年輕人，你可以過心滿意足嘅生活
“你必定使我認識生命之路。”——詩篇16:11
1,2． 托尼嘅經歷點樣表明一個人嘅生活係可以改變過嚟嘅？
托尼自細就冇爸爸。佢係一個高中生，唔鍾意返學。佢想離開學校，冇諗住畢業。週末，托尼會去睇電影或者同朋友一齊消磨時間。佢唔係一個鍾意暴力嘅人，亦冇濫用藥物。佢只不過係冇人生目標，對上帝嘅存在有所質疑。後來，佢遇到一對見證人夫婦，將自己内心嘅疑問話俾佢哋知。佢哋俾咗佢兩本册子，一本係《生命的起源——值得思考的五個問題》，一本係《生命來自創造嗎？》。
2 呢對夫婦第二次探訪托尼嘅時候，托尼嘅諗法完全改變晒。由於佢睇完又睇，所以嗰兩本册子變得好殘舊。佢話：“一定有一個上帝。”佢接受咗學習聖經嘅安排，之後佢嘅人生觀逐漸改變。原本佢唔係咁鍾意讀書，不過後來就成為學校其中一個最優秀嘅學生。校長知道托尼嘅新信仰之後覺得好驚訝，佢話：“你嘅態度同成績都有好大進步，係咪因為你同耶和華見證人來往呢？”托尼話“係”，然後就同校長分享自己從聖經學到嘅嘢。托尼順利從高中畢業，而家係正規先驅同助理僕人。佢好開心自己有一個無與倫比嘅爸爸，就係耶和華。（詩篇68:5）
服從耶和華，你就會成功
3． 耶和華向年輕人提出乜嘢建議？
3 托尼嘅經歷提醒我哋，耶和華確實好關心年輕人。佢好想你得到真正嘅成功，過心滿意足嘅生活。所以，佢建議話：“你趁年輕嘅日子，就要將你偉大嘅創造主謹記在心。”（傳道書12:1）喺今日呢個世界，噉樣做雖然唔容易，但並唔係冇可能嘅。有上帝嘅幫助，噉你一生都可以獲得成功。而家一齊嚟睇吓，我哋從以色列人征服應許之地、大衛迎戰歌利亞呢兩個例子，可以學到乜嘢。
4,5． 我哋從以上呢兩個聖經事例學到乜嘢？（請睇吓課文開頭嘅圖片）
4 以色列人接近應許之地嗰時，耶和華冇叫佢哋接受一啲軍事訓練或者提高自己嘅作戰技能，而係吩咐佢哋要服從佢嘅誡命並信賴佢。（申命記28:1,2；約書亞記1:7-9）從人嘅角度嚟睇，呢個吩咐唔係好實際。不過，其實呢個先至係最好嘅建議，因為後來耶和華幫助佢嘅子民喺迦南地取得一次又一次嘅勝利。（約書亞記24:11-13）冇錯，服從上帝需要信心，而信心一定會帶嚟成功。無論過去定係而家，呢個真理都冇改變。
5 歌利亞係一個强大嘅戰士，佢身高大約2.9米（9.5英尺），有優良嘅裝備。（撒母耳記上17:4-7）而大衛就只係得兩樣嘢：一條投石帶同佢對耶和華上帝嘅信心。嗰啲對上帝冇信心嘅人覺得，大衛迎戰歌利亞真係好愚蠢。不過，佢哋錯嘞！愚蠢嘅其實係歌利亞。（撒母耳記上17:48-51）
6． 呢篇課文會討論乜嘢？
6 上一篇課文討論過，可以使我哋得享快樂同成功生活嘅四件事，分别係：滿足我哋嘅屬靈需要、結交愛耶和華嘅好友、定立有價值嘅目標同埋珍視作為上帝子民嘅自由。呢篇課文會再一次深入探討呢四件事，亦都睇吓詩篇第16篇嘅一啲原則。
滿足你嘅屬靈需要
7． （甲）你會點樣描述一個屬靈嘅人？（乙）大衛嘅“産業”係乜嘢？呢個點樣影響佢？
7 一個屬靈嘅人會信賴上帝，亦都識得用上帝嘅觀點睇問題。佢會向上帝尋求指引，決心服從佢。（哥林多前書2:12,13）大衛就係一個好例子。佢話：“耶和華係我分得嘅産業，係我杯中嘅美酒。”（詩篇16:5）呢度所講嘅“産業”，包括大衛同耶和華嘅親密關係。因為噉，佢可以向耶和華尋求庇護。（詩篇16:1）結果點樣？大衛話：“我高尚嘅心靈喜樂”。的確，冇任何嘢比親近耶和華更能够令大衛喜樂。（請讀詩篇16:9,11）
8． 乜嘢可以使你得到真正心滿意足嘅生活？
8 大衛所體驗到嘅喜樂，唔會臨到嗰啲追求享樂同財富嘅人身上。（提摩太前書6:9,10）一個喺加拿大嘅弟兄話：“真正嘅滿足感，唔係嚟自生活上得到嘅嘢，而係因為我哋可以為厚賜百物嘅耶和華上帝有所付出。”（雅各書1:17）冇錯，對耶和華培養信心，全心事奉佢，可以帶俾你滿足感同有意義嘅生活。你可以點樣使自己有更穩固嘅信心呢？你要花時間同耶和華喺一齊。具體點樣做？閲讀佢嘅話語；觀察佢創造嘅萬物；沉思佢嘅特質，特别係佢對你嘅愛。（羅馬書1:20；5:8）
9． 你可以點樣受上帝嘅話語塑造？
9 上帝有時會好似仁愛嘅父親噉糾正我哋，以此表明佢對我哋嘅愛。大衛好珍視上帝仁慈嘅勸告，佢話：“我要稱頌耶和華，因為佢規勸我。夜間，我内心嘅深處糾正我。”（詩篇16:7）冇錯，大衛沉思並全心接納上帝嘅思想，使自己受上帝嘅思想塑造。如果你懷住信心噉樣做，就可以加深對上帝嘅愛。你會更加樂意服從佢，亦都會成為一個更成熟嘅基督徒。一個叫做克莉絲汀嘅姊妹話：“我做個人研讀同沉思讀過嘅資料嗰陣會感覺到，呢啲資料就係耶和華為我而寫嘅！”
10． 根據以賽亞書26:3，屬靈嘅觀點對我哋嘅人生有乜嘢幫助？
10 如果你有屬靈嘅觀點，耶和華就會賜俾你卓越嘅知識同洞察力，使你可以從佢嘅角度去睇呢個世界同世界嘅未來。點解耶和華俾你呢啲知識同洞察力？佢希望你知道喺生活上乜嘢係最重要嘅，可以作出明智嘅決定，並懷住信心期待未來。（請讀以賽亞書26:3）美國有個叫喬舒亞嘅弟兄，佢話：“同耶和華保持親密嘅關係，噉我哋對所有事情都會有正確嘅睇法。”佢講得一啲都冇錯！
結交真朋友
11． 大衛結交好友嘅秘訣係乜嘢？
11 請讀詩篇16:3。大衛知道結交真朋友嘅秘訣。佢“全心喜愛”嗰啲愛耶和華嘅人，覺得同佢哋做朋友係一件好開心嘅事。佢將呢啲朋友稱為“聖民”，因為佢哋道德潔淨，為人正直。另一位詩篇執筆者喺選擇朋友方面都有同樣嘅感受，佢話：“凡敬畏你、謹守你命令嘅人，都係我嘅朋友。”（詩篇119:63）正如上一篇課文所講，你都可以喺敬畏並服從耶和華嘅人當中揾到好多好朋友。當然，呢啲朋友可以嚟自唔同嘅年齡層。
12． 大衛同約拿單嘅友誼建立喺乜嘢基礎上呢？
12 大衛冇只係揾嗰啲同自己年紀差唔多嘅人做朋友。你記唔記得邊個係大衛嘅密友呢？就係約拿單。佢哋建立咗喺聖經入面其中一段最真摯嘅友誼。約拿單比大衛大三十歲左右。佢哋嘅友誼建立喺乜嘢基礎上呢？就係信賴上帝，彼此尊重，同埋欣賞對方為上帝作戰嗰時所表現嘅勇氣。（撒母耳記上13:3；14:13；17:48-50；18:1）
13． 你可以點樣擴大自己嘅朋友圈？請舉例。
13 就好似大衛同約拿單噉，我哋都“全心喜愛”嗰啲愛耶和華，而且對佢表現信心嘅人。事奉耶和華多年嘅基拉話：“我結交嘅朋友遍布世界各地，有唔同嘅文化背景。”如果你都擴大自己嘅朋友圈，噉你就會清楚睇出，上帝嘅話語同聖靈點樣將我哋呢個全球嘅屬靈大家庭團結起嚟。
追求有價值嘅目標
14． （甲）乜嘢可以幫助你定立有價值嘅人生目標？（乙）一啲年輕人對定立屬靈目標有點樣嘅感受？
14 請讀詩篇16:8。大衛一生都專注於事奉耶和華。如果你定立目標嗰陣謹記大衛嘅榜樣，凡事都諗吓耶和華希望你點樣做，噉你就可以享有真正心滿意足嘅人生。一個叫史蒂文嘅弟兄話：“努力追求並達到一個目標之後，睇到自己取得嘅進步真係好有滿足感。”一個喺外地服務嘅德國年輕弟兄話：“我唔希望老咗之後回顧自己一生嗰時先發現，原來所做嘅一切都只係為咗自己。”如果你都有同樣嘅感受，請用你嘅恩賜嚟榮耀上帝，同埋為其他人服務。（加拉太書6:10）你可以先為自己定立屬靈目標，然後禱告祈求耶和華幫助你達到呢啲目標。佢一定好樂意回應你嘅禱告。（約翰一書3:22；5:14,15）
15． 你會為自己定立乜嘢目標？（請睇附欄“ 一啲實際嘅目標”）
15 你可以定立乜嘢目標呢？可以喺聚會嗰時用自己嘅話嚟回答問題，做先驅或者去伯特利服務。你可能努力學習緊另一種語言，希望將來去外語地區服務。巴拉克係一個年輕嘅全時僕人，佢話：“朝早瞓醒嗰陣，知道自己每日都將全部精力獻俾耶和華，呢種感覺係其他任何活動都俾唔到我嘅。”
珍視上帝所賜嘅自由
16． 大衛對上帝嘅正義標準有乜嘢睇法？點解？
16 請讀詩篇16:2,4。正如上一篇課文提到，上帝正義嘅律法同原則幫助我哋喜愛良善，憎恨邪惡，從而得享自由。（阿摩司書5:15）詩篇執筆者大衛話自己嘅“良善唔能够帶俾［耶和華］乜嘢益處”，因為佢清楚知道耶和華先至係良善嘅源頭。良善係一種高尚嘅品德或美德。大衛努力效法上帝，愛耶和華所愛，同時恨耶和華所恨。耶和華憎恨嘅其中一樣就係拜偶像。呢種行為會貶低人類，而且將耶和華先至配得嘅榮耀歸於凡人或者其他受造物。（以賽亞書2:8,9；啟示錄4:11）
17,18． （甲）大衛話，參與錯誤嘅崇拜會招致乜嘢惡果？（乙）今日，乜嘢令一啲人“痛苦必多”？
17 喺聖經時代，錯誤崇拜往往涉及下流放蕩嘅性行為。（何西阿書4:13,14）可以肯定嘅係，呢種形式嘅崇拜對好多順應肉體慾望嘅人嚟講，的確好有吸引力。不過噉樣做，係咪可以得到長久嘅快樂呢？根本冇可能！大衛話：“追隨其他神嘅人，痛苦必多。”有啲參與錯誤崇拜嘅人，甚至將自己嘅兒女作為祭牲獻俾假神！（以賽亞書57:5）耶和華痛恨呢啲殘忍嘅做法！（耶利米書7:31）如果你生活喺嗰個時代，而你嘅父母係信奉耶和華嘅話，你肯定會好感激佢哋同埋服從佢哋。
18 今日亦都一樣，錯誤嘅崇拜往往寬容性不道德，甚至寬容同性戀。但係，從聖經時代以來，呢啲所謂嘅道德自由帶嚟嘅後果始終都冇改變。（哥林多前書6:18,19）正如你所知道嘅一樣，呢啲人“痛苦必多”。所以年輕人，要聽從你嘅天父，堅信服從上帝先可以為自己帶嚟最大嘅益處。另外要牢記，錯誤嘅行為對你造成嘅傷害遠遠超過暫時嘅歡愉。（加拉太書6:8）上文提到嘅喬舒亞話：“我哋可以隨意運用自己嘅自由，但係濫用嘅話，就唔能够使自己得到滿足感。”
19,20． 年輕人信賴並服從耶和華會得到乜嘢福分？
19 耶穌對佢嘅門徒講：“你哋時刻遵守我講嘅話，就真係我嘅門徒喇。你哋會認識真理，真理會使你哋自由。”（約翰福音8:31,32）呢種自由，包括使人從錯誤宗教、愚昧無知、迷信或者其他方面得到釋放。我哋期望喺將來得享“上帝兒女榮耀嘅自由”。（羅馬書8:21）如果我哋“時刻遵守［基督］講嘅話”或者教導，而家就可以品嘗到呢種自由嘅滋味。噉樣，你就會“認識真理”。點樣認識？除咗學習真理，仲要將真理實踐出嚟。
20 年輕人，請珍視上帝已經賜俾你嘅自由。要善用呢種自由，為未來打好基礎。一個年輕弟兄話：“而家就明智運用自由，對年輕人嚟講真係好有幫助，因為以後你會面對更大嘅抉擇，例如揾一份點樣嘅工作，選擇結婚抑或喺一段時間内保持獨身。”
21． 你可以點樣繼續行走通往“真正嘅生命”嘅道路？
21 喺呢個舊嘅事物制度，就算所謂嘅美好生活都係短暫嘅。今日唔知聽日事。（雅各書4:13,14）明智嘅做法係，“緊握真正嘅生命”，繼續行走通往永生嘅道路。（提摩太前書6:19）當然，上帝唔會强迫我哋行呢條路。選擇權喺我哋手上。要使耶和華成為你嘅“産業”，珍視佢賜俾你嘅各樣“美物”。（詩篇103:5）同時，要相信佢能够俾你“滿足嘅歡欣”同“永遠嘅……福樂”。（詩篇16:11）
