Asa takkas tatanda sasahalak, ikkon taboto do akka aha naung diulahon ibana dohot na hea diadopi ibana. Dos songon i ma, asa takkas tatanda Debata ikkon taboto do akka aha naung diulahon Ibana. Dung i, gabe taboto ma godang do hape akka na denggan naung diulahon Debata di tikki naung salpu na bermanfaat tu hita saonari dohot tu ari na naeng ro.

Debata Jahowa do Sitoppa sude na adong di alam semesta on. Alani i, boi do taboto “akka pangalahona molo taparsiajari songon dia portibi on ditoppa. Boi do taboto aha na dihalomohon rohana molo taparsiajari akka na dibahen Ibana”. (Rom 1:20) Jala “Ibana do na manoppa tano on marhite huasona. Ibana do na mambahen tano on gabe subur marhite hapistaranna. Jala Ibana do na pahembangkon langit marhite habisukonna.” (Jeremia 10:12) Molo taida toppaanna na massai uli, boi ma taboto na parduli do Debata tu hita.

Istimewa do jolma ditoppa Debata. Alana ditoppa do hita “tudos songon Ibana”. (1 Musa 1:27) Alani i, boi do tatiru akka sifat ni Debata. Dilehon Debata do muse tu hita kesanggupan lao mangattusi pikiran dohot perasaan ni Debata. Molo berupaya hita lao maniru cara marpikkir ni Debata, gabe las ma rohatta jala martujuan ma ngolutta. Na rumikkot, dibahen Debata do hita boi marale-ale tu Ibana.

Molo taida akka toppaan ni Debata na adong di tano on, boi ma taboto songon dia perasaan ni Debata tu hita. Didok Apostel Paulus do, ‘Sai dipatuduhon Debata do ise Ibana marhite akka ulaonna na denggan. Dilehon do tu hita udan dohot musim panen. Diparade Ibana do sipanganon asa puas hita jala asa las rohatta.’ (Ulaon ni Apostel 14:17) Dang holan na tahaporluhon na dilehon Debata tu hita. Godang jala marragam do akka toppaan dibahen Ibana asa boi las rohatta. Alai, adong do muse na ummarga na diparade Ibana tu hita.

 Ditoppa Jahowa pe tano on asa boi do jolma mangolu saleleng-lelengna disi. Didok do di Bibel, “Anggo tano on nungnga dilehon Ibana tu jolma,” jala “dang na lao marisuang i ditoppa Ibana, alai ditoppa do i lao diingani”. (Psalmen 115:16; Jesaya 45:18)Akka ise do na lao mangingani i jala sadia leleng? Didok di Bibel, “Lehononna do tano on gabe parbagianan ni halak na tigor marroha. Jala mangolu ma nasida disi saleleng ni lelengna.”—Psalmen 37:29.

Ditoppa Jahowa ma jolma na parjolo, i ma si Adam dohot si Hawa. Dibahen ma nasida di Paradeiso di tano on asa boi “mangula jala mangurus” i. (1 Musa 2:8, 15) Dilehon Debata do dua tugas tu nasida. Didok do, “Marpinoppari ma hamu asa lam godang hamu. Gohi hamu ma tano on jala rajai ma i.” (1 Musa 1:28) Jadi boi do nasida mangolu saleleng ni lelengna di tano on. Alai, dang dioloi nasida Debata. Jadi dang boi be nasida didok “halak na tigor marroha”, jala dang boi be nasida ‘mangolu disi saleleng ni lelengna’. Nang pe songon i, dang gabe muba sakkap ni Debata tu tano on. Saonari, tabahas ma aha do muse na diulahon Debata.

Hata ni Debata do sude na adong di Bibel. Boasa ma dilehon Debata Bibel tu hita? Asa boi takkas tatanda Ibana. (Poda 2:1-5) Memang, dang boi Bibel manang buku na asing mangalusi sude sukkun-sukkun taringot Debata. (Parjamita 3:11) Alai molo tajaha Bibel, boi ma gabe lam tatanda Ibana. Misalna molo tajaha akka aha naung dibahen Debata tu jolma, gabe taboto ma songon dia sifatna. Taboto ma akka halak na songon dia do na mambahen las rohana jala na mambahen sogo rohana. (Psalmen 15:1-5) Taboto ma muse ikkon songon dia caratta manomba Ibana, ikkon songon dia pangalahotta, jala ikkon songon dia pandanganta taringot arta. Asing ni i, molo tajaha hata ni Jesus di Bibel dohot sude na diulahon ibana, gabe lam takkas ma muse taboto songon dia sifat ni Debata.—Johannes 14:9.

Dilehon Jahowa do Bibel asa taboto songon dia carana marlas ni roha jala martujuan ngolutta. Marhite Bibel dipaboa Jahowa do tu hita songon dia carana asa marlas ni roha hita di keluargatta, songon dia carana asa boi merasa puas, jala songon dia carana asa dang pamarsakhu hita. Songon na lao dibahas di artikel na mangihut, boi do muse Bibel mangalusi sukkun-sukkun na rikkot taringot hangoluan. Misalna, boasa godang hasusaan? Aha do na lao masa di ari na naeng ro? Dipaboa do muse di Bibel akka aha do naung diulahon Debata lao pasautton tujuanna manoppa tano on.

Buku na istimewa do Bibel. Adong 40 bawa na manurat Bibel jala disurat do i lobi sian 1.600 taon. Alai sadalan do sude isina jala sarupa temana. Boasa boi songon i? Ala Debata do pangarangna. (2 Timoteus 3:16) Dang sarupa Bibel songon buku sejarah. Nang pe nungnga martaon-taon naung salpu Bibel disurat, dang muba isina. Boi do taida i sian akka salinan isi ni Bibel na dibahen marratus taon na salpu. Najolo, godang do halak na mangorai Bibel diterjemahon, dibagihon, jala dijaha akka halak. Alai sahat tu saonari, Bibel do bukku na unggodang dicetak jala diterjemahon di liat portibi on. Jadi sian on taboto ma, tutu do Bibel i hata ni Debata na ‘martahan ro di saleleng ni lelengna’.—Jesaya 40:8.

Adong do na diulahon Debata na boi gabe jaminan na ikkon saut do sakkapna. Songon naung taboto, lomo do roha ni Debata asa mangolu saleleng ni lelengna jolma di tano on. Alai ala dang dioloi si Adam Debata, gabe mardosa ma ibana. Dang boi be ibana mangolu saleleng-lelengna, songon i nang akka pinopparna. Bibel mandok, “Masuk do dosa i tu portibi on marhite sada jolma jala dosa i parohon hamatean. Nungnga rarat hamatean i tu sude jolma, ala nungnga mardosa sude jolma.” (Rom 5:12) Alani i, gabe hira na sundat ma sakkap ni Debata. Aha ma na diulahon Debata?

Manang aha pe na diulahon Jahowa, toktong do dipatudu Ibana akka sifatna na denggan i. Dihukum Jahowa ma si Adam dohot si Hawa, on patuduhon na tigor do Ibana. Alai dilehon Ibana do  harapan tu pinoppar ni nasida, on patuduhon na parholong do Ibana. Jala dipatudu Jahowa do na marbisuk Ibana. Alana pittor dipaboa Jahowa do jalan keluar ni masalah on. (1 Musa 3:15) Dilehon Ibana ma Jesus Kristus na boi paluahon jolma sian dosa dohot hamatean. Songon dia ma carana?

Disuru Jahowa ma Jesus tu tano on lao mangajari akka halak jala “mangalehon ngoluna lao manobus godang jolma”. a (Mateus 20:28; Johannes 14:6) Boi do Jesus manobus hita ala sempurna do ibana songon si Adam. Alai dang sarupa Jesus songon si Adam na mangalo tu Debata. Toktong do dioloi Jesus Debata sahat tu na mate. Dung i dipahehe Jahowa ma Jesus lao mangolu di surgo. Alani i gabe adong ma harapan tu akka halak na tigor marroha lao mangolu saleleng ni lelengna. On ma na so boi bahenon ni si Adam. Bibel mandok, “Alani sahalak jolma na so mangoloi, gabe godang ma jolma mardosa. Suang songon i ma, ala mangoloi do sahalak jolma, boi ma godang halak didok mangulahon na sittong.” (Rom 5:19) Tobusan ni Jesus ma na gabe jaminan pasti saut do sakkap ni Debata tu jolma.

Sian cara ni Jahowa mangadopi parsoalan na dibahen si Adam, gabe lam godang ma na taboto taringot Ibana. Gabe taboto ma dang adong na boi manundati sakkap ni Debata. Pasti “marhasil” do sude na didok Ibana. (Jesaya 55:11) Mandok mauliate do hita tu Jahowa ala massai holong do rohana tu hita. Didok Bibel, “Marhite on do Debata patuduhon holongna tu hita: Disuru Ibana do Anakna na sasada i tu portibi on asa boi hita mandapot hangoluan marhite ibana. On do holong i: Disuru Debata do Anakna i gabe pelean pardamean tu akka dosatta, dang alani na tahaholongi Debata, alai alani holongna do tu hita.”—1 Johannes 4:9, 10.

Bibel mandok, “Dang diabbati Debata Anakna i manaon sitaonon, alai dipasahat Ibana do Anakna i lao dipamate humokkop hita.” Alani i gabe pos do rohatta pasti lehonon ni Debata do muse “sude na asing i”, naung dijanjihon Ibana tu hita. (Rom 8:32) Aha ma i? Lao taida ma i di artikel na mangihut.