年轻人，你可以过心满意足嘅生活
“你必定使我认识生命之路。”——诗篇16:11
1,2． 托尼嘅经历点样表明一个人嘅生活系可以改变过嚟嘅？
托尼自细就冇爸爸。佢系一个高中生，唔钟意返学。佢想离开学校，冇谂住毕业。周末，托尼会去睇电影或者同朋友一齐消磨时间。佢唔系一个钟意暴力嘅人，亦冇滥用药物。佢只不过系冇人生目标，对上帝嘅存在有所质疑。后来，佢遇到一对见证人夫妇，将自己内心嘅疑问话俾佢哋知。佢哋俾咗佢两本册子，一本系《生命的起源——值得思考的五个问题》，一本系《生命来自创造吗？》。
2 呢对夫妇第二次探访托尼嘅时候，托尼嘅谂法完全改变晒。由于佢睇完又睇，所以嗰两本册子变得好残旧。佢话：“一定有一个上帝。”佢接受咗学习圣经嘅安排，之后佢嘅人生观逐渐改变。原本佢唔系咁钟意读书，不过后来就成为学校其中一个最优秀嘅学生。校长知道托尼嘅新信仰之后觉得好惊讶，佢话：“你嘅态度同成绩都有好大进步，系咪因为你同耶和华见证人来往呢？”托尼话“系”，然后就同校长分享自己从圣经学到嘅嘢。托尼顺利从高中毕业，而家系正规先驱同助理仆人。佢好开心自己有一个无与伦比嘅爸爸，就系耶和华。（诗篇68:5）
服从耶和华，你就会成功
3． 耶和华向年轻人提出乜嘢建议？
3 托尼嘅经历提醒我哋，耶和华确实好关心年轻人。佢好想你得到真正嘅成功，过心满意足嘅生活。所以，佢建议话：“你趁年轻嘅日子，就要将你伟大嘅创造主谨记在心。”（传道书12:1）喺今日呢个世界，噉样做虽然唔容易，但并唔系冇可能嘅。有上帝嘅帮助，噉你一生都可以获得成功。而家一齐嚟睇吓，我哋从以色列人征服应许之地、大卫迎战歌利亚呢两个例子，可以学到乜嘢。
4,5． 我哋从以上呢两个圣经事例学到乜嘢？（请睇吓课文开头嘅图片）
4 以色列人接近应许之地嗰时，耶和华冇叫佢哋接受一啲军事训练或者提高自己嘅作战技能，而系吩咐佢哋要服从佢嘅诫命并信赖佢。（申命记28:1,2；约书亚记1:7-9）从人嘅角度嚟睇，呢个吩咐唔系好实际。不过，其实呢个先至系最好嘅建议，因为后来耶和华帮助佢嘅子民喺迦南地取得一次又一次嘅胜利。（约书亚记24:11-13）冇错，服从上帝需要信心，而信心一定会带嚟成功。无论过去定系而家，呢个真理都冇改变。
5 歌利亚系一个强大嘅战士，佢身高大约2.9米（9.5英尺），有优良嘅装备。（撒母耳记上17:4-7）而大卫就只系得两样嘢：一条投石带同佢对耶和华上帝嘅信心。嗰啲对上帝冇信心嘅人觉得，大卫迎战歌利亚真系好愚蠢。不过，佢哋错嘞！愚蠢嘅其实系歌利亚。（撒母耳记上17:48-51）
6． 呢篇课文会讨论乜嘢？
6 上一篇课文讨论过，可以使我哋得享快乐同成功生活嘅四件事，分别系：满足我哋嘅属灵需要、结交爱耶和华嘅好友、定立有价值嘅目标同埋珍视作为上帝子民嘅自由。呢篇课文会再一次深入探讨呢四件事，亦都睇吓诗篇第16篇嘅一啲原则。
满足你嘅属灵需要
7． （甲）你会点样描述一个属灵嘅人？（乙）大卫嘅“产业”系乜嘢？呢个点样影响佢？
7 一个属灵嘅人会信赖上帝，亦都识得用上帝嘅观点睇问题。佢会向上帝寻求指引，决心服从佢。（哥林多前书2:12,13）大卫就系一个好例子。佢话：“耶和华系我分得嘅产业，系我杯中嘅美酒。”（诗篇16:5）呢度所讲嘅“产业”，包括大卫同耶和华嘅亲密关系。因为噉，佢可以向耶和华寻求庇护。（诗篇16:1）结果点样？大卫话：“我高尚嘅心灵喜乐”。的确，冇任何嘢比亲近耶和华更能够令大卫喜乐。（请读诗篇16:9,11）
8． 乜嘢可以使你得到真正心满意足嘅生活？
8 大卫所体验到嘅喜乐，唔会临到嗰啲追求享乐同财富嘅人身上。（提摩太前书6:9,10）一个喺加拿大嘅弟兄话：“真正嘅满足感，唔系嚟自生活上得到嘅嘢，而系因为我哋可以为厚赐百物嘅耶和华上帝有所付出。”（雅各书1:17）冇错，对耶和华培养信心，全心事奉佢，可以带俾你满足感同有意义嘅生活。你可以点样使自己有更稳固嘅信心呢？你要花时间同耶和华喺一齐。具体点样做？阅读佢嘅话语；观察佢创造嘅万物；沉思佢嘅特质，特别系佢对你嘅爱。（罗马书1:20；5:8）
9． 你可以点样受上帝嘅话语塑造？
9 上帝有时会好似仁爱嘅父亲噉纠正我哋，以此表明佢对我哋嘅爱。大卫好珍视上帝仁慈嘅劝告，佢话：“我要称颂耶和华，因为佢规劝我。夜间，我内心嘅深处纠正我。”（诗篇16:7）冇错，大卫沉思并全心接纳上帝嘅思想，使自己受上帝嘅思想塑造。如果你怀住信心噉样做，就可以加深对上帝嘅爱。你会更加乐意服从佢，亦都会成为一个更成熟嘅基督徒。一个叫做克莉丝汀嘅姊妹话：“我做个人研读同沉思读过嘅资料嗰阵会感觉到，呢啲资料就系耶和华为我而写嘅！”
10． 根据以赛亚书26:3，属灵嘅观点对我哋嘅人生有乜嘢帮助？
10 如果你有属灵嘅观点，耶和华就会赐俾你卓越嘅知识同洞察力，使你可以从佢嘅角度去睇呢个世界同世界嘅未来。点解耶和华俾你呢啲知识同洞察力？佢希望你知道喺生活上乜嘢系最重要嘅，可以作出明智嘅决定，并怀住信心期待未来。（请读以赛亚书26:3）美国有个叫乔舒亚嘅弟兄，佢话：“同耶和华保持亲密嘅关系，噉我哋对所有事情都会有正确嘅睇法。”佢讲得一啲都冇错！
结交真朋友
11． 大卫结交好友嘅秘诀系乜嘢？
11 请读诗篇16:3。大卫知道结交真朋友嘅秘诀。佢“全心喜爱”嗰啲爱耶和华嘅人，觉得同佢哋做朋友系一件好开心嘅事。佢将呢啲朋友称为“圣民”，因为佢哋道德洁净，为人正直。另一位诗篇执笔者喺选择朋友方面都有同样嘅感受，佢话：“凡敬畏你、谨守你命令嘅人，都系我嘅朋友。”（诗篇119:63）正如上一篇课文所讲，你都可以喺敬畏并服从耶和华嘅人当中揾到好多好朋友。当然，呢啲朋友可以嚟自唔同嘅年龄层。
12． 大卫同约拿单嘅友谊建立喺乜嘢基础上呢？
12 大卫冇只系揾嗰啲同自己年纪差唔多嘅人做朋友。你记唔记得边个系大卫嘅密友呢？就系约拿单。佢哋建立咗喺圣经入面其中一段最真挚嘅友谊。约拿单比大卫大三十岁左右。佢哋嘅友谊建立喺乜嘢基础上呢？就系信赖上帝，彼此尊重，同埋欣赏对方为上帝作战嗰时所表现嘅勇气。（撒母耳记上13:3；14:13；17:48-50；18:1）
13． 你可以点样扩大自己嘅朋友圈？请举例。
13 就好似大卫同约拿单噉，我哋都“全心喜爱”嗰啲爱耶和华，而且对佢表现信心嘅人。事奉耶和华多年嘅基拉话：“我结交嘅朋友遍布世界各地，有唔同嘅文化背景。”如果你都扩大自己嘅朋友圈，噉你就会清楚睇出，上帝嘅话语同圣灵点样将我哋呢个全球嘅属灵大家庭团结起嚟。
追求有价值嘅目标
14． （甲）乜嘢可以帮助你定立有价值嘅人生目标？（乙）一啲年轻人对定立属灵目标有点样嘅感受？
14 请读诗篇16:8。大卫一生都专注于事奉耶和华。如果你定立目标嗰阵谨记大卫嘅榜样，凡事都谂吓耶和华希望你点样做，噉你就可以享有真正心满意足嘅人生。一个叫史蒂文嘅弟兄话：“努力追求并达到一个目标之后，睇到自己取得嘅进步真系好有满足感。”一个喺外地服务嘅德国年轻弟兄话：“我唔希望老咗之后回顾自己一生嗰时先发现，原来所做嘅一切都只系为咗自己。”如果你都有同样嘅感受，请用你嘅恩赐嚟荣耀上帝，同埋为其他人服务。（加拉太书6:10）你可以先为自己定立属灵目标，然后祷告祈求耶和华帮助你达到呢啲目标。佢一定好乐意回应你嘅祷告。（约翰一书3:22；5:14,15）
15． 你会为自己定立乜嘢目标？（请睇附栏“ 一啲实际嘅目标”）
15 你可以定立乜嘢目标呢？可以喺聚会嗰时用自己嘅话嚟回答问题，做先驱或者去伯特利服务。你可能努力学习紧另一种语言，希望将来去外语地区服务。巴拉克系一个年轻嘅全时仆人，佢话：“朝早瞓醒嗰阵，知道自己每日都将全部精力献俾耶和华，呢种感觉系其他任何活动都俾唔到我嘅。”
珍视上帝所赐嘅自由
16． 大卫对上帝嘅正义标准有乜嘢睇法？点解？
16 请读诗篇16:2,4。正如上一篇课文提到，上帝正义嘅律法同原则帮助我哋喜爱良善，憎恨邪恶，从而得享自由。（阿摩司书5:15）诗篇执笔者大卫话自己嘅“良善唔能够带俾［耶和华］乜嘢益处”，因为佢清楚知道耶和华先至系良善嘅源头。良善系一种高尚嘅品德或美德。大卫努力效法上帝，爱耶和华所爱，同时恨耶和华所恨。耶和华憎恨嘅其中一样就系拜偶像。呢种行为会贬低人类，而且将耶和华先至配得嘅荣耀归于凡人或者其他受造物。（以赛亚书2:8,9；启示录4:11）
17,18． （甲）大卫话，参与错误嘅崇拜会招致乜嘢恶果？（乙）今日，乜嘢令一啲人“痛苦必多”？
17 喺圣经时代，错误崇拜往往涉及下流放荡嘅性行为。（何西阿书4:13,14）可以肯定嘅系，呢种形式嘅崇拜对好多顺应肉体欲望嘅人嚟讲，的确好有吸引力。不过噉样做，系咪可以得到长久嘅快乐呢？根本冇可能！大卫话：“追随其他神嘅人，痛苦必多。”有啲参与错误崇拜嘅人，甚至将自己嘅儿女作为祭牲献俾假神！（以赛亚书57:5）耶和华痛恨呢啲残忍嘅做法！（耶利米书7:31）如果你生活喺嗰个时代，而你嘅父母系信奉耶和华嘅话，你肯定会好感激佢哋同埋服从佢哋。
18 今日亦都一样，错误嘅崇拜往往宽容性不道德，甚至宽容同性恋。但系，从圣经时代以来，呢啲所谓嘅道德自由带嚟嘅后果始终都冇改变。（哥林多前书6:18,19）正如你所知道嘅一样，呢啲人“痛苦必多”。所以年轻人，要听从你嘅天父，坚信服从上帝先可以为自己带嚟最大嘅益处。另外要牢记，错误嘅行为对你造成嘅伤害远远超过暂时嘅欢愉。（加拉太书6:8）上文提到嘅乔舒亚话：“我哋可以随意运用自己嘅自由，但系滥用嘅话，就唔能够使自己得到满足感。”
19,20． 年轻人信赖并服从耶和华会得到乜嘢福分？
19 耶稣对佢嘅门徒讲：“你哋时刻遵守我讲嘅话，就真系我嘅门徒喇。你哋会认识真理，真理会使你哋自由。”（约翰福音8:31,32）呢种自由，包括使人从错误宗教、愚昧无知、迷信或者其他方面得到释放。我哋期望喺将来得享“上帝儿女荣耀嘅自由”。（罗马书8:21）如果我哋“时刻遵守［基督］讲嘅话”或者教导，而家就可以品尝到呢种自由嘅滋味。噉样，你就会“认识真理”。点样认识？除咗学习真理，仲要将真理实践出嚟。
20 年轻人，请珍视上帝已经赐俾你嘅自由。要善用呢种自由，为未来打好基础。一个年轻弟兄话：“而家就明智运用自由，对年轻人嚟讲真系好有帮助，因为以后你会面对更大嘅抉择，例如揾一份点样嘅工作，选择结婚抑或喺一段时间内保持独身。”
21． 你可以点样继续行走通往“真正嘅生命”嘅道路？
21 喺呢个旧嘅事物制度，就算所谓嘅美好生活都系短暂嘅。今日唔知听日事。（雅各书4:13,14）明智嘅做法系，“紧握真正嘅生命”，继续行走通往永生嘅道路。（提摩太前书6:19）当然，上帝唔会强迫我哋行呢条路。选择权喺我哋手上。要使耶和华成为你嘅“产业”，珍视佢赐俾你嘅各样“美物”。（诗篇103:5）同时，要相信佢能够俾你“满足嘅欢欣”同“永远嘅……福乐”。（诗篇16:11）
