Tyina uhanda okunoñgonoka omunthu umwe, otyipuka tyo tete ulinga okumupula okuti: “Ove utiwa olie?” Iya pahe inkha ñgeno epulo olio ulilinga Huku, ngwe mekukumbulula ñgeni?

“Ame, ame Siovaa. Eli olio enyina liange.” — Isaías 42:8.

Ku Huku enyina liae liakolela. Petupu omunthu waluka Huku. Oe muene weliluka. Siovaa wati: “Eli, olio enyina liange apeho. Kenyina eli oko ndyikahinangelelwa novanthu aveho.” (Êxodo 3:15) Mombimbiliya enyina lya Huku limoneka-mo vali unene tyipona omanyina ae omunkhima ngetyi, Omukulami, Tate, Tatekulu, ine Huku. Iya limoneka-mo vali unene tyipona omanyina ovo Abraiau, na Moisesi, na David, ine Sesusi. Tupu, Siovaa uhanda enyina olio linoñgonokwe. Ombimbiliya yati: “Opo ovanthu vanoñgonoke okuti ove, utiwa Siovaa, ove vala Omukulami kombanda yohi aiho.” — Salmo 83:18.

Ku Sesusi enyina lya Huku liakolela. Sesusi etyi alongesa ovalongwa vae okulikuambela ku Huku, elikuambelo liiwe okuti Tate yetu, ine Elikuambelo lya Tatekulu wati: “Enyina liove lisukukiswe.” (Mateusi 6:9) Sesusi nae welikuambelele ku Huku okuti: “Tate nkhimaneka enyina liove.” (Suau 12:28) Otyipuka Sesusi apaka pomphangu yotete okunkhimaneka enyina lya Huku, iya mokonda yotyo ngwe welikuambelele okuti: “nevenoñgonokesa enyina liove, iya mandyitualako okulinoñgonokesa.” — Suau 17:26.

Vana vei Huku vesuka nenyina liae: Ovanthu va Huku kohale vankhimanekele Huku mokonda oe uveyakulila tupu oe uveyovola. ‘Enyina lya Siovaa otyiholamo tyapama. Omuviuki omo ahatekela iya aamenwa.’ (Provérbios 18:10) “Una  wihana enyina lya Siovaa makayovoka.” (Joel 2:32) Ombimbiliya ilekesa okuti enyina lya Huku olio malikuatesako okupunga vana vemufenda. Yati: “Mokonda ovanthu aveho, mavaendela kese umwe menyina lya huku yavo. Mahi onthue, matuendela menyina lya Siovaa, Huku yetu apeho, apeho.” — Miquéias 4:5; Ovilinga 15:14.

Enyina lya Huku lielikalela. Ovanongo vamwe vapopia okuti enyina Siovaa lihangununa okuti “Ngwe Ukala Etyi Ahanda Okukala.” Siovaa Huku wapopile etyi tyihangununa enyina liae monondaka apopilile Moisesi etyi ati: “Ame Mandyikala Etyi Nahanda Okukala.” (Êxodo 3:14) Enyina lya Huku kalipopi vala okuti oe Mutungi wovipuka aviho vikahi-ko. Mahi tupu enyina liae lihangununa ounongo ena no wovipuka atunga, opo afuisepo kese tyipuka ahanda okulinga. Omanyina omakuavo omunkhima Huku ena, apopia otyilinga ena, noutumini wae, ine epondolo liae. Mahi enyina liae Siovaa, olio vala lihangununa etyi ekahi netyi meya okulinga.

Enyina lya Huku lihangununa okuti wesuka nonthue. Enyina lya Huku lilekesa okuti ngwe wesuka novipuka atunga okukutikinyamo onthue. Tupu, mokonda Huku utupopila enyina liae, otyo tyilekesa okuti ngwe uhanda tumunoñgonoke. Tyehe-otyo vala, oe muene wetupopila enyina liae mahi onthue katuemupulile. Tyimoneka nawa okuti, Huku kahande tumutale vala ngotyikahuku, mahi ngwe uhanda tumutale ngatyina Omunthu wotyotyili, akala epanga lietu. — Salmo 73:28.

Tyina tutumbula enyina lya Huku tulekesa okuti tuesuka nae. Mongeleka, omunthu una wii okuti epanga liove umupopila atumbule enyina liove. Mahi oñgeni mokala inkha kahande okutumbula enyina liove? Mokutala mohimbika okulipula inkha omunthu oo uhanda umwe okukala epanga liove. Otyo tyelifwa nenyina lya Huku. Siovaa wetupopila enyina liae, iya utuavela ondundo tulitumbule. Tupu, weete Vana vasoka ine vapaka nawa enyina liae. — Malaquias 3:16.

Okunoñgonoka enyina lya Huku otyipuka tyo tete tupondola okulinga opo tumunoñgonoke. Mahi katupondola okuhikila vala opo. Tuesukisa okumunoñgonoka vali nawa etyi atuwa. Nokunoñgonoka etyi ngwe ekahi.