Ŵandu ŵajinji akusasalaga kuti akusamkulupilila Mlungu. Nambo ali ŵawusisye kuti, ana Mlungu ali ŵani? akusajanga mwakulekanganalekangana. Ŵane akusati Mlungu ali jwakulamulila jwangalwe soni akusagambaga kwapa ŵandu cilango pa yakulemwa yatesile. Ŵanesoni akusati Mlungu ali jwacinonyelo soni jwakululuka, mwangasamala kandu ya yindu yakusatendaga jemanjajo. Nambope ŵane akusakulupilila kuti Mlungu ali kutali soni jwangatendaga lung’wanu ni ŵandu. Ligongo lya kulekangana nganisyo kweleku, ŵajinji akusayiwona kuti yangakomboleka kummanyilila Mlungu.

Ana kummanyilila Mlungu kwana umbone wuliwose? Elo, umbone upali. Kummanyilila cenene Mlungu mpaka kutukamucisye kumanyilila lisosa lya umi wetu. (Masengo 17:26-28) Pakumŵandicila Mlungu, jwalakwe cacanonyela soni kwakamucisya. (Yakobo 4:8) Kummanyilila cenene Mlungu kucakamucisya kuti capate umi wangamala.—Yohane 17:3.

Ana mpaka ammanyilile Mlungu camtuli? Aganicisye ya mundu jwakusammanyilila mnope jwali mjawo jusyesyene. Ana yatandite camtuli kuti aŵe mjawo? Mwangakayicila ŵatandite ni kummanyilila lina, umundu wakwe, yindu yakusayinonyela, yindu yaŵele ali mkutenda soni yakusaka kutenda ni yine yejinji. Kumanyilila cenene yakwamba jwalakwe kwakamucisye kuti aŵe najo paujakwe.

Mwakulandana ni yeleyi, mpaka tummanyilile Mlungu mwakuganicisya yiwusyo ayi:

• ANA MLUNGU LINA LYAKWE ŴANI?

• ANA MLUNGU AKWETE NDAMO SYAMTULI?

• ANA MLUNGU ATESILE YINDU YAMTULI?

• ANA MLUNGU CACITENDA YAMTULI MSOGOLOMU?

• ANA KUMMANYILILA MLUNGU KULI KWAKAMUCISYA CAMTULI KWA WAWOJO?

Magasiniji ajilinganyisye kuti jakamucisye kupata kwanga kwa yiwusyoyi kutyocela m’Baibulo. Ngani syasili m’magasiniji cisyakamucisye kulola umbone wampaka apate ligongo lya kuŵa paunasi ni Mlungu, ngaŵa kwamba kummanyililape.