Ñe kokõn̦aan jel̦ã kõn juon armej, em̦m̦an bwe kwõn jel̦ã kõn men ko em̦õj an kõm̦m̦ani ilo mour eo an im apañ ko ear iiooni im anjo̦ ioer. Ãindeinl̦o̦k wõt, ñe kokõn̦aan kal̦apl̦o̦k am̦ jel̦ã kõn Anij, kwõj aikuj jel̦ã kõn men ko ear kõm̦m̦ani. Ilo am̦ kõm̦m̦ane men in, kwõnaaj bwilõñ ilo am̦ katak im jel̦ã kõn aolepen men ko ear kõm̦m̦ani ilo iien ko etto me rej jelõt kõj kiiõ im ilju im jekl̦aj.

Jeova Anij ej ri-Kõm̦anm̦an eo El̦ap ñan men otemjej, im “men ko An im jeban loi, rej alikkar jãn jinoin lal̦, bwe rejel̦ã kajjier kõn men ko Ear kõm̦m̦ani.” (Rom 1:20, UBS) “Ear kõm̦m̦an lal̦ kõn An kajoor; Ear kapen lal̦ in kõn mãlõtlõt eo an; im ilo an jel̦ãl̦o̦kjen̦ ear erl̦o̦ke lañ ko.” (Jeremaia 10:12) Menin kõm̦anm̦an ko an rekabwilõñlõñ rej bareinwõt kaalikkar bwe ewõr an Anij itoklimo kõn kõj.

L̦õmn̦ak kõn wãween an Anij kar kõm̦anm̦an armej ilo juon wãween ejejuwaan, ear kõm̦anm̦an kõj “ilo wãween wõt E.” (Jenesis 1:27) Mel̦el̦ein bwe ear letok maroñ ñan kõj bwe jen kate kõj ñan anõke kadkad ko an kadkadin. Ear letok ñan kõj maroñ eo ñan jel̦ã men ko raorõk ippãn im men ko rem̦m̦an im renana ippãn. Ilo ad jel̦ã kõn men kein im kate kõj ñan mour ekkar ñani, jenaaj lo tokjãn ko rem̦m̦an im m̦õn̦õn̦õ ilo mour ko ad. Ejjab men in wõt, ak ear letok maroñ ñan kõj bwe jen ejaake juon jem̦jerã ippãn.

Menin kõm̦anm̦an ko an Anij ilo lal̦ in rej kwal̦o̦k kõn eñjake eo an kõn kõj. Naan ko an rijjilõk Paul, ear ba bwe Anij ‘ekõn kwal̦o̦k kõn e make kõn men ko rem̦m̦an ej kõm̦m̦ani: ej letok wõt jãn lañ im leen keinikkan ilo iien ekkar; ej letok kijed im ej koobrak bũruod kõn m̦õn̦õn̦õ.’ (Jerbal 14:17, UBS) Anij ear jab letok wõt men ko jej aikuji ñan ad mour. Ak ear bareinwõt letok elõñ kain menin kõm̦anm̦an ko bwe jen mour im m̦õn̦õn̦õ kaki. Men kein rej jidikin wõt men ko rem̦m̦an Anij ear kõn̦aan bwe jen bõki jãn jinoin.

 Jeova ear kõm̦m̦ane lal̦ in bwe armej ro ren mour im jokwe ie ñan indeeo. Baibõl̦ ej ba: ‘Ear letok lal̦ ñan ro nejin armej.’ Im ear “jab kõm̦m̦ane waan, im n̦a wãween bwe ren jokwe ie.” (Sam 115:16; Aiseia 45:18) Wõn ro renaaj jokwe ilo lal̦ in im ñan ñããt? “Ro rem̦m̦an renaaj jolõt ãne eo, im jokwe ilowaan ñan indeeo.”​—Sam 37:29; Jabõn Kõnnaan 2:21.

Eñin unin, Jeova ear kõm̦anm̦an em̦m̦aan im kõrã eo m̦oktata Adam im Iv, im ear likũt erro ilo juon jikin aiboojoj ijin ioon lal̦ bwe ren “jerbale im kõjparoke.” (Jenesis 2:8, 15) Anij ear lel̦o̦k ñan erro juon jerbal, ear ba: “Kom̦win timmon im orl̦o̦k, im koobrak lal̦, im kajoor jãne.” (Jenesis 1:28) Ear wõr an Adam im Iv kõjatdikdik ñan mour im m̦õn̦õn̦õ ñan indeeo ijin ioon lal̦. Bõtab, ekabũrom̦õjm̦õj bwe rar jab pokake Anij im tokjãn men in rar luuji jeraam̦m̦an eo ñan aer maroñ juon iaan “ro rem̦m̦an” me “renaaj jokwe ilo lal̦.” Meñe rar jab pokake, jenaaj katak bwe kõn̦aan eo an Anij kõn lal̦ in im ñan kõj ejjañin oktak. Ak m̦oktata, jen etale juon men me Anij ear bar kõm̦m̦ane.

Bar juon wãween jej n̦aetan Baibõl̦ eo, ej Naanin Anij. Etke Anij ear letok Baibõl̦ eo ñan kõj? Unleplepin an letok Baibõl̦ eo ej bwe jen katak kõn e. (Jabõn Kõnnaan 2:1-5, UBS) Em̦ool bwe Baibõl̦ ejjab uwaaki aolep kajjitõk ko ewõr ippãd kõn Anij, ilo m̦ool ejjel̦o̦k juon bok emaroñ kõm̦m̦ane men in. (Ekklisiastis 3:11, UBS) Ijoke aolep naan ko ilo Baibõl̦ eo remaroñ jipañ kõj kal̦apl̦o̦k ad jel̦ã kajjien Anij. Jej katak kõn kain Anij rot e ikijjeen wãween an kõm̦m̦an ñan armej. Jej katak kõn kain armej ro rem̦m̦an im rejjab em̦m̦an ippãn. (Sam 15:1-5, UBS) Im ej kwal̦o̦k kõn l̦õmn̦ak eo an ikijjeen kabuñ, mour erreo, im m̦weiuk ko. Baibõl̦ eo ej lukkuun kwal̦o̦k ñan kõj kõn kadkad ko kadkadin Jeova ikijjeen naan im kõm̦m̦an ko an Nejin, Jesus Christ.​—Jon 14:9, UBS.

Bar juon un Jeova ear letok ñan kõj Naan eo an ak Baibõl̦ eo, ej bwe jen jel̦ã kilen mour ilo m̦õn̦õn̦õ. Ikijjeen Baibõl̦ eo, Jeova ej kwal̦o̦k wãween an baam̦le ko ad maroñ m̦õn̦õn̦õ ippãn doon, jokwane kõn men ko ippãd, im wãween ad maroñ kadikl̦o̦k ad inepata. Im ãinwõt an naaj kõmel̦el̦e ilo bok in, Baibõl̦ eo ej letok uwaakin kajjitõk ko me enañin aolep armej rej kajjitõk kaki, ãinwõt: Etke el̦ap eñtaan ilo lal̦ in? Ewi wãween ilju im jekl̦aj? Ej bareinwõt kõmel̦el̦e kõn men ko em̦õj an Anij kõm̦m̦ani ñan kajejjet ankilaan.

Baibõl̦ eo ej juon bok ejejuwaan, im elõñ wãween ko rej kwal̦o̦k im kam̦ool bwe Anij eo ear je bok in. Meñe enañin 40 em̦m̦aan ro rar je Baibõl̦ eo, im ear bõk elõñl̦o̦k jãn 1,600 iiõ ñan je, ak aolepen bok ko ie rej kõnnaan kõn juon ennaan eaorõk. Alikkar bwe Anij eo ear je Baibõl̦ eo. (2 Timote 3:16, UBS) Baibõl̦ eo eoktak jãn bokin etto ko jet, kõnke aolep naan ko ie rekabde pãdwõt ñan rainin. Im bok lemlem ko jãn iien ko etto rej kam̦oole men in. Meñe elõñ armej rar kajjioñ in kabõjrak ukokin Baibõl̦ eo ñan kajin ko jet, an ajeeded, im an armej riiti, ak rar jab lo tõprak bwe Baibõl̦ eo ej pãdwõt ñan kiiõ. Im rainin Baibõl̦ eo ej bok eo el̦aptata aer ukote im el̦ap aer leto letak. An Baibõl̦ pãdwõt ñan raan kein ad ej kam̦ool bwe “Naan ko an Anij eo ad rej pãd ñan indeeo.”​—Aiseia 40:8, UBS.

Ebar wõr juon men Anij ear kõm̦m̦ane ñan kam̦ool bwe enaaj kajejjet karõk ko an ñan kõj. Ãinwõt kar kwal̦o̦k kake m̦oktal̦o̦k, Anij ear karõk bwe armej ro ren jokwe ilo lal̦ in ñan indeeo. Bõtab, kõnke Adam ear kããlõt ñan jab pokake Anij im jerawiwi. Ear luuji maroñ eo an ñan mour indeeo, ejjab e wõt ak bareinwõt ajri ro nejin. “Ãinwõt kõn juon armej, jerawiwi ear del̦o̦ñ ilo lal̦, im mej kõn jerawiwi; im ãindein mej ear itok ioon armej otemjej, bwe er otemjej rar jerawiwi.” (Rom 5:12) Kõn an Adam jerawiwi, ear ãinwõt ñe ear ukoti karõk eo an Anij kõn lal̦ in. Innem, ta eo Anij ear kõm̦m̦ane?

Men ko Jeova ear kõm̦m̦ani rej errã wõt ippãn kadkad ko kadkadin. Ñan waanjoñak, kõn ekajet jim̦we eo an ear lel̦o̦k kaje ñan Adam im Iv ekkar ñan jerawiwi eo aerro, ijoke kõn yokwe eo an ear kõm̦m̦an karõk bwe ro ineer tokãlik en wõr aer kõjatdikdik. Im kõn an mãlõtlõt, Jeova ear kõm̦adm̦õde  apañ eo im kajju kwal̦o̦k pepe eo an. (Jenesis 3:15) Wãween eo bwe armej ren maroñ rõl̦o̦k jãn jerawiwi im mej ej ikijjeen Jesus Christ, Nejin Anij. Men in ear kitibuj ta?

Ñan lo̦mo̦o̦ren armej ro jãn jerawiwi eo an Adam, Jeova ear jilkintok Nejin Jesus ñan lal̦ in bwe en kwal̦o̦k ñan armej ro wãween aer maroñ bõk mour, im bareinwõt bwe en “lel̦o̦k mour eo an bwe en lo̦mo̦o̦ren elõñ armej.” a (Lale kõmel̦el̦e eo itulal̦.) (Matu 20:28, UBS; Jon 14:6) Jesus ear maroñ katok kõn mour eo an kõnke ear weeppãn ãinwõt Adam. Bõtab ear jab ãinwõt Adam kõnke ear tiljek im pokake Jeova ñan mej. Im kõnke ekar jab tõllo̦kũn bwe en mej, Jeova ear kõjerkakpejeiki ñan mour ilañ. Jesus ear kõm̦m̦ane men eo Adam ear jab maroñ in kõm̦m̦ane, ej ñan lel̦o̦k kõjatdikdik eo kõn mour indeeo ñan armej ro. “Innem kõn an juon armej kar jab pokake ear kõm̦m̦an bwe armej otemjej ren rijjerawiwi ilo ejja wãween in wõt, kõn an armej eo juon pokake, Anij enaaj kõwãnõk elõñ armej.” (Rom 5:19, UBS) Ikijjeen katok in mour eo an Jesus, Anij enaaj kajejjet kallim̦ur eo an bwe armej ren mour ilo lal̦ in ñan indeeo.

Elõñ men ko jej katak kõn Jeova ikijjeen wãween an kar kõm̦adm̦õde apañ ko rar wal̦o̦k ãlikin an kar Adam jab pokake im jerawiwi. Jej lo bwe ejjel̦o̦k men en̦ emaroñ bõbraik Jeova jãn an kadedel̦o̦k jabdewõt men ear karõke, jabdewõt men ej ba enaaj m̦ool. (Aiseia 55:11, UBS) Jaar bar katak kõn an Jeova lukkuun yokwe kõj. “Wãween dein an Anij kar kwal̦o̦k yokwe eo an ñan kõj: ear jilkintok Nejin eo ej make wõt ñan lal̦, bwe jen maroñ mour kõn e. Eñin yokwe eo: ejjab bwe jaar yokwe Anij, ak bwe ear yokwe kõj im jilkintok Nejin bwe en ial̦an jeorl̦o̦k jerawiwi ko ad.”​—1 Jon 4:9, 10, UBS.

“Anij ear jab dãpij Nejin eo emake wõt, ak ear aje e kõn kõj otemjej!” Kõn men in, jemaroñ lõke bwe Anij enaaj “m̦õn̦õn̦õ in letok men otemjej ñan kõj” me ear kallim̦ur kaki. (Rom 8:32, UBS) Ta eo Anij ear kallim̦ur bwe enaaj kõm̦m̦ane ñan kõj? Wõnm̦aanl̦o̦k wõt im riit bwe kwõn jel̦ã.