Okathi ninsuwela ahu saana mikhalelo sa mutthu, ninnimusuwela saana mutthu owo. Moolikanasa vaavo hiyo ninsuwela ahu saana mikhalelo sa Muluku, eyo enninikhaliherya osuwela itthu sinimusivela, nave waataana wahu pooti olipaka. Muluku ookhalana mikhalelo mixexe sookuxa murima, eyo piiyo, owerya, ankhili, exariya ni ophenta.

“Xontte, Apwiya Muluku! Ti nyuwo mpattunxe erimu n’ilapo ya vathí n’uwerya wanyu wulupale n’ikuru sanyu”.​—YEREMIYA 32:17.

Soopattuxiwa sinnooniherya owerya wa Muluku. Mwa ntakiheryo, okathi muneetta anyu nihiku na nsuwa noovihexa, erutthu anyu enikhala sai? Tthiri munnoona oviha, khahiyo siiso? Eniwiirihani woona oviha mwaha wa yookhumelela ya owerya wa mpattuxa ahu, Yehova. Tthiri nsuwa ti nooviha vanceene. Epantte aya ya eriyari yeeyo eniitthaniwa (núcleo), oviha waya ti wa 27.000.000 graus centígrados. Khula esegundo, nsuwa ninnikumiherya oviha onlikana ni ophuwa wa ibomba nuclear imilyau sinceene.

Hata vari siiso, nsuwa ti nooyeva vanceene nalikanyiherya ni itheneeri sinceene sikhanle. Masientista anikupali wira etheneeri emosa yootepa wunnuwa eniitthaniwa UY Scuti, munnuwelo aya onoolikana ni otakaaha nsuwa ikwaha soowiiraka 1.700. Vaakhanle wira etheneeri eyo yaampwehiwa opuro ori nsuwa, yaamukhuneela elapo yotheene mpakha mapuro enrukurerya aya eplaneta Júpiter. Woonasa wene eyo enninikhaliherya wiiwexexa saana moolumo a Yeremiya yaawo aahimmye awe wira Yehova oopaka erimu ni elapo ni owerya wawe.

 Owerya wa Muluku onniphwanyiha sai mureerelo? Okumi ahu onlipa ni soopattuxiwa sa Muluku, sintoko nsuwa, itthu sotheene sooreera siri valaponi. Nave Muluku onnirumeela owerya wawe wira omphwanyihe mureerelo khula mutthu. Moota xeeni? Eseekulu yoopacerya, Muluku aahinvaha owerya Yesu woopaka miteko sooreera mwa miiriirya. Ninsoma so: “Alipa-òhona, vano annòna; alipa-òrakala, annetta orattene; anamakuttula annirerihiwa; alipa-òhìwa, vano annìwa; atthu akhwiye annihihimuwa. (Matheyo 11:5) Ankhi olelo-va? Biibiliya onihimya so: “Awo anninvaha ekumi mutthu okhulumunwe”. Nave onnincererya ohimyaka so: “Ale anlipa n’Apwiya [Yehova] ikuru saya sinninjerereya”. (Yesaya 40:29, 31) Muluku onniwerya onivaha ikuru sinceene wira onikhaliherye ovilela mixankiho sa mookumini mwahu. (2 aKorinto 4:7) Tthiri munnikupali wira otheene ahu ninniphavela waataana saana ni Muluku yoowo onnithokorerya ni onirumeela owerya wawe wira onikhaliherye okathi wa mixankiho.

“Apwiya! [Yehova] Miteko sanyu ti sowatta! Elapo yosareya itthu sipattuxalyanyu: nyuwo mopaka sothene seiyo n’ankhili”.​—ESALIMO 104:24.

Vakhala wira nnimwiixutta itthu sinceene Muluku onipaka awe, tthiri nnooweha wira ookhalana ankhili. Yookhala esiensia eniitthaniwa biomimética, wala biomímica, yeeyo masientista anitokosa aya soopattuxiwa sa Yehova ni enatakiha makhalelo a soopattuxiwa iyo okathi anipaka aya itthu. Okhuma itthu saamukhaani paahi awo anniwerya opaka itthu suulupale ntoko eviyau.

Ankhili a Muluku annooneya ni moota opattunxe awe erutthu ya apinaatamu mootikiniha. Nrowe nithokorerye moota onipakeya awe mwaana. Owo onipacerya opakeya mwaha wa eseelula enikhumelela mwerutthuni mwa muthiyana nuumala orupa ni mulopwana. Eseelula eyo ennikhalana makhalelo otheene a genética a mwaana owo ni ennikawanyeya nto sinakhumelela iseelula sinceene. Mwa okathi vakhaani paahi, iseelula iyo sinnipacerya okhalana mikhalelo soovirikana, nto eyo ennikumiherya iseelula soovirikana, sintoko iseelula sa ephome, sistema nervoso ni iseelula sa nikhuva. Moohipisa sinnipacerya okhumelela ipantte sa erutthu ni ovara muteko aya. Muhina mwa myeeri 9 eseelula ele yoopacerya ennipakeya iseelula sinceene ni ennikhumelela erutthu ya mutthu, erina iseelula ibilyau sinceene. Itthu iyo sootikiniha sinniwiiriha anamunceene okupali moolumo ari mBiibiliyani anihimya so: “Kinnoxukhuruni, mana mukùmpe votikiniha”.​—Esalimo 139:14.

Ankhili a Muluku anniphwanyiha sai mureerelo? Muluku onnisuwela itthu sinnihakalaliha. Aarumeelaka ankhili awe, owo onninivaha miruku soovareleya muteko siri mBiibiliyani. Mwa ntakiheryo, owo onnileela so: “Mulevelelaneke imara sothene muntthekelananyu”. (aKolosi 3:13) Niireke miruku iya khahiyo sooreera? Aayo ti sooreera. Sootokosa sipakiwe ni mameediku sinooniherya wira olevelela onnikhaliherya orupa saana ni onnikhaliherya ephome weetta saana. Eyo pooti omukhaliherya mutthu ohiphwanya oretta wa oriipiwa  murima ni iretta sikina. Muluku onlikana ni mpatthani oophenta yoowo okathi wotheene onnivaha miruku soovareleya muteko. (2 Timótheyo 3:16, 17) Niireke munniphavela okhalana mpatthani siisa?

‘Yehova onnitthuna [wala onniphenta] exariya’.​—ESALIMO 37:28, BIBLYA EXIRIMA.

Okathi wotheene Yehova onivara itthu sooloka, maana “Muluku khivo yotakhala enìrawe: Nanwerya sothene khanttheka”. (Yobi 34:10) Maphukelo awe ta xariya, sintoko aahimmye awe nasalimo wira “nyuwo munnalamula atthu n’ixariya”. (Esalimo 67:5) Okhala wira Yehova “oniweha murima”, owo khonootothiwa ni olavilavi, masi okathi wotheene onnisuwela ekeekhai ni onnipaka maphukelo ooloka. (1 Samuweli 16:7) Nave owo onnoona ohixariya ni ohaaxana oniiraneya valaponi ni ooleiherya wira “atthu òtakhala murima anopwetexiwa”.​—Miruku 2:22, Biblia Solempwa sa Muluku.

Hata vari siiso Muluku khahiyo mphuki ootakhala yoowo oomusivela ohukhumu. Muluku onnooniherya omoriwa ikharari vaatthuneyaka. Biibiliya onihimya wira Yehova ‘onnimmorela ikharari’, hata natampi onittharuwa mwekeekhai. Nto eyo khahiyo etthu ya xariya?​—Esalimo 103:8; 2 Pedru 3:9.

Exariya ya Yehova enniphwanyiha sai mureerelo? Murummwa Pedru aalavunle so: “Muluku khanathanla atthu: Tthiri Muluku onnaphenta atthu a nloko ti nloko, yale animuttittimiha, enettela exariya”. (Miteko 10:34, 35) Exariya ya Muluku enniniphwanyiha mureerelo maana Muluku khorina nthalu wala khoneemya makhwankwa. Nihaana wataana nuuwo ni okhala arumeyi awe, moohicala nikhuli nahu, elapo, isomelo sahu, aahiiso mihakhu nirina ahu.

Okhala wira Muluku oniphavela wira niiwexexeke ni ottottela mureerelo exariya awe, owo oonivaha yowuupuxerya ya murima. Soolempwa sinnilikanyiherya yowuupuxerya ya murima ni ikano “silempwe mmurimani mwahu” seiyo sinniiriha  otteeliwa murima okathi nimpaka ahu itthu sooreera. (aRoma 2:15) Ninttottela sai mureerelo? Wiixuttiha saana yowuupuxerya ya murima ahu pooti onikhaliherya okhootta opaka itthu soohiloka wala soohixariya. Nave akhala wira nnoopaka etthu yoohiloka, yowuupuxerya ahu ya murima enoonikhaliherya ottharuwa ni olokiherya mweettelo ahu. Wiiwexexa exariya ya Muluku onninikhaliherya omwaattamela yena!

“Muluku ophentá”.​—1 YOHANI 4:8.

Ekeekhai wira Muluku onnooniherya owerya wawe, osuwela, ni exariya, masi Biibiliya khonihimya wira Muluku owerya, ankhili, wala exariya. Owo onihimya wira Muluku ophenta. Mwaha wa xeeni? Mwaha woowi vaarowa ohimmwaka wira owerya wawe tonimukhaliherya opaka itthu ni exariya nave ankhili awe taneettiha enamuna enipaka awe itthu. Eyo khahiyo ekeekhai, maana ophenta wawe tonimwiiriha opaka itthu. Ophenta tonimwiiriha opaka khula etthu.

Nnaamwi Yehova orina ene itthu sotheene, ophenta wawe woomwiiriha opaka soopattuxiwa sa miruku wiirimu ni sa valaponi seiyo sinittottela mureerelo ophenta iwo. Owo aahilokiherya elapo wira ekhaliweke ni apinaatamu. Nave onnivikaniha owooniherya niphento atthu otheene okhala wira ‘onnakumiherya nsuwa atthu òtakhala murima vamosá n’ale òrera murima: onnarupihela epula anaxariya vamosà n’alipa òttheka’.​—Matheyo 5:45.

Nave Yehova “Muluku t’òkhupanyerya ni t’òsareya othunku”. (Yakobo 5:11) Owo onnaareerela murima atthu aniimananiha omusuwela ni omwaattamela. Muluku onnimuthokorerya khula mutthu. Tthiri “owo onnokhapelelani”.​—1 Pedru 5:7.

Ophenta wa Muluku onniphwanyiha sai mureerelo? Ninnihakalala oweha nsuwa. Ninnisiveliwa nanwehaka mwaana otheyaka. Ninnittottela mureerelo niphento na amusi ahu. Iyo khahiyo itthu sootthuneyexa, masi sinninihakalaliha.

Enamuna ekina ninttottela ahu mureerelo ophenta wa Muluku ti: ovekela. Biibiliya onnitumererya so: “Muhivelavelé mwaha w’etthu p’itthu. Masi okathi wothene, mmulompeke Muluku, munvekelaka itthu simphavelanyu”. Ntoko Tiithi oophenta, Muluku oniphavela wira ninvekeleke nikhaliheryo ni murima ahu wotheene. Yehova ni ophenta wawe wekeekhai, ooleiherya onivaha “murettele wa Muluku, murettele munjene mutthu ohinweryawe osuwela”.​—aFilipi 4:6, 7, Biblia Solempwa sa Muluku.

Mwaha ola noothokorerya mikhalelo sa Muluku ntoko: owerya wawe, ankhili, exariya, ni ophenta. Niireke mooweha saana itthu sinimusivela Muluku? Wira muncererye osiveliwa wanyu ni Muluku, ninnoolattulani wiixutta itthu Muluku opanke awe mwa mureerelo anyu.