Lubanga en Anga?
Jo mapol giwacci giye i kom Lubanga. Ento ka ipenyogi anga ma Lubanga obedo, ci ibiwinyo lagam mapatpat. Bot jo mukene, Lubanga obedo langol kop mager, ma mito pwodo dano pi balgi. Ento ki bot jo mukene, Lubanga obedo mere lamar dok latim kica kare ducu, kadi itim gin maber nyo marac. Jo mukene dok giwacci Lubanga tye ka mabor adada dok en pe ki miti mo i komwa. Pi tam pa dano ma tye onywene, oweko jo mapol giwinyo calo pe twere kulu me ngeyo anga ma Lubanga obedo.
Tika pire tek me ngeyo Lubanga? Ada, pire tek. Ngeyo Lubanga maber weko wabedo ki tyen lok matir me kwo. (Tic pa Lukwena 17:26-28) Ka imedde ki nyiko cok ki Lubanga, en bene bimari dok bikonyi. (Yakobo 4:8) I agikkine, bedo ki ngec matir i kom Lubanga twero weko wanongo kwo ma pe tum.—Jon 17:3.
Itwero cako ngeyo Lubanga nining? Tam kong i kom laremi mo macok ma ingeyo maber. Wucako dongo lirem meno nining? Oromo bedo ni icako ki ngeyo nying ngat meno, kite, gin ma en maro ki gin ma en dagi, kacel ki gin ma en otimo ki gin ma en tye ka yubbe me timone, ki mukene mapol. Magi aye gin ma oweko imako lirem ki dano meno—ipwonyo jami mapol madok i kome.
I yo acel-lu, watwero ngeyo Lubanga ki nyamo lok magi:
Magajin man kiyubo wek omi lagam me Baibul pi lapeny magi. Pwony ma iye bikonyi me ngeyo anga ma Lubanga obedo kacel ki yub ma mege piri ka wati kwede woto ki dongo.
