Nge bia kômbô yeme môt abeñ, e ne mfi na, ô yeme mam a nga bo, a nju’u a nga wu asu ya na a bo me. Aval ete da, nge bia kômbô yeme Zambe, bia yiane yeme mam a nga bo. Éko éziñ, ô ne si’ane éyoñe wo yen abim avé mam a nga bo, me ne wo beta mfi den, a melu ma zu.

Yéhôva Zambe a ne beta Nté biôm. “[Mefulu me Zambe] me ne te yené aso ntéane ya si nyô, me atu’a yené, amu me alitiban a biôm bi nga téban, ja’ana ngul jé a mame ya ntabane wé ya nnôm éto; nde be aye bo te éfia.” (Beromain 1:20) “A nga bo si a ngule jé, a nga té émo a fe’e jé, a nga same yôp a atyeñe dé.” (Jérémie 10:12, Mfefé Nkôñelan) Bitua bi mam Zambe a nga bo, bia liti na Zambe a nyoñe bia ngap.

Tame fas avale Zambe a bo na ényiñe jangan e bo mvaé, amu a nga té bia a “éve’ela’a” jé. (Metata’a 1:27) Nalé a tinane na a nga kôme bia na, bi vu beta mefulu mé mone abim éziñ. A nga té fe bia asu ya nabi yene mam ane nye, a na bi yeme wôk fatane mfasane jé a mefulu mé. Nge bia yeme ngule na bi bo avale mam ete, bia ye fo’o bo mevak, a yem amu jé bi ne si va. Ve jame da dañe mfi e ne na, Zambe a ve bia fane ya late ngbwa a nye.

Éyoñe bia fombô si, a biôme bise bi ne été, bia yene na Zambe a nye’e bia. Nlômane Paul a nga jô na Zambe: “[A nga bo na bôte be yeme avale môt a né], amu a nga bo mvam a ve [bia] mveñ je aso yôp, a mimbu mi ne afok, a jalé minleme [miangan] a bidi a mevak.” (Mam Minlôman 14:17) Zambe a nji ve bia ve biôme bia volô bia na bi nyiñ. A nga ve bia biôm asu ya na ényiñ e  bo bia mvo’é. Biôme bina bise bi nji bo jôm, fefele beta be mam Zambe a bili na a bo bia.

Yéhôva a nga té si asu ya na bôte be nyiñe été nnôm éto. Kalate Zambe a jô na: “Si nyô a veya je bone be bôt,” a na Zambe a nji té si nyô na “e bo ne sangañ,” ve a nga kôme je na bôt be tabe été. (Besam 115:16; Ésaïe 45:18) A nga kôme si na beza be tabe été a nté mbé? “Bôte be ne zôsô b’aye nyoñe si, a tabe été nnôm éto.”​—Besam 37:29.

Asu ya na nsôñane ôte ô jaleban, Yéhôva a nga té Adam ba Ève, fam ôsu a minga ôsu, a toé be paradis si va na, be “kôme [nye] a ba’ale fe [nye].” (Metata’a 2:8, 15) Ésaé Zambe a nga ve be, é mbe mefase mebaé: “Bian a fôéan, jala’ane si a jôô je.” (Metata’a 1:28, Mfefé Nkôñelan) Nde ñhe, Adam ba Ève be mbe na ba nyiñ mefo’o ényiñe si va nnôm éto a nnôm éto. Ve éngôngole jam e ne na, be nga tyi’i na ba bo Zambe melo, a jañele fe ndi nleme be mbe be bili na ba ye bo ‘bôte be ne zôsô a nyoñe si.’ Ve, avale bia ye yen, jame be nga bo, e nji bo na Yéhôva a tyendé nsôñane a mbe a bili mfa’a wongan a si. Ve bi tame taté zu fas jam éziñ afe Zambe a nga bo.

Ba loene fe Bible na Mejô me Zambe. Amu jé Yéhôva a nga ve bia Bible? A ne asu ya na bi yeme nye. (Minkana 2:1-5) Nya ajôô a ne na kalate mfe, a vo’o yalane minsili mise bi ne sili a lat a Zambe, ane Bible. (Ecclésiaste 3:11) Ve mam mese bia koene me Bible été me ne volô bia na bi yeme Zambe. Bia yen avale môt Zambe a né, éyoñe bia fas aval a nyiñ a bôt. Bia yene avale bôte Zambe a nye’e, a avale bôte Zambe a vini. (Besam 15:1-5) Bia yen ôsimesane wé a lat a a ékaña’a, ntaban, a biôme bi mo. Kalate Zambe a liti fe avale môt a Zambe a né, a zene ya mam Yésus Krist a nga bo a jô.​—Jean 14:9.

Yéhôva a nga ve fe bia Bibleasu ya na bi yem aval bi ne nyiñe meva’a été nda bôte jangan, a bi nsôñan ényiñe jangan. A zene ya Kalate Zambe, Yéhôva a kate bia avale bi ne bi mevak nda bôte jangan été, avale bi ne vak a abime bili, a avale bi ne dañe minjuk bia tôbane mie ényiñ. Avale kalate mefoé nyi a te jô mvus, Bible a bili biyalane ya beta minsili ya ényiñe mi: Amu jé bia tôban abui minjuk? Mam mevé ma yange bia melu ma zu? Kalate Zambe a kate fe bia mam Zambe a nga bo asu ya na bi yeme na, nsôñane wé ya atata’a wo ye tôéban.

Kalate Zambe a ne fo’o angônda kalate a mezene fe. Bôte 40 mbe be nga tili nye tañe mimbu 1 600; ve a bili ngumba nlô ajô amu Zambe nnye a nga bo na a tiliban. (2 Timothée 3:16) Mimvulekane mi Kalate Zambe mia liti na, foé ya Bible e nji tyendé bamimbu ase nyi. Besiñ be nga kômbô kamane bôte na be kôñelane Bible, be miase nye a lañe nye, ve be nji vo. Den, Bible a ne kalate be dañeya kôñelan a kalate a dañeya mialan. Nyiñan Kalate Zambe a nga nyiñ azukui den, wo liti na “njôane Zambe wongan, w’aye tabe nnôm éto.”​—Ésaïe 40:8.

Zambe a nga bo beta jam mfe mfa’a ya liti bia na, to’o jé to’o jé, nsôñane wé wo ye tôéban. Atata’a ya kalate mfoé nyi, bia te yene na mfa’a Zambe, môta binam aye nyiñe nnôm éto. Ve éyoñ Adam a nga tyi’i na a bo Zambe melo, a nga jañele fe fane ya nyiñe nnôm éto asu dé émien a asu mvoñe jé. “Ajô te, aval ane abé e nga zu si nyô amu môte wua, a awu e nga zu amu abé; a nalé awu e nga kui be bôte bese, amu bese be nga bo abé.” (Beromain 5:12) Melo môta binam a nga bo, me nga wosane nsôñane Zambe. Nde Zambe a nga bo aya?

Mam Zambe a nga bo me nga lu’an a mefulu mé. Mbia mboane Adam ba Ève be nga bo, a nga betebe fe minlô miap yôp, ve jame da, Zambe a nga ka’a na, a ye nyii mvoñe bôte jé. Yéhôva a nga belane fe’e jé asu ya na, a dañe minju’u mise a ye tôbane mie; nde été été, a nga kate jam a zu  bo. (Metata’a 3:15) Awu ba nsem ba ye man a zene ya mone wé Yésus Krist. Nalé a tinane jé?

Asu ya na, a nyii a môta a binam mam ma tôñe abé Adam a nga bo, Zambe a lôme mone wé Yésus na, a ye’ele bôt ane môta Zambe a yiane nyiñ “a ve ényiñe jé ntañe bôt abui.” * (Matthieu 20:28; Jean 14:6) Yésus a mbe teke nsem, aval Adam fe a mbe teke nsem, jôm ete mbe ngule ya ve ntañ. Ve Yésus ba Adam ba selan, amu Yésus a nga bo Zambe mewôk akekui awu. Mbôle Yésus a nji yiane awu, Yéhôva a nga wômôlô nye na, a bulane ke nyiñe yôp été. Nde Yésus a nga bo jam Adam a nji kui na bo: e ve bôte be ne mewôk fane ya nyiñe nnôm éto. “Amu melo ya môte wua, bôt abui be nga boban bebo mam abé, aval ete fe, amu mewô’ô ya môte wua, bôt abui be aye kabe.” (Beromain 5:19) A zene ya ntañ, Zambe aye tôé ngaka’a a nga bo môta binam na, aye nyiñe nnôm éto si.

Bia yeme avale môt a Zambe a né, éyoñe bia yene aval a nga dañe minju’u mise éngana’a Adam é nga biaé. Bia yene na, teke jôm éziñ e ne kamane Yéhôva na, a mane jam a nga taté, ‘jam ese akômbô,’ da ye fo’o boban. (Ésaïe 55:11) Bia yene fe abim avé Yéhôva a nye’e bia. “Vôme nyôna nye’ane Zambe ô nga yené be bia na, Zambe a nga lôm atyi’i mone dé a nga biaé si nyô, nde bi aye nyiñ amu nye. Vôme nyôna nye’an ô né, sa na, bia bi nga nye’e Zambe, ve na nnye a nga nye’e bia, a a nga lôme Mone wé na, a bo metuna’a ya mam abé mangan.”​—1 Jean 4:9, 10.

Zambe “a nga bo te kame Mone wé émien, ve a nga ve nye ajô dangan bia bese,” nde bi too ndi na, Zambe ‘a ye ve bia mam mese zésé.’ (Beromain 8:32) Jé Zambe a nga ka’a bia? Tame yen.