Vanhu vo tala va vula leswaku va pfumela eka Xikwembu. Kambe loko wo va vutisa leswaku Xikwembu i mani, u ta kuma tinhlamulo to hambanahambana. Van’wana va vula leswaku Xikwembu xi ni tihanyi naswona xi xupula vanhu hikwalaho ka swihoxo swa vona. Van’wana va vula leswaku xi ni rirhandzu naswona xi ta ku rivalela ku nga khathariseki leswaku u endla yini. Van’wana va vula leswaku Xikwembu xi le kule ngopfu naswona a xi na mhaka na hina. Hikwalaho, vanhu va gimeta hi ku vula leswaku a swi koteki ku tiva Xikwembu.

Xana i swa nkoka ku tiva Xikwembu? Ina. Ku tiva Xikwembu kahle, swi ta endla leswaku u hanya vutomi lebyi nga ni xikongomelo. (Mintirho 17:26-28) Xikwembu xi ta ku rhandza xi tlhela xi ku pfuna loko u tshinela eka xona. (Yakobo 4:8) Loko u xi tiva kahle Xikwembu u ta kuma vutomi lebyi nga heriki.—Yohane 17:3.

U nga endla yini leswaku u tiva Xikwembu? Anakanya hi munhu loyi u n’wi tivaka kahle, wo tanihi munghana wa wena. Vunghana bya n’wina byi sungule njhani? U tive vito rakwe, vumunhu byakwe, leswi a swi rhandzaka, leswi a swi vengaka, leswi a swi fikeleleke ni leswi a swi kunguhateke ku katsa ni swin’wana. Ku dyondza hi munhu yoloye swi endle leswaku mi va vanghana.

Hilaha ku fanaka, hi ta tiva Xikwembu loko hi kambisisa tinhlamulo ta swivutiso leswi landzelaka:

• VITO RA XIKWEMBU I MANI?

• HI TIHI TIMFANELO TA XONA?

• I YINI LESWI XIKWEMBU XI SWI ENDLEKE?

• I YINI LESWI XIKWEMBU XI NGA TA SWI ENDLA?

• KU TIVA XIKWEMBU SWI NGA KU VUYERISA NJHANI?

Magazini lowu wu ta hlamula swivutiso sweswo hi ku tirhisa Bibele. Swihloko leswi a swi nge ku pfuni leswaku u tiva Xikwembu ntsena kambe swi ta tlhela swi ku byela ndlela leyi u nga vuyeriwaka ha yona loko u va munghana wa xona.