Qa qajbʼil tuʼn tok qojtzqiʼn jun xjal, bʼalo in xi qqanin jlu te tnejel: «¿Tiʼ tbʼiya?». Noqwit jaku txi qqanin xjel lu te Dios, ¿tiʼtzulo jaku tzaj ttzaqʼweʼn?

«Aqine Jehová porke atzun nbʼiye» (Isaías 42:8).

Nim toklen toj twitz Dios. Mi jun ok qʼonte tbʼi Dios, ax jaw jyonte tbʼi. In tzaj tqʼamaʼn Jehová jlu: «Atzun nbʼiye jlu te jumajx, [...] ex kukx ktzajel naʼn kyuj kykyaqil tabʼqʼiyil» (Éxodo 3:15). Mas nim maj in najbʼen tbʼi Dios toj Xjan Uʼj twitz alkyexku juntl título, ik tzeʼn Nimxix tipumal, Tat, Qajaw moqa Dios ex mas twitz alkyexku jun bʼibʼaj, ik tzeʼn Abrahán, Moisés, David moqa Jesús. Taj Jehová tuʼn tel qnikʼ tiʼj tbʼi. In tzaj tqʼamaʼn Tyol Dios jlu: «E tel kynikʼ tiʼj qa oʼkx aya Mambʼaj, ex oʼkx aya Dios [Jehová, TNM] Maʼxix Toklen tibʼaj tkyaqil twitz txʼotxʼ» (Salmo 83:18).

Nim toklen toj twitz Jesús. Toj naʼj Dios kyaj t-xnaqʼtzaʼn Jesús, xi tqʼamaʼn kye t-xnaqʼtzbʼen tuʼn kynaʼn Dios kyukʼil yol lu: «Tenwt tchiylal tbʼiya qeye» (Mateo 6:9). Ax Jesús xi qʼamante jlu te Jehová toj naʼj Dios: «Tat, nimsaʼnktz tbʼiya» (Juan 12:28). Nim toklen toj twitz Jesús aju tuʼn tjaw nimset tbʼi Dios. Tuʼntzunju tqʼama jlu: «O txi nyekʼune aju tbʼiya kye ex kukx kxel nyekʼune» (Juan 17:26, TNM).

Nim toklen te kye qeju ojtzqiʼn Dios kyuʼn. Qʼuqli kykʼuʼj tmajen Dios toj ambʼil ojtxe qa oʼkx tuʼn tbʼi jaku che klet ex jaku che ok xqʼuqin. Jun kyxol  xjal lu tqʼama: «Iky tbʼi Qman Dyos [Jehová, TNM] kseʼn jun ja nimin tweʼ ex kuw janche ponaʼ tnikʼalkyiʼj klolkyibʼ» (Proverbios 18:10, XT). Ex juntl tqʼama jlu: «Kykyaqil qeju in che kubʼsan twitz Qman [Jehová, TNM] che kletel» (Joel 2:32). In tzaj tqʼamaʼn Tyol Dios qa kʼelel nikʼbʼaj kyiʼj tmajen noq tuʼn tbʼi. «Maske in che niman qe mastl tnam kye qe kydios, atzun qe, te jumajx qo nimal te Qman [Jehová, TNM] aju Qdios» (Miqueas 4:5; Hechos 15:14).

In tzaj tyekʼin qa mintiʼ juntl ik tzeʼn Jehová. Nim qe xjal at kynabʼil in mojeʼ kyyol qa aju t-xilen bʼibʼaj Jehová, «A in Nok te Tkyaqil». Aju alkye tten xi yolin Jehová te Moisés in tzaj tyekʼin tiʼ t-xilen tbʼi. Tqʼama jlu: «Aqine aju ax qine» (Éxodo 3:14). Tuʼntzunju, in tzaj tyekʼin tbʼi qa a Bʼinchal tkyaqil. Ax ikx in tzaj t-xnaqʼtzaʼn qe qa jaku bʼant tuʼn moqa jaku che ajbʼen qe tbʼinchbʼen tuʼn tuʼntzun tjapun twiʼ t-ximbʼetz. Maske in tzaj yekʼin toklen kyuʼn título, ik tzeʼn tipumal, oʼkx tbʼi Jehová in tzaj tyekʼin tzeʼnxix te ex jaku bʼant tkyaqil tuʼn.

In tzaj tyekʼin qa in ximen Dios qiʼj. Aju t-xilen tbʼi Dios in tzaj tyekʼin aju tkʼujlabʼil at kyiʼj kykyaqil tbʼinchbʼen, axpe ikx qiʼj. Tuʼnju in tzaj tqʼamaʼn qe alkye tbʼi, in tzaj tyekʼin qa taj tuʼn tok qojtzqiʼn. Ax ikx, ax kubʼ ximente tuʼn ttzaj tqʼamaʼn tbʼi tej naʼmxtoq t-xi qqanin te. In tzaj tyekʼin jlu qa nya taj Dios tuʼn tkubʼ qximen qa mlay tzʼel qnikʼ tiʼj moqa najchaq taʼ, sino ax tok at ex jaku qo ok laqʼeʼ ttxlaj (Salmo 73:28).

Aj tajbʼen tbʼi quʼn in kubʼ qyekʼin qa in qo ximen tiʼj. Qo ximen tiʼj qa taja tzʼok tamiwin tibʼa tukʼil jun xjal ex in xi tqʼamaʼna te tuʼn tajbʼen tbʼiya tuʼn. ¿Tiʼ jaku tnaʼya qa nya taj tuʼn tajbʼen tbʼiya tuʼn? Bʼalo jaku kubʼ t-xjelina qa nya taj xjal tuʼn tok te tamiwoya. Axtzunju in bʼaj tukʼil Jehová, o tzaj tqʼamaʼn qe alkye tbʼi ex taj tuʼn tajbʼen quʼn. Qa ma bʼant quʼn, in kubʼ qyekʼin qa qaj tuʼn qok laqʼeʼ ttxlaj. In tzaj tqʼamaʼn Tyol Dios qa ojtzqiʼn tuʼn Jehová alkyeqe in che ximen tiʼj tbʼi (Malaquías 3:16).

Nim toklen tuʼn tel qnikʼ tiʼj alkye tbʼi Dios tuʼntzun t-xi tzyet tuʼn tok qojtzqiʼn. Pero nya oʼkx jlu kʼelel qnikʼ tiʼj. Il tiʼj tuʼn tok qojtzqiʼn alkye qʼil bʼibʼaj lu ex tuʼn tok qojtzqiʼn alkyeqe tmod.