Adi lebih itandaindu atendu sekalak jelma, perlu tehndu pengalamen geluhna bage pe masalah si pernah iadapina. Adi lebih itandaindu atendu Dibata, arus ka tehndu kai saja si enggo lakokenNa. Melala kel si enggo ilakoken Dibata mbarenda, si e erguna man banta gundari bage pe bas wari si pepagi.

Dibata Jahwe eme Pencipta Si Mulia, janah “sipat-sipatNa si la teridah . . . jelas kap teridah arah ciptanNa.” (Roma 1:20) “Alu kuasaNa, ciptakenNa doni, alu kepentarenNa, banNa taneh si subur, alu pengertinNa, kimbangkenNa langit.” (Jeremia 10:12) Banci ka siidah kekelengenNa arah ciptanNa si luar biasa.

Misalna manusia. Manusia e ciptan Dibata si istimewa perban ibanNa kita “mirip ras Ia.” (Kejadin 1:27) Enda ertina iban Jahwe kita banci ngusih sipat-sipatNa si luar biasa asa ngasupta. Ibere Dibata ka kita kengasupen guna ngangkai cara rukurNa bage pe perentahNa. Adi siusahaken ngusih cara rukur Dibata, siteh kai tujun geluhta janah reh riahna siakap ndalani geluhta. Janah si pentingna, banci kita erteman ras Dibata.

Sanga siperdiateken ciptan Dibata si lit bas doni, banci siteh uga perasan Dibata man banta. Nina Rasul Paulus, ‘Tetap cidahken Dibata diriNa arah perbahanenNa si mehuli. BereNa banta udan, musim rani, puaskenNa kita alu pangan, janah meriah banNa ukurta.’ (Perbahanen Rasul-Rasul 14:17) La tanggung buena si ibereken Dibata man banta, ndauh buen asangken si iperluken kita. LakokenNa bage, gelah meriah ukurta. Tapi situhuna, melala denga si ate Dibata lakokenNa man banta.

 Iciptaken Jahwe doni enda gelah jadi ingan tading manusia seh rasa lalap. Nina Pustaka, “Doni berekenNa man manusia,” janah ‘iciptakenNa labo perban la lit tujunna tapi guna iingani.’ (Masmur 115:16; Jesaya 45:18) Ise nge kari si tading i je? Asa kai dekahna? “Kalak si benar pagi si ndatken doni, ringan ia i je seh rasa lalap.”​—Masmur 37:29.

Mbarenda, iciptaken Jahwe dilaki ras diberu si pertama eme Adam ras Hawa. Tading kalak e bas taman si mejile i doni “guna ngusahai ras ngurus ingan e.” (Kejadin 2:8, 15) Ibereken Dibata dua tugas si istimewa man kalak e: “Ertambah-tambahlah janah reh teremnalah, demilah doni ras kuasailah.” (Kejadin 1:28) Situhuna Adam ras Hawa banci nggeluh ermeriah ukur i doni seh rasa lalap. Tapi sengaja kalak e la patuh man Dibata, emaka la kalak e cocok jadi “kalak si benar” si “ndatken doni.” Amin pe bage, rencana Jahwe kerna manusia ras doni lenga berubah. Sibahas kari e bas artikel seterusna. Gundari, mari sibahas kai deba nari si enggo lakoken Dibata.

Pustaka eme Kata Dibata. Engkai maka ibere Jahwe e banta? Tujun utamana eme gelah banci kita erlajar kerna Ia. (Kuan-kuanen 2:1-5) Memang, la lit buku si banci njawap kerina penungkunen kerna Dibata. (Pengerana 3:11) Tapi, kerina si tertulis bas Pustaka banci nampati kita nandai Dibata. Banci siteh uga sipat Dibata arah caraNa erurusen ras manusia. Banci ka siteh kalak si uga si keleng ateNa ras si lang. (Masmur 15:1-5) Bas Pustaka pe banci sipelajari uga perukuren Jahwe kerna carata nembah Ia, kerna lagu langkah, ras kerna erta. Banci ka jelas siteh sipat-sipat Jahwe arah ranan ras perbahanen AnakNa eme Jesus Kristus.​—Johanes 14:9.

Selain si e, ibereken Jahwe Pustaka gelah kita ermeriah ukur janah siteh tujun geluhta. Arah Pustaka, ikataken Jahwe uga carana gelah keluargata ermeriah ukur, gelah puas geluhta, janah gelah lanai kita kuatir. Bagi si nandangi ibahas bas majalah enda, bas Pustaka lit jawapen kerna penungkunen penting bas kegeluhen, misalna: Engkai maka manusia menderita? Kai nge si terjadi bas masa depan? Bas Pustaka pe ijelasken kai saja si enggo ilakoken Dibata gelah manusia ermeriah ukur i doni, bagi sura-suraNa mbarenda.

Lit ka alasen si deban engkai maka Pustaka buku si seh kel istimewana. Pustaka e itulis lebih 1.600 tahun dekahna janah lit kira-kira 40 dilaki si nulissa. Amin pe bage, sada ngenca tema Pustaka, perban buku e rehna i bas Dibata nari. (2 Timotius 3:16) La bagi tulisen kuno si debanna, isi Pustaka la pernah berubah. Enda terbukti arah ribun manuskrip Pustaka si enggo ndekah. Pustaka pe tetap ertahan amin gia lit si erusaha gelah Pustaka la iterjemahken, isebarken, ras ibaca enterem jelma. Gundari, Pustaka me buku si mbuena kel iterjemahken ras isebarken. Kerina e mbuktiken maka “kata Dibatata tahan rasa lalap.”​—Jesaya 40:8.

Lit ka si ilakoken Dibata man banta. Ipastiken Dibata gelah manusia banci nggeluh rasa lalap i doni bagi sura-suraNa. Bagi si ibahas ndai, ipilih Adam gelah la patuh man Dibata. Erdosa me ia, emaka ia ras keturunenna lanai banci nggeluh rasa lalap. Bagi si ikataken Pustaka, “Dosa masuk ku doni arah sekalak manusia, dosa e maba kematen. Akibatna, kematen enggo ngelangketi kerina manusia sebap kerina manusia enggo erdosa.” (Roma 5:12) Sura-sura Jahwe tempa-tempa enggo gagal. Tapi kai si ilakokenNa?

Kerina si ilakoken Jahwe cocok ras sipat-sipatNa. Terbukti sipatNa si adil sanga ipediatNa Adam ras Hawa ihukum perban kesalahen kalak e. Tapi, Jahwe pe perkeleng sanga iberekenNa arapen man keturunen kalak e. Perban Jahwe pentar, tehNa cara ndungi masalah e janah mis katakenNa keputusenNa. (Kejadin 3:15) IbebaskenNa kita arah dosa ras kematen erkelangken AnakNa, Jesus Kristus. Uga carana?

 Iutus Jahwe me Jesus ku doni guna nuduhken dalan ku kegeluhen janah “mereken kegeluhenna jadi tebusen ras penukar man enterem jelma.” a (Matius 20:28; Johanes 14:6) Banci itebus Jesus kita perban ia manusia si sempurna bagi Adam. Tapi la bagi Adam, Jesus terus patuh man Jahwe seh ngasa ia mate. Situhuna labo cocok Jesus mate, emaka ipekeke Jahwe ia guna nggeluh i surga. Alu bage, banci ka sidatken arapen si enggo bene iban Adam, eme nggeluh rasa lalap. Nina Pustaka, “Bagi sekalak jelma si la patuh si erban enterem kalak jadi erdosa, bage ka pe sekalak jelma si patuh erban enterem kalak ikataken benar.” (Roma 5:19) Arah korban tebusen Jesus, ijamin Dibata maka janjiNa pasti terjadi. Manusia banci nggeluh rasa lalap i doni!

Enggo melala si ilakoken Jahwe guna ndungi masalah perban Adam la patuh. Pelajaren kai si banci sidat kerna Jahwe arah si e? Siteh maka la lit kai pe si banci ngambati sura-sura Jahwe, janah kerina si ikatakenNa “pasti berhasil.” (Jesaya 55:11) Siteh ka maka keleng kel ate Jahwe kita. Nina Pustaka, “Bagenda cara Dibata mbuktiken kekelengenNa man banta: SuruhNa AnakNa si tonggal ku doni enda, gelah banci sidat kegeluhen arah ia. Suruh Dibata AnakNa jadi korban pendamen guna dosa-dosata, labo perban enggo sikelengi Ia, tapi perban Ia si engkelengi kita.”​—1 Johanes 4:9, 10.

“Mereken AnakNa pe labo Ia sangsi, tapi korbankenNa guna kita.” Emaka tek kita pasti nggit Dibata “mereken kerinana man banta alu mehuli” bagi si enggo ijanjikenNa. (Roma 8:32) Kai saja janji Dibata man banta? Jawapenna lit bas artikel berikutna.