Kon gusto nimong mas mailhan ang usa ka tawo, makatabang kon mahibaloan nimo ang iyang mga nalampos ug mga kalisdanan nga nasagubang. Sa susama, kon gusto nimong mas mailhan ang Diyos, kinahanglan nimong mahibaloan kon unsay iyang mga nahimo. Samtang himoon nimo kini, lagmit mahingangha ka nga ang iyang gihimo kaniadto naay dakong kaayohan nato karon ug sa umaabot.

Si Jehova nga Diyos mao ang Dakong Maglalalang, ug ang iyang “dili-makita nga mga hiyas . . . tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.” (Roma 1:20) “Siya mao ang Magbubuhat sa yuta pinaagi sa iyang gahom, ang Usa nga lig-ong nagtukod sa mabungahong yuta pinaagi sa iyang kaalam, ug ang Usa nga nagbuklad sa kalangitan pinaagi sa iyang pagsabot.” (Jeremias 10:12) Ang makapahinganghang mga buhat sa Diyos nagpakita sab nga siya interesado kanato.

Tagda kon giunsa paghimo ni Jehova nga espesyal ang atong kinabuhi pinaagi sa pagbuhat sa tawo “sumala sa iyang larawan.” (Genesis 1:27) Sa ato pa, gipaposible niya nga mapakita nato sa gamayng sukod ang iyang dili matupngang mga hiyas. Iya tang gibuhat nga may espirituwal nga katakos, o abilidad nga makasabot sa iyang mga panghunahuna ug prinsipyo. Samtang naningkamot tang magkinabuhi uyon niini, kita mas magmalipayon ug mas dunay kahulogan ang atong kinabuhi. Labaw pa niana, gihatagan ta niyag kahigayonan nga mahimong iyang higala.

Ang yuta nagpamatuod kon unsay pagbati sa Diyos kanato. Sumala kang apostol Pablo, ang Diyos “nagpamatuod sa iyang kaugalingon pinaagi sa maayong mga butang nga iyang gibuhat ug naghatag siya [kanatog] ulan ug mga panahon nga abunda sa abot ug gihatagan [kita] niyag pagkaon ug gipuno ang [atong] kasingkasing sa kalipay.” (Buhat 14:17, Ang Bag-ong Maayong Balita Biblia) Gitagana sa Diyos ang  labaw pa kay sa gikinahanglan aron mabuhi ta. Abunda ug nagkalainlain ang iyang tagana aron ma-enjoy nato ang kinabuhi. Pero wala ra ni sa kumingking sa kon unsa pay gusto niyang buhaton para nato.

Gibuhat ni Jehova ang yuta aron ang mga tawo magpuyo niini hangtod sa hangtod. Ang Bibliya nag-ingon: “Ang yuta iyang gihatag sa mga anak sa mga tawo,” ug siya “wala maglalang niini sa wala lamay kapuslanan, nga nag-umol niini aron pagapuy-an.” (Salmo 115:16; Isaias 45:18) Kinsay magpuyo niini ug unsa ka dugay? “Ang mga matarong magapanag-iya sa yuta, sila magapuyo sa ibabaw niini hangtod sa kahangtoran.”​—Salmo 37:29.

Tungod niana, gibuhat ni Jehova ang unang lalaki ug babaye, si Adan ug Eva, ug gipapuyo sila sa paraisong yuta “aron sa pagtikad niini ug sa pag-atiman niini.” (Genesis 2:8, 15) Gihatagan sila sa Diyos ug duha ka makapahinam nga asaynment: “Magmabungahon ug magdaghan kamo ug pun-a ang yuta ug gamhi kini.” (Genesis 1:28) Busa si Adan ug Eva dunay paglaom nga mabuhi sa yuta sa walay kataposan. Pero makapasubo nga gipili nilang supakon ang Diyos ug tungod niana ilang nawala ang kahigayonan nga maapil sa “mga matarong” nga “magapanag-iya sa yuta.” Pero atong makat-onan sa ulahi nga ang ilang gihimo wala makapausab sa katuyoan sa Diyos para nato o sa yuta. Hisgotan una nato ang usa pa ka butang nga gihimo sa Diyos.

Ang Bibliya nailhan sab ingong Pulong sa Diyos. Nganong gitagana ni Jehova ang Bibliya para nato? Ang pangunang rason mao nga gusto niyang mailhan nato siya. (Proverbio 2:1-5) Tinuod, wala tubaga sa Bibliya ang tanan natong pangutana bahin sa Diyos​—wala gyoy basahon nga makahimo niana. (Ecclesiastes 3:11) Pero ang tanan nga naa sa Bibliya makatabang nato nga mailhan ang Diyos. Makita nato kon kinsa siya sa iyang paagi sa pagtratar sa mga tawo. Mahibaloan nato kon unsang matanga sa mga tawo ang iyang giuyonan ug wala uyoni. (Salmo 15:1-5) Makat-onan nato ang iyang panghunahuna bahin sa pagsimba, moralidad, ug materyal nga mga butang. Ug ang Bibliya naghatag kanato sa pinakatin-awng deskripsiyon sa personalidad ni Jehova pinaagi sa mga pulong ug buhat sa iyang Anak, si Jesu-Kristo.​—Juan 14:9.

Ang laing rason nga gitagana ni Jehova ang iyang Pulong, ang Bibliya, maoy aron makakat-on ta kon unsaon pagbaton ug kinabuhi nga malipayon ug may katuyoan. Pinaagi sa Bibliya, gisultihan ta ni Jehova kon sa unsang paagi magmalipayon ang pamilya, masagubang ang kabalaka, ug magmakontento. Ug sumala sa hisgotan sa ulahi niini nga magasin, ang Bibliya dunay tubag sa importante kaayong mga pangutana sa kinabuhi, sama sa: Nganong daghan ang nag-antos? Unsay atong kaugmaon? Gipatin-aw sab niini kon unsay gihimo sa Diyos aron maseguro nga matuman ang iyang orihinal nga katuyoan.

Ang Bibliya, nga ang Awtor mao ang Diyos, talagsaon gayod sa daghang paagi. Kini gisulat sulod sa 1,600 ka tuig pinaagi sa mga 40 ka magsusulat, pero usa ray tema sa Bibliya kay ang Diyos mao ang tinuod nga Awtor niini. (2 Timoteo 3:16) Dili parehas sa ubang karaang basahon, kini tukmang napreserbar sulod sa taas kaayong panahon, sumala sa makita sa linibo ka karaang manuskrito sa Bibliya. Dugang pa, ang Bibliya nakalahutay bisan pa sa mga paningkamot nga kini dili mahubad, mapanagtag, ug mabasa. Karon, kini ang pinakakaylap nga napanagtag ug nahubad nga basahon. Kay ang Bibliya padayong naglungtad, pamatuod ni nga ang pulong sa Diyos magpabilin sa walay kataposan.​—Isaias 40:8.

Ang lain pang nahimo sa Diyos mao ang iyang paghatag ug espesyal nga tagana aron pasaligan ta nga matuman ang iyang katuyoan para nato. Sa nahisgotan na, katuyoan sa Diyos nga ang mga tawo magpuyo sa yuta sa walay kataposan. Pero dihang gisupak ni Adan ang Diyos maong siya nakasala, iyang giwala ang kahigayonan nga mabuhi sa walay kataposan dili lang para sa iyang kaugalingon kondili apil na sa iyang umaabot nga mga anak. “Ingon nga ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Kay nakasala si Adan, daw dili na matuman ang katuyoan sa Diyos. Unsay gihimo ni Jehova?

 Ang mga gihimo ni Jehova uyon sa iyang mga hiyas. Makataronganon niyang gihukman si Adan ug Eva sa ilang nahimo, pero mahigugmaon siyang nagtagana para sa ilang umaabot nga mga kaliwat. Pinaagi sa kaalam ni Jehova nahibalo siya kon unsay himoon sa maong kahimtang, ug gipahibalo dayon niya ang solusyon. (Genesis 3:15) Ang pagpahigawas sa sala ug kamatayon itagana pinaagi sa Anak sa Diyos, si Jesu-Kristo. Unsay nalangkit niana?

Aron malukat ang mga tawo gikan sa epekto sa pagrebelde ni Adan, gipadala ni Jehova si Jesus sa yuta aron tudloan ang mga tawo sa dalan padulong sa kinabuhi ug aron sa “paghatag sa iyang kalag nga usa ka lukat baylo sa daghan.” * (Mateo 20:28; Juan 14:6) Makahimo si Jesus sa paglukat kay hingpit siya sama kang Adan. Pero dili parehas kang Adan, si Jesus nagpabiling matinumanon, bisan hangtod sa kamatayon. Kay si Jesus dili takos mamatay, gibanhaw siya ni Jehova aron mabuhi pag-usab sa langit. Mahimo na ni Jesus karon ang wala mahimo ni Adan​—ang paghatag ug paglaom sa masinugtanong katawhan nga mabuhi sa walay kataposan. “Kay ingon nga pinaagi sa pagkadili-masinugtanon sa usa ka tawo daghan ang nahimong makasasala, sa ingon usab pinaagi sa pagkamasinugtanon sa usa ka persona daghan ang mahimong matarong.” (Roma 5:19) Pinaagi sa halad lukat ni Jesus, tumanon sa Diyos ang iyang saad nga ang mga tawo mabuhi sa yuta sa walay kataposan.

Daghan tag makat-onan sa paagi ni Jehova sa pag-atubang sa mga problema nga resulta sa pagkadili-masinugtanon ni Adan. Nakita nato nga walay makapugong kang Jehova sa pagtapos sa kon unsay iyang nasugdan; ang iyang gisulti seguradong matuman. (Isaias 55:11) Maapresyar sab nato kon unsa ka dako ang iyang gugma kanato. “Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya. Ang gugma maoy niining paagiha, dili nga kita nahigugma sa Diyos, kondili nga siya ang nahigugma kanato ug gipadala ang iyang Anak ingong usa ka halad pasig-uli alang sa atong mga sala.”—1 Juan 4:9, 10.

Ang Diyos “wala gani magpalingkawas sa iyang kaugalingong Anak kondili nagtugyan kaniya alang kanatong tanan,” busa makasalig ta nga ang Diyos “malulotong maghatag kanato sa tanang ubang butang” nga iyang gisaad. (Roma 8:32) Unsay gisaad sa Diyos nga himoon niya para nato? Padayon lag basa.