Tlaj tijneki kuali tikixmatis se akajya, moneki tijmatis tlake kichijtok uan tlake tlaouijkayotl kiixnamiktok. Ika toTeotsij nojkia moneki tijchiuas nopa, tlaj tijneki kuali tikixmatis, moneki tijmatis tlake tlamantli kichijtok. Tlauel mitspaktis tijmatis kenijkatsa tlen toTeotsij kichijtok tlauel techpaleuia ipan ni tonali uan nojkia techpaleuis teipa ma tiitstokaj ika pakilistli.

Jehová yaya katli kichijchijtok nochi tlen onka, uan nochi nopa kuajkuali tlamantli tlen kipia nesi ipan “iluikaktli uan Tlaltipaktli tlen yajaya kichijtok” (Romanos 1:20). Ya “kichijchijki ni Tlaltipaktli ika ichikaualis. Uan ika itlalnamikilis kitlalik sejse tlamantli kampa moneki. Nojkia ika [itlaixmatilis] kipatlajki ne iluikaktli” (Jeremías 10:12). Nochi nopa yejyektsitsij tlamantli tlen kichijchijtok kinextia tlauel techiknelia.

Ximoiljui kenijkatsa tlauel techpaleuia tielisej kej “itlachialis toTeko” (Génesis 1:27). Pampa Jehová kiampa techchijchijki, nama tiuelij tijnextiaj se kentsi tlen nopa kuajkuali tlamantli tlen ya kipia. Uan nojkia kichijki ma tijnekikaj tijnechkauisej, yeka ueli tijkuamachiliaj tlen ya moiljuia uan tlen tlanauatia. Kema timoyakanaj ika tlen ya kiijtoua, techpaleuia ma tiyolpakikaj uan kuali ma tijyolmatikaj. Uan nojkia uelis timouampojchiuasej iuaya.

Kema tijtlachiliaj tlen toTeotsij kichijchijtok ipan Tlaltipaktli, tikitaj tlauel techiknelia. Apóstol Pablo kiijtok toTeotsij “kinchiuiliyaya tlakamej tlen kuali. Kichijki ma uetsi atl uan ma onka pixkistli tlen kuali. Uan temakayaya nochi tlen monekiyaya para ma tlakuakaj uan para ma yolpakikaj” (Hechos 14:17). ToTeotsij amo san kichijki ma tijpiakaj tlakualistli, nojkia kichijchijki tlauel miak tlamantli tlen kichiuaskia ma tiitstokaj ika pakilistli. Nochi tlen techmakak eli san se keski tlamantli tlen kinextia kenijkatsa teipa nojua techmakas miak tlamantli.

Jehová kichijchijki Tlaltipaktli pampa kinekiyaya maseualmej nochipa ma itstokaj nopaya. Biblia kiijtoua “Tlaltipaktli kinmakatok tlakamej” uan “axkichijchijki para eltos kaktok. Kichijchijki uan kikualtlalik para ipan ma itstokaj” maseualmej  (Salmo 115:16; Isaías 45:18). ¿Ajkia inijuantij itstosej uan keski tonali? Biblia kiijtoua: “Tlen itstokej xitlauakej iixpa toTeko moaxkatisej nopa tlali tlen yajaya kinmakas, uan nepa itstosej para nochipa” (Salmo 37:29).

Ya nopa kinekiyaya toTeotsij kema kinchijchijki Adán uan Eva. Kintlalik ipan se xochimili uan kinekiyaya ma kimokuitlauikaj uan ma kiueyilikaj (Génesis 2:8, 15). Uan nelia tlauel kuali tlen kiniljuik ma kichiuakaj: “Xikinpiakaj miak inmokoneuaj para inijuantij itstosej kampa ueli ipan nochi Tlaltipaktli para ma tlanauatikaj” (Génesis 1:28). Uajka, Adán uan Eva ueliskiaj itstosej ika pakilistli ipan Tlaltipaktli uan amo kema mikiskiaj. Inijuantij amo kineltokakej toTeotsij uan ayokmo elkej “xitlauakej” uan ayokmo ueliskiaj “moaxkatisej nopa tlali”. Maske panok nopa, toTeotsij amo kipatlak tlen mosentlalijtoya kinmakas maseualmej yon tlen kinekiyaya kichiuas ipan Tlaltipaktli. Achtoui ma tikikaj seyok tlamantli tlen toTeotsij nojkia kichijtok.

¿Kenke Jehová techmakak iTlajtol, Biblia? Achtoui, pampa kineki kuali ma tikixmatikaj (Proverbios 2:1-5). Tijmatij Biblia amo uelis kinankilis nochi tlamantli tlen tijnekij tijmatisej, yon se amochtli ueliskia techiljuis nochi tlamantli tlen toTeotsij (Eclesiastés 3:11). Maske amo kinankilia nochi, tlen kiijtoua techpaleuia ma tikixmatikaj toTeotsij. Uelis tijmatisej kenijkatsa eli tlaj tikitasej kenijkatsa kinita maseualmej. Tijyekouaj ajkia inijuantij kuali kinita uan ajkia inijuantij amo kineki kinitas (Salmo 15:1-5). Tijyekouaj kenijkatsa kipaktia ma kiueyichiuakaj, kenijkatsa kineki ma timonejnemiltikaj uan kenijkatsa kiita tomij o tlamantli tlen pajpatiyo. Uan Biblia nojkia techpaleuia kuali ma tikixmatikaj toTeotsij ika tlen kiijtok uan kichijki iKone, Jesucristo (Juan 14:9).

Jehová nojkia techmakak Biblia pampa kineki ma tijmatikaj tlake techpaleuis kuali tiitstosej. Ika Biblia techiljuia kenijkatsa uelis tiyolpakisej ininuaya tochampoyouaj, kenijkatsa kuali tijyolmatisej uan kenijkatsa amo tlauel timotekipachosej. Uan kej tikitasej teipa, Biblia kinankilia ni tlajtlanili tlen tlauel ipati: “¿Kenke titlaijiyouiaj? ¿Tlake panos teipa?”. Nojkia techixtomilia tlen toTeotsij kichijtok pampa kineki ma moaxiti tlen mosentlalik kichiuas.

Onka sekinok tlamantli tlen kinextia Biblia nelia iaxka toTeotsij; amo onka seyok amochtli kej toTeotsij iTlajtol. Maske kiijkuilojkej 40 tlakamej ipan se 1,600 xiuitl, kipia san setsi tlamachtili. Nopa kinextia nelia toTeotsij techmakatok Biblia (2 Timoteo 3:16). Uan maske tlauel ya uejka kiijkuilojkej, amo kipanotok kej sekinok amochtli, pampa miak amatlajkuiloli tlen uejkajkia moijkuilok kinextia amo mopatlatok tlen kiijtoua. Ipan ni tonali san Biblia tlauel monamaka uan motlajtolkuepa ipan miak tlajtoli. Pampa tijpixtokej Biblia, kinextia “iTlajtol toTeko Dios mokaua para nochipa” (Isaías 40:8).

ToTeotsij nojkia techmakatok seyok tlamantli tlen tlauel ipati, kiampa kinextik temachtli kichiuaskia tlen mosentlalijtok. Kej tikijtojkej, toTeotsij kinekiyaya maseualmej ma itstokaj nochipa ipan Tlaltipaktli. Kema Adán amo kinejki kineltokas toTeotsij uan tlajtlakolchijki, amo san ya ayokmo itstoskia nochipa, nojkia nochi ikoneuaj. “Tlajtlakoli pejki ipan Tlaltipaktli pampa san se tlakatl tlajtlakolchijki. Uan pampa pejki tlajtlakoli, nojkia pejki miki[lis]tli. Uajka ama miki[lis]tli techasi nochi titlakamej, pampa nochi titlajtlakolchijtokej” (Romanos 5:12). Nesiyaya toTeotsij ayokmo ueliskia kichiuas tlen mosentlalijtoya pampa Adán tlajtlakolchijki. ¿Tlake kichijki Jehová?

Tlen Jehová kichijki kinextik kenijkatsa eli. Ya kichijki tlen xitlauak uan kintlatsakuiltik Adán uan Eva pampa kiixpanotoyaj, uan pampa teiknelia, nimantsi kiitak kenijkatsa kinpaleuiskia maseualmej. Uan ika tlalnamikilistli kimatki tlake kichiuaskia, yeka kiijtok kenijkatsa kisenkauaskia nopa kuesoli (Génesis 3:15). Ika iKone, Jesucristo, techmakixtiskia tlen tlajtlakoli uan mikilistli. ¿Kenijkatsa kichiuaskia nopa?

 Jehová kinejki kikualtlalis nochi tlen Adán kichijki uan kinmakixtis maseualmej, yeka kiualtitlanki Jesús ma kinmachtiki maseualmej kenijkatsa ueliskiaj momakixtisej uan ma motemaktiliki a (Mateo 20:28; Juan 14:6). Jesús uelki techmakixtik pampa amo eliyaya tlajtlakole sanse kej Adán. Ya amo kichijki kej Adán, uan maske kimiktiskiaj ya nochipa mosentlalik kineltokas toTeotsij. Jehová kimajtoya amo kinamikiyaya mikis, yeka kiyolkuik uan kikajki sampa ma tlakuepili iluikak. Kiampa Jesús ueliskia kinmakas maseualmej se tlamantli tlen Adán amo kinmakak: ueliskiaj itstosej nochipa. “Pampa Adán axkichijki tlen toTeko Dios kiiljuik, nochi tlakamej mokuepkej tlajtlakolchiuanij, pero Jesucristo kena, kitlamichijki nochi tlen kiiljuik toTeko Dios, uan yeka ama [miakej] titlakamej uelis timochiuasej tixitlauakej iixpa” (Romanos 5:19). Ika Jesús imikilis, Jehová ueliskia kichiuas maseualmej ma itstokaj nochipa ipan Tlaltipaktli.

Tijyekouaj miak tlamantli tlen Jehová kema tikitaj kenijkatsa kisenkajki tlen panok pampa Adán tlajtlakolchijki. Amo tleno uelis kitsakuilis Jehová ma kichiua tlen mosentlalia (Isaías 55:11). Uan nojkia technextilia kenijkatsa tlauel techiknelia. “ToTeko technextilik hasta kanke techiknelia pampa techtitlanilik iKone iyojtsi para ma uala ipan ni Tlaltipaktli para ma tijpiakaj yolistli yankuik ipampa ya. Ya ni technextilijtok se teiknelijkayotl tlen melauak. Axtojuantij tikiknelijkej toTeko uan yeka Cristo ualajki. Elki toTeko Dios techiknelik uan yeka techtitlanilik iKone para yajaya elis nopa tlakajkaualistli tlen tlaxtlauas ipampa totlajtlakoljuaj” (1 Juan 4:9, 10).

ToTeotsij “axkitlasomatki iKone” uan temaktilik pampa kinejki techmakixtis nochi tojuantij, yeka tijmatij “nojkia techmakas nochi kuali tlamantli” tlen techtenkauilijtok (Romanos 8:32). ¿Tlake kitenkajtok techmakas? Ma tikitakaj nopa seyok tlamachtili.