Muluku ti Pani?
Atthu anceene annikupali wira Muluku ookhala. Masi okathi anikohiwa aya wira Muluku ti pani, khula mutthu onaakhula mwa enamuna awe. Atthu akina anikupali wira Muluku mphuki ootakhala onaahukhumu atthu mwaha wa soovonya saya. Akina anihimya wira okathi wotheene owo toophenta, ni toolevelela mwa itthu sotheene. Nave atthu akina-tho anikupali wira Muluku ori ottaiwene wa apinaatamu ni khonaathokorerya. Miyoonelo iyo soovirikana sinniwiiriha anamunceene wuupuwelaka wira khivaniweryaneya omusuwela Muluku.
Niireke vannireerela omusuwela Muluku? Aayo. Omusuwela saana Muluku pooti woophwanyihani ohakalala mookumini. (Miteko 17:26-28) Mwamwaattamela Muluku, nave owo onimoophentakani vanceene ni wookhaliheryani. (Yakobo 4:8) Omusuwela saana Muluku onimoophwanyihani ekumi ehinimala.—Yohani 17:3.
Munrowa omusuwela sai? Nkahaya mmuupuwele mpatthani anyu eekeekhai. Opatthani owo opacenrye sai wunnuwa? Waaniheryasa nyuwo munnisuwela nsina nawe, mukhalelo awe, itthu sinimusivela ni sihimmusivela, munnisuwela etthu onipaka awe, apalano awe ni itthu sikina. Woonasa wene itthu iyo ti saawiirinheni osiveliwa ni mutthu owo ni ophavela omusuwela saana.
Moolikanasa, wira nimusuwele Muluku nihaana othokorerya makoho anittharelana:
Erevista ela epakiwe wira yaakhule makoho awo. Myaha sinithokoreriwa, khahiyo paahi, sinrowa wookhaliheryani omusuwela Muluku, masi-tho munoosuwela mireerelo munrowa anyu ophwanya vakhala wira munookhala mpatthani awe.
