo han pagkamagsangkay nga mababasa ha Kasuratan. Pero maaram ba kamo nga mas magurang hin mga 30 ka tuig hi Jonathan kan David? Kon sugad, ano an pundasyon han ira pagkamagsangkay? Pagtoo ha Dios, respeto ha usa kag usa, ngan an kaisog nga nakita nira ha kada tagsa samtang nakikig-away hira ha mga kaaway han Dios.​—1 Sam. 13:3; 14:13; 17:48-50; 18:1.

13. Paonan-o ka magkakaada mas damu nga kasangkayan? Pag-unabi hin ehemplo.

¹³ Pariho kanda David ngan Jonathan, naabat liwat kita hin ‘bug-os nga kalipay’ ha paghigugma ha mga nahigugma ngan natoo kan Jehova. Hi Kiera, nga pipira ka tuig na nga nag-aalagad ha Dios, nagsiring, “Nakikigsangkay ako ha mga tawo nga tikang ha iba-iba nga nasud, mga tawo nga iba-iba an gintikangan  ngan kultura.” Kon sugad liwat hini an iyo bubuhaton, makikita niyo an klaro nga ebidensya han gahum han Pulong han Dios ngan han iya espiritu ha paghiusa han iya katawohan.

14. (a) Ano an makakabulig ha imo ha paghimo hin mapulsanon nga mga tumong? (b) Ano an inabat han pipira nga batan-on mahitungod ha paghimo hin espirituwal nga mga tumong?

¹⁴ Basaha an Salmos 16:8. An kinabuhi ni David nakapokus ha pag-alagad ha Dios. Magkakaada liwat kamo malipayon gud nga kinabuhi kon uunahon niyo an pag-alagad kan Jehova ngan maghihimo kamo hin mga tumong uyon ha karuyag ni Jehova para ha iyo. An brother nga hi Steven nagsiring, “An paghimo hin tumong, pagkab-ot hito, ngan pagpamalandong han mga pag-uswag nga akon nahimo naghahatag ha akon hin daku nga kalipay.” Usa nga batan-on nga brother nga taga-Alemanya nga nag-aalagad na yana ha iba nga nasud an nagsiring, “Kon malagas ako, ngan dumdumon ko an akon naglabay, diri ko karuyag nga makita nga an ngatanan ko nga ginbuhat para la ha akon kalugaringon.” Sugad ba liwat hito an iyo inaabat? Kon oo, gamita an iyo mga abilidad basi pasidunggan an Dios ngan buligan an iba. (Gal. 6:10) Paghimo hin espirituwal nga mga tumong, ngan hangyoa hi Jehova nga buligan kamo nga makab-ot ito. Nalilipay hiya nga batunon an sugad nga mga pag-ampo.​—1 Juan 3:22; 5:14, 15.

15. Ano nga mga tumong an puydi mo himoon? (Kitaa an kahon nga “ Pipira nga Mapulsanon nga Tumong.”)

¹⁵ Ano nga mga tumong an puydi niyo himoon? Mahimo niyo himoon nga tumong an pagkomento ha iyo kalugaringon nga mga pulong durante ha mga katirok, pagpayunir, o pag-alagad ha Bethel. Mahimo kamo mag-aram hin iba nga linggwahe basi makag-alagad ha teritoryo nga nagamit hito nga linggwahe. Hi Barak nga usa nga batan-on nga nag-aalagad hin bug-os-panahon, nagsiring, “Ha kada pagmamata ko ha aga nga inaabat ko nga iginhahatag ko kan Jehova an bug-os ko nga kusog usa nga pag-abat nga diri gud maihahatag han iba nga buruhaton.”

16. Ano an inabat ni David mahitungod ha magtadong nga mga suruklan han Dios, ngan kay ano nga ito an iya inabat?

¹⁶ Basaha an Salmos 16:2, 4. Sugad han aton hinbaroan ha nahiuna nga artikulo, an matadong nga mga balaud ngan prinsipyo han Dios naghahatag ha aton hin kagawasan pinaagi ha pagbulig ha aton nga makultibar an gugma ha maopay ngan an kangalas  ha maraot. (Amos 5:15) Hi David nagsiring nga hi Jehova an iya Surok han pagkamaopay. An pagkamaopay amo an pagkaada higtaas nga prinsipyo ha moral. Nangalimbasog gud hi David nga subaron an Dios, upod na an Iya pagkamaopay. Ginkultibar liwat ni David an kangalas ha mga butang nga ginkakangalasan han Dios. Kaupod hito an idolatriya, usa nga buhat nga nakakahugaw ha mga tawo ngan nagkukuha han himaya nga para la unta kan Jehova.​—Isa. 2:8, 9; Pah. 4:11.

17, 18. (a) Ano an naobserbaran ni David mahitungod ha mga resulta han buwa nga pagsingba? (b) Ano an mga hinungdan nga nagdadamu an kasakitan han mga tawo yana?

¹⁷ Ha panahon han Biblia, an seksuwal nga imoralidad kasagaran na nga bahin han buwa nga pagsingba. (Hos. 4:13, 14) Sigurado nga nagin makaruruyag gud ha makasasala nga unod ito nga klase han pagsingba. Pero waray ito maghatag hin nagpapadayon nga kalipay. Lugod, nagresulta ito ha kabidoan. Hi David nagsiring nga nagdadamu an kasakitan hadton nagsisingba ha iba nga mga dios. Hira liwat an hinungdan han pag-antos han damu nga kabataan. (Isa. 57:5) Nangalas gud hi Jehova han ira pagin madarahog! (Jer. 7:31) Kon nabuhi kamo hito nga panahon, sigurado nga magigin mapasalamaton gud kamo kon an iyo mga kag-anak may pagtoo kan Jehova ngan masinugtanon ha iya.

¹⁸ Yana, ginkukonsinter liwat han buwa nga relihiyon an seksuwal nga imoralidad, pati na an homoseksuwalidad. Pero an mga resulta ha pagpahimulos ha gintatawag nga moral nga kagawasan waray gud magbag-o tikang pa ha panahon han Biblia. (1 Cor. 6:18, 19) Nagdadamu an kasakitan han mga tawo, sugad han bangin naoobserbaran niyo. Salit mga batan-on, pamati ha iyo langitnon nga Amay. Magin bug-os nga kombinsido nga an pagin masinugtanon ha iya makakaopay gud ha iyo. Pirme hinumdumi nga temporaryo la an kalipay nga iginhahatag han sayop nga buhat, pero mas daku gud an kadaot nga resulta hito. (Gal. 6:8) Hi Joshua, nga gin-unabi kanina, nagsiring, “Mahimo naton gamiton an aton kagawasan ha bisan ano nga paagi nga karuyag naton, pero an diri maaramon nga paggamit hito diri gud naghahatag hin kalipay.”

19, 20. Ano nga mga bendisyon an makakarawat han mga batan-on nga may pagtoo kan Jehova ngan masinugtanon ha iya?

¹⁹ Hi Jesus nagsiring ha iya mga sumurunod: “Kon pirme niyo ginbubuhat an akon ginsisiring, mga disipulo ko gud kamo, ngan mahibabaro kamo han kamatuoran, ngan an kamatuoran maghahatag ha iyo hin kagawasan.” (Juan 8:31, 32) Ito nga kagawasan nag-uupod han kagawasan tikang ha buwa nga relihiyon, kakulang hin kahibaro, ngan patootoo. Ngan diri la ito. Sugad han aton hinbaroan, kaupod liwat hito an pagkaada “han mahimayaon nga kagawasan” han mga anak han Dios ha tidaraon. (Roma 8:21) Pero yana pa la, mahimo na niyo mapahimulosan ito nga kagawasan kon iyo ‘pirme bubuhaton an ginsisiring,’ o igintututdo, han Kristo. Hini nga paagi, “mahibabaro kamo han kamatuoran” diri la pinaagi ha pag-aram mahitungod hito kondi pinaagi liwat ha pagkinabuhi uyon hito.

²⁰ Mga batan-on, pabilhi an kagawasan nga iginhatag han Dios ha iyo. Gamita ito hin maaramon, kay ha pagbuhat hito, naghihimo kamo hin maopay nga pundasyon para ha tidaraon. Usa nga batan-on nga bugto an nagsiring: “An maaramon nga paggamit han kagawasan samtang bata pa daku gud an naibubulig kon ha urhi kinahanglan mo maghimo hin importante nga mga desisyon, sugad han pagbiling hin angayan nga trabaho o pagdesisyon kon mag-aasawa ka o magpapabilin nga solo ha pipira ka panahon.”

21. Paonan-o ka makakapabilin ha dalan tipakadto ha “totoo nga kinabuhi”?

²¹ Hinin daan nga sistema, bisan an gintatawag nga maopay nga kinabuhi waray kasigurohan ngan halipot la. Diri kita maaram kon ano an mahitatabo pagkabuwas. (San. 4:13, 14) Salit, an maaramon nga buhaton amo an pagpabilin ha dalan tipakadto ha “totoo nga kinabuhi”​—an kinabuhi nga waray kataposan. (1 Tim. 6:19) Syempre, diri kita ginpipirit han Dios nga maglakat dida hito nga dalan. Kita an magdidesisyon hito. Himoa hi Jehova nga iyo “bahin.” Pabilhi an damu nga mag-opay nga butang nga iya iginhahatag ha iyo. (Sal. 103:5) Sarig nga makakaghatag hiya ha iyo hin hura nga ‘kalipay ha kagihaponan.’​—Sal. 16:11.