Kun gusto mong mas mamidbid an saro, makakatabang kun aaramon mo an mga bagay na ginibo niya asin an mga kasakitan na napangganahan niya. Siring man, kun gusto mong mas mamidbid an Diyos, kaipuhan mong maaraman kun ano an mga ginibo niya. Sa paggibo mo kaiyan, tibaad masurpresa ka pag naaraman mo na huli sa mga ginibo niya kaidto, nakikinabang kita ngunyan asin nagin posible an sarong magayon na puturo.

An Diyos na Jehova iyo an Kahuruhalangkawing Kaglalang, asin an saiyang “dai nahihiling na mga karakteristiko . . . malinaw na nahihiling puon pa sa paglalang kan kinaban, dahil namamansayan an mga iyan paagi sa mga bagay na linalang.” (Roma 1:20) ‘Ginibo nin Kagurangnan an daga huli kan saiyang kapangyarihan, huli kan saiyang kadunungan linalang niya an kinaban, asin huli kan saiyang pakasabot biniklad niya an kalangitan.’ (Jeremias 10:12, BPV *) Mahihiling man sa kahanga-hangang mga linalang na interesado sa sato an Diyos.

Pag-isipan kun paano ni Jehova ginibong espesyal an satong buhay paagi sa paglalang niya sa mga tawo ‘siring sa ladawan niya.’ (Genesis 1:27) Buot sabihon, pinagin posible niya na maipahiling ta sa sadit na paagi an saiyang daing kaagid na mga kuwalidad. Tinawan niya kita nin kakayahan na masabutan an saiyang pagmansay asin mga pamantayan. Mantang hinihinguwa niyatong mamuhay kauyon digdi, nagigin mas maugma asin makahulugan an satong buhay. Urog pa diyan, tinawan niya kita nin pagkakataon na magkaigwa nin dayupot na relasyon sa saiya.

An pagkalalang nin Diyos sa daga ebidensiya na mahalaga kita sa saiya. Sinabi ni apostol Pablo na an Diyos “padagos [na] nagwalat nin patotoo manungod sa kun siisay siya paagi sa paggibo niya nin karahayan, na tinatawan [kita] nin uran hali sa langit saka nin abundang ani, asin tinatawan [kita] nin igong kakanon saka pinapano nin kaugmahan an [satong] mga puso.” (Gibo 14:17) Sinusteniran kita nin Diyos nin labi pa sa mga kaipuhan ta para mabuhay. Naglalang siya nin dakul asin manlain-lain na bagay para mas ikaugma ta an buhay. An gabos na bagay na ini patanaw sana sa mga gigibuhon niya para sa sato.

Linalang ni Jehova an daga tanganing an mga tawo mabuhay sagkod lamang diyan. An Bibliya nagsasabi: ‘Itinao niya an daga sa mga aki nin mga tawo,’ asin ‘dai niya iyan linalang na daing kapakanan, linalang  niya iyan tanganing istaran.’ (Salmo 115:16; Isaias 45:18) Sairisay an maistar asin gurano kahaloy? ‘Masasadirihan kan mga matanos an daga asin mag-iirok sinda diyan sagkod lamang.’—Salmo 37:29, BPV.

Linalang ni Jehova an inot na lalaki asin babayi, si Adan saka si Eva, asin pinaistar sinda sa sarong paraisong daga ‘tanganing [kultibaron] asin atamanon’ iyan. (Genesis 2:8, 15) Tinawan sinda nin Diyos nin duwang nakakaugmang asignasyon: ‘Pangagbunga asin pangagdakul kamo, asin panuon nindo an daga asin sakupon nindo iyan.’ (Genesis 1:28) Kaya igwa kuta si Adan asin Eva kan paglaom na mabuhay nin daing sagkod sa daga. Makamumundo, pinili nindang sumuway sa Diyos asin huli kaiyan naiwara ninda an oportunidad na mapabilang sa ‘mga matanos na makakasadiri kan daga.’ Pero, arog kan maaaraman niyato, dai nagin dahilan an ginibo ninda para baguhon ni Jehova an katuyuhan niya para sa sato o sa daga. Pag-ulayan ta nguna an sarong bagay na ginibo nin Diyos.

An Bibliya inaapod man na Tataramon nin Diyos. Taano ta itinao sa sato ni Jehova an Bibliya? Panginot na para makanuod kita dapit sa saiya. (Talinhaga 2:1-5) Totoo, dai man sinisimbag kan Bibliya an gabos na posibleng hapot ta manungod sa Diyos—mayo nin libro na makakagibo kaiyan. (Parahulit 3:11) Pero an gabos na mababasa ta sa Bibliya makakatabang sa sato na mamidbid an Diyos. Mamimidbid ta siya paagi sa kun paano niya trinatar an mga tawo. Maaaraman ta kun anong klase nin mga tawo an inuuyunan niya saka dai inuuyunan. (Salmo 15:1-5) Maaaraman ta an pagmansay niya dapit sa pagsamba, moralidad, asin materyal na mga bagay. Siring man, ihinahayag sa sato kan Bibliya an pinakamalinaw na paglaladawan kan personalidad ni Jehova paagi sa mga sinabi asin ginibo kan saiyang Aki, si Jesu-Cristo.—Juan 14:9.

May saro pang dahilan kaya itinao ni Jehova an saiyang Tataramon, an Bibliya—tanganing maaraman niyato kun paano magigin maugma asin makahulugan an satong buhay. Paagi sa Bibliya, sinasabi sa sato ni Jehova kun paano magkakaigwa nin maugmang pamilya, kun paano magigin kontento, asin kun paano makakayanan an mga kahaditan. Asin arog kan ipapaliwanag sa magasin na ini, sinisimbag kan Bibliya an importanteng mga hapot sa buhay, arog kan: Taano ta grabe an pagsakit? Ano an nakatagama sa maabot? Ipinapaliwanag man kaiyan kun ano an ginibo nin Diyos tanganing masigurado na mauutob an saiyang orihinal na katuyuhan.

Sa dakul na paagi, an Bibliya saro nanggad na pambihirang libro na an awtor mayong iba kundi an Diyos. Isinurat iyan sa laog nin labing 1,600 na taon nin mga 40 lalaki, alagad saro sana an panginot na tema kaiyan huling an Diyos an talagang Awtor kaiyan. (2 Timoteo 3:16) Bakong arog kan ibang mga isinurat kaidto, naingatan na marhay iyan sa pag-agi nin panahon, na pinapatunayan kan rinibong suanoy na mga manuskrito kan Bibliya. Saro pa, natagalan kan Bibliya an mga paghihinguwa kan iba na ulangon an pagtradusir, pagdistribwir, saka pagbasa kaiyan. Iyan an libro na may pinakamahiwas na distribusyon asin pinakadakul na traduksiyon ngunyan. An padagos na pag-eksister kan Bibliya patunay na ‘an tataramon kan satuyang Diyos nagdadanay sagkod nuarin pa man.’—Isaias 40:8.

An saro pang ginibo nin Diyos iyo na naggibo siya nin espesyal na probisyon para siguraduhon na mauutob an saiyang katuyuhan para sa sato. Arog kan sinambit kasubago, katuyuhan nin Diyos na mabuhay an mga tawo sagkod lamang sa daga. Kaya lang, kan pilion ni Adan na sumuway sa Diyos asin magkasala, naiwara niya an oportunidad na mabuhay nin daing katapusan, bako lang para sa saiya kundi pati man sa mga magigin aki niya. “Paagi sa sarong tawo an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo huling sinda gabos nagkasala.” (Roma 5:12) Huli sa pagsuway ni Adan, garo baga dai na mauutob an katuyuhan nin Diyos. Ano an ginibo ni Jehova?

An mga ginigibo ni Jehova pirming kauyon kan mga kuwalidad niya. Makatanusan niyang pinanimbag si Adan asin Eva sa saindang ginibo, pero huli sa pagkamuot, nagtao siya nin probisyon para sa magigin mga aki ninda. Huli sa saiyang kadunungan,  nakagibo si Jehova nin solusyon kun paano aatubangon an sitwasyon, asin tulos niyang ihinayag iyan. (Genesis 3:15) Makakaligtas an mga tawo sa kasalan asin kagadanan paagi sa Aki nin Diyos, si Jesu-Cristo. Ano an kalabot diyan?

Tanganing matubos an katawuhan sa epekto kan pagrebelde ni Adan, isinugo ni Jehova si Jesus sa daga para itukdo sa mga tawo an dalan pasiring sa buhay asin para “itao an saiyang buhay bilang pantubos na karibay nin dakul.” * (Mateo 20:28; Juan 14:6) Angay si Jesus na magin pantubos huling siya sarong perpektong tawo na kapareho ni Adan. Pero bakong arog ni Adan, nagdanay si Jesus na lubos na makinuyog sagkod sa kagadanan. Huling dai maninigo si Jesus sa kagadanan, binuhay siya ni Jehova asin nagbalik sa langit. Magigibo na ngunyan ni Jesus an dai nagibo ni Adan—tawan an masinunod na mga tawo nin paglaom na buhay na daing katapusan. “Huli ta kun paanong paagi sa pagsuway kan sarong tawo dakul an nagin parakasala, paagi man sa pagsunod kan sarong tawo dakul an magigin matanos.” (Roma 5:19) Paagi sa atang na pantubos ni Jesus, uutubon nin Diyos an saiyang panuga na mabuhay an mga tawo sa daga sagkod lamang.

Dakul kitang nanudan manungod ki Jehova sa nagin paagi niya nin pag-atubang sa mga problemang resulta kan pagsuway ni Adan. Nahiling ta na mayo nin makakaulang ki Jehova sa pagtapos kan saiyang napunan; siguradong magigin mapanggana an ano man na sabihon niya. (Isaias 55:11) Naaraman ta man kun gurano kadakula kan pagkamuot sa sato ni Jehova. “Kun manungod sa sato, an pagkamuot nin Diyos nahayag sa arog kaining paagi: isinugo nin Diyos sa kinaban an Saiyang bugtong na Aki tanganing magkamit kita nin buhay paagi sa saiya. Iyo, nahayag an siring na pagkamuot bako dahil namutan niyato an Diyos kundi dahil namutan niya kita asin itinao niya an saiyang Aki bilang atang para sa satong mga kasalan tanganing makamtan niyato an pabor nin Diyos.”—1 Juan 4:9, 10.

An Diyos ‘dai ngani nag-alangan na itao an sadiri niyang Aki kundi isinakripisyo niya ini para sa sato gabos,’ kaya makakasigurado kita na “may kabuutan man na itatao niya . . . an gabos na iba pang bagay” na ipinanuga niya sa sato. (Roma 8:32) Ano an ipinanuga nin Diyos na gigibuhon niya para sa sato? Aramon ta iyan sa masunod na artikulo.