Kon gusto mo nga makilala sing maayo ang isa, maayo nga hibaluon mo ang iya mga hinimuan kag ang nalampuwasan niya nga mga problema. Sing kaanggid, kon gusto naton nga makilala sing maayo ang Dios, dapat hibaluon naton ang nahimo na niya. Mahimo makibot ka nga ang iya mga hinimuan sadto may epekto sa aton subong kag sa aton palaabuton.

Si Jehova nga Dios amo ang Daku nga Manunuga, kay “ang iya indi makita nga mga kinaiya . . . maathag nga makita halin pa sang pagtuga sa kalibutan, bangod makita ini sa mga butang nga gintuga.” (Roma 1:20) “Sia ang Manunuga sang duta kag paagi sa iya gahom ginhimo niya ini, paagi sa iya kaalam ginhimo niya nga malig-on ang duta kag paagi sa iya paghangop ginhumlad niya ang kalangitan.” (Jeremias 10:12) Maathag man sa dalayawon nga mga tinuga sang Dios nga interesado sia sa aton.

Binagbinaga kon paano ginhimo ni Jehova nga pinasahi ang mga tawo paagi sa pagtuga sa aton “suno sa larawan niya.” (Genesis 1:27) Gani, ginpaposible niya nga mapakita naton, bisan sa diutay lang nga paagi, ang iya dalayawon nga mga kinaiya. Gintuga niya kita nga makahunahuna sang espirituwal nga mga butang, ukon sang ikasarang nga mahangpan ang iya mga pagtamod kag kasuguan. Kon ginatinguhaan naton nga sundon ini, mangin malipayon gid kita kag may katuyuan ang aton kabuhi. Labaw sa tanan, ginhatagan niya kita sing tsansa nga mangin suod sa iya.

Ang gintuga sang Dios sa duta nagapakita kon ano ang pagtamod niya sa aton. Suno kay apostol Pablo, “paagi sa paghimo sing maayo ginpakita [sang Dios sa aton] kon sin-o sia, nga nagahatag sa [aton] sing ulan halin sa langit kag sing bugana nga patubas sa nagakaigo nga tion, nga nagahatag sing bugana nga kalan-on kag nagapuno sang [aton] tagipusuon sing kasadya.” (Binuhatan 14:17) Gin-amanan kita sang Dios sing sobra pa sa aton kinahanglanon. Tama ini kadamo kag nanarisari amo nga malipay kita sa sini. Pero indi lang amo sini ang gusto niya nga ihatag sa aton.

Gintuga ni Jehova ang duta para istaran sang tawo sing wala katapusan. Ang Biblia nagasiling: “Ang duta ginhatag niya sa mga tawo,” kag sia “wala nagtuga sini sa wala sing pulos, kundi nagbuhat sini  agod puy-an.” (Salmo 115:16; Isaias 45:18) Sin-o ang magaistar sa sini, kag daw ano kadugay? “Ang mga matarong magapanubli sang duta, kag magapuyo sila sa sini sa wala sing katubtuban.”—Salmo 37:29.

Gintuga ni Jehova ang una nga lalaki kag babayi, si Adan kag si Eva, kag ginpaistar sila sa paraiso “sa pagpanguma kag sa pag-atipan sini.” (Genesis 2:8, 15) Ginhatagan sila sang Dios sing makalilipay nga asaynment: “Magpanganak kamo kag magdamo, pun-a ninyo ang duta kag dumalahan ini.” (Genesis 1:28) Gani may paglaum sila nga magkabuhi sing wala katapusan sa duta. Pero makapasubo nga ginpili nila nga indi magtuman sa Dios amo nga nadula nila ang paglaum nga malakip sa “mga matarong” nga “magapanubli sang duta.” Suno sa tun-an pa naton, wala magbag-o ang katuyuan ni Jehova para sa aton ukon sa duta bisan amo pa sina ang ila ginhimo. Pero binagbinagon anay naton kon ano pa ang nahimo sang Dios.

Ang Biblia ginatawag man nga Pulong sang Dios. Ngaa ginhatagan kita ni Jehova sang Biblia? Para makatuon kita parte sa iya. (Hulubaton 2:1-5) Ang matuod, indi masabat sang Biblia ang tanan naton nga pamangkot parte sa Dios, kag wala sing bisan ano nga libro ang makahimo sina. (Manugwali 3:11) Pero ang tanan nga ginaunod sang Biblia makabulig sa aton nga makilala ang Dios. Makilala naton sia paagi sa iya pagpakig-angot sa mga tawo. Mahibaluan naton kon sin-o ang iya nahamut-an kag wala nahamut-an. (Salmo 15:1-5) Nahibaluan naton ang pagtamod niya parte sa pagsimba, moralidad, kag sa materyal nga mga butang. Maathag man nga ginapakita sang Biblia ang personalidad ni Jehova paagi sa ginsiling kag ginhimo sang iya Anak, si Jesucristo.—Juan 14:9.

Ang isa pa ka rason nga ginhatag ni Jehova ang iya Pulong, ang Biblia, amo nga matun-an naton kon paano mangin malipayon kag kon ano ang katuyuan sang aton kabuhi. Paagi sa Biblia, gintudluan kita ni Jehova kon paano mangin malipayon ang aton pamilya, kon paano mangin kontento, kag kon paano atubangon ang mga kabudlayan. Kag ipaathag sa ulihi nga bahin sini nga magasin nga ang Biblia may sabat sa pila ka importante nga pamangkot, pareho sang: Ngaa grabe ang pag-antos? Ano ang matabo sa palaabuton? Ipaathag man kon ano ang ginhimo sang Dios para matuman ang iya orihinal nga katuyuan.

May madamo pa nga paagi nga nagapakita nga ang Biblia espesyal gid nga libro kag ang awtor sini amo ang Dios. Ginsulat ini sa masobra 1,600 ka tuig sang mga 40 ka lalaki, pero isa lang ang tema kay ang Dios amo gid ang Awtor sini. (2 Timoteo 3:16) Indi pareho sa iban nga libro, sibu ini nga napreserbar pagligad sang panahon, kag napamatud-an ini sang linibo ka dumaan nga manuskrito sang Biblia. Dugang pa, wala mapunggan ang Biblia nga i-translate, ipanagtag, kag basahon. Amo man ini ang pinakamadamo nga napanagtag kag na-translate nga libro subong. Ang Biblia nagapamatuod nga “ang pulong sang aton Dios nagapadayon sa wala sing katubtuban.”—Isaias 40:8.

Ang isa pa nga nahimo sang Dios amo ang pinasahi niya nga aman para matuman gid ang iya katuyuan para sa aton. Sa nasambit na, gusto sang Dios nga mabuhi sing wala katapusan ang mga tawo sa duta. Pero sang ginpili ni Adan nga indi pagtumanon ang Dios, nakasala sia, gani nadula niya ang kahigayunan nga mabuhi sing wala katapusan, pati ang iya mangin mga anak. “Paagi sa isa ka tawo nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo bangod sila tanan nakasala.” (Roma 5:12) Ang indi pagtuman sang tawo daw nagpugong sa katuyuan sang Dios. Ano ang ginhimo ni Jehova?

Ang ginahimo ni Jehova nabase sa iya mga kinaiya. Ginsilutan niya si Adan kag si Eva sa ila ginhimo, pero may mapinalanggaon sia nga aman para sa ila mangin mga anak. Bangod sang kaalam ni Jehova, nahibaluan niya kon paano tadlungon ang sitwasyon, kag ginsugid niya dayon ang solusyon. (Genesis 3:15) Ang kaluwasan sa sala kag kamatayon mabaton paagi sa Anak sang Dios, si Jesucristo. Ano ang dapat himuon?

 Para maluwas ang mga tawo sa epekto sang pagrebelde ni Adan, ginpadala ni Jehova si Jesus sa duta para tudluan ang mga tawo kon paano makatigayon sang kabuhi kag para “ihatag ang iya kabuhi nga gawad kabaylo sang madamo.” a (Mateo 20:28; Juan 14:6) Mahatag ni Jesus ang gawad kay perpekto sia nga tawo pareho ni Adan. Pero indi pareho ni Adan, nangin matinumanon si Jesus asta sa kamatayon. Bangod indi takus si Jesus nga mapatay, ginbanhaw sia ni Jehova para magkabuhi sa langit. Mahimo na subong ni Jesus ang wala mahimo ni Adan, ang paghatag sa matinumanon nga mga tawo sing paglaum nga kabuhi nga wala sing katapusan. “Paagi sa pagkadimatinumanon sang isa ka tawo madamo ang nangin makasasala, paagi man sa pagkamatinumanon sang isa ka tawo madamo ang mangin matarong.” (Roma 5:19) Paagi sa halad gawad ni Jesus, tumanon sang Dios ang iya promisa nga maistar ang mga tawo sa duta sing wala katapusan.

Madamo kita sing matun-an sa pamaagi ni Jehova para solbaron ang mga problema nga resulta sang indi pagtuman ni Adan. Maathag nga wala sing makapugong kay Jehova nga tapuson ang iya ginsugdan; ang iya pulong “pat-od nga magamadinalag-on.” (Isaias 55:11) Nalipay man kita sa daku nga gugma nga ginpakita ni Jehova para sa aton. “Paagi sini ang gugma sang Dios ginpadayag sa aton kahimtangan, nga ginpadala niya ang iya bugtong nga Anak sa kalibutan agod maagom naton ang kabuhi paagi sa iya. Ginpadala sang Dios ang iya Anak subong nagapasag-uli nga halad para sa aton mga sala. Ginhimo niya ini bangod ginahigugma niya kita, indi bangod nga ginahigugma naton sia.”—1 Juan 4:9, 10.

‘Wala ginpunggan sang Dios bisan gani ang iya Anak nga mag-antos, kundi ginhatag niya sia para sa aton tanan,’ gani sigurado kita nga “ihatag man sa aton sang Dios . . . ang tanan nga iban pa nga butang” nga ginpromisa niya. (Roma 8:32) Ano ang ginpromisa sang Dios nga himuon niya para sa aton? Palihug padayuna ang pagbasa.