Si bo kier conoce un hende mas mihor, ta bon pa haya sa kico el a haci den pasado y ki retonan el a vence pa logra esakinan. Asina tambe, si bo kier siña conoce Dios bon, bo tin cu haya sa loke el a haci den pasado. Lo bo keda sorprendi ora bo haya sa con hopi tur loke Dios a haci ta beneficia nos awor y kico esey tin di haber cu nos futuro.

Jehova ta nos Magnifico Creador, y su “cualidadnan invisibel, esta, su poder eterno y Divinidad, ta ser mira bon cla for di creacion di mundo padilanti, ya cu nan ta bisto den e cosnan traha.” (Romanonan 1:20) “El a traha Tera cu su poder, el a establece mundo cu su sabiduria; y cu su conocemento el a span e cielonan.” (Jeremias 10:12) Y tur e maraviyanan cu tin den creacion ta mustra cu Dios tin amor pa nos.

Pensa un rato riba con hopi Jehova a enrikece nos bida door di traha nos “segun su mes imagen.” (Genesis 1:27) Esey kiermen cu el a crea nos di tal manera cu nos por refleha su cualidadnan incomparabel te na cierto grado. El a crea nos cu spiritualidad, es decir cu e capacidad di compronde su manera di pensa y su normanan. Ora nos ta laga esakinan guia nos den bida, nos lo ta mas feliz y nos bida lo tin mas proposito. Y mas importante ainda, nos lo por bira su amigo.

Nos planeta ta duna prueba cu Dios ta stima nos masha hopi mes. Manera apostel Pablo a bisa, Dios “no a laga di duna prueba ta ken e ta, ya cu el a haci bon, dunando [nos] awasero for di cielo y tempo di bon cosecha, y asina a laga [nos] haya cuminda na abundancia y a yena [nos] curason cu alegria.” (Echonan 14:17) Dios no solamente a percura pa nos necesidadnan basico, sino el a zorg tambe pa duna nos tur loke nos tin mester pa nos por disfruta di bida. Anto tur esaki ta djis un muestra chikito di tur loke e kier haci pa nos.

 Jehova a crea nos planeta di tal manera cu nos por biba pa semper riba dje. Bijbel ta bisa: “Tera el a duna na e yiunan di hende”, y e “no a crea esaki pa e keda bashi, ma el a form’e pa e wordo habita.” (Salmo 115:16; Isaias 45:18) Pero ken lo biba riba dje y pa cuanto tempo? “E hustonan lo hereda e Tera, y lo biba den dje pa semper.”​—Salmo 37:29.

Jehova a crea Adam cu Eva pa biba pa semper. El a pone e prome pareha den un paradijs pa nan “cultiv’e y cuid’e.” (Genesis 2:8, 15) Dios a duna nan un tarea emocionante cu ta consisti di dos parti: “Sea fructifero y multiplica, y yena e Tera y haci esaki somete na bo.” (Genesis 1:28) Kiermen cu Adam cu Eva por a biba feliz riba Tera pa semper. Lamentablemente, nan a scoge pa desobedece Dios y nan a perde e oportunidad di ta entre “e hustonan” cu “lo biba [riba Tera] pa semper.” Sinembargo, manera nos lo mira, loke nan a haci lo no cambia Jehova su proposito ni pa hende ni pa Tera. Pero prome, laga nos ban wak algo mas cu Dios a haci.

Pakico Dios a duna nos su palabra skirbi, esta Bijbel? Wel, esey ta pa nos por siña conoc’e. (Proverbionan 2:1-5) Ta berdad cu Bijbel no ta contesta tur pregunta cu nos por haci tocante Dios; ningun buki lo por haci esey. (Eclesiastes 3:11) Pero tur loke Bijbel ta bisa ta yuda nos conoce Dios. Ora nos les’e, nos ta haya sa con e ta na e manera cu el a trata hende. Nos por mira ki tipo di hende e ta aproba. (Salmo 15:1-5) Nos ta siña cua forma di adoracion e ta acepta, kico ta su normanan moral y kico e ta pensa di cosnan material. Ademas, Bijbel ta yuda nos conoce Dios su personalidad mas mihor mediante loke su Yiu, Hesucristo, a bisa y haci.​—Juan 14:9.

Un otro motibo pakico Jehova a duna nos su Palabra ta pa nos por haya sa con pa hiba un bida feliz y cu tin proposito. Den Bijbel Jehova ta bisa nos kico nos mester haci pa nos por tin un bida di famia feliz. Tambe Jehova ta bisa con nos por sinti nos satisfecho y con pa vence ansiedad. Anto manera nos lo bay mira despues, Bijbel ta contesta e preguntanan mas importante di bida, manera: Dicon tin asina tanto sufrimento? Kico ta spera nos den futuro? Ademas, Bijbel ta splica kico Dios a haci pa cumpli cu su proposito.

Tin mas detaye cu ta haci Bijbel un buki sobresaliente y cu ta mustra cu su autor ta Dios. Aunke rond di 40 homber a skirbie a traves di un periodo di 1.600 aña, Bijbel tin un solo tema central pasobra ta Dios ta su berdadero autor. (2 Timoteo 3:16) Diferente for di tur otro buki di antiguedad, su contenido a keda intacto a traves di tempo, manera miles di manuscrito di Bijbel antiguo ta comproba. Es mas, Bijbel a sobrevivi tur e intentonan cu hende a haci pa e no ser traduci, distribui y lesa. Actualmente Bijbel ta e buki mas bendi y traduci na mundo. E echo cu nos tin Bijbel ta un prueba cu “e palabra di nos Dios ta permanece pa semper.”​—Isaias 40:8.

Dios a haci un areglo special pa sigura nos cu su proposito lo cumpli. Manera nos a menciona caba, Dios su intencion ta pa hende por biba pa semper riba Tera. Pero ora Adam a dicidi di desobedece Dios y a peca, el a perde e oportunidad di biba pa semper pa su mes y tambe pa su yiunan. Bijbel ta bisa: “Pa medio di un hende pica a drenta mundo, y morto pa medio di pica, y asina morto a pasa pa tur hende pasobra nan tur a peca.” (Romanonan 5:12) Como cu Adam a desobedece, por parce cu Dios su proposito lo no cumpli. Pero kico Jehova a haci?

Loke Jehova a haci ta cuadra cu su cualidadnan. El a actua cu husticia y a castiga Adam cu Eva pa nan desobediencia, pero tambe el a mustra amor door di tuma medida pa garantisa futuro di hende. Y Jehova a uza su sabiduria pa wak con pa deal cu e situacion ey, anto di biaha el a bin cu un solucion. (Genesis 3:15) Lo el a libra nos di pica y  morto mediante morto di su Yiu, Hesucristo. Kico esey a encera?

Pa logra kita e efecto di e rebelion di Adam, Jehova a manda Hesus na mundo pa siña hende e caminda pa bida y pa “duna su alma como rescate a cambio di hopi hende.” a (Mateo 20:28; Juan 14:6) Hesus por a paga e rescate pasobra e tabata un homber perfecto manera Adam, pero contrario cu Adam, semper Hesus a keda obediente, hasta te na morto. Como cu Hesus no tabata merece di muri, Jehova a resucit’e y lag’e bolbe bek na cielo. Di e manera ey, Hesus por a logra loke Adam no por a logra, esta, laga hende haya e oportunidad di biba pa semper. “Pasobra mescos cu mediante desobediencia di esun hende ey hopi a bira pecador, asina tambe mediante obediencia di esun persona aki hopi lo bira husto.” (Romanonan 5:19) Pa medio di e sacrificio di Hesus, Dios lo cumpli cu su promesa di laga hende biba pa semper riba Tera.

Nos ta siña conoce Jehova mas mihor na e manera cu el a resolve e problemanan causa pa e rebelion di Adam. Nos por mira cu nada no por stroba Jehova di cumpli cu su proposito; su palabra lo “tin exito sigur.” (Isaias 55:11, NW) Nos ta siña tambe cuanto Jehova ta stima nos. “Pa medio di esaki Dios a revela e amor cu e tin pa nos: Dios a manda su Yiu unigenito na mundo pa nos por haya bida pa medio di dje. E amor ey ta nifica esaki: no ta nos a stima Dios, sino ta e a stima nos y a manda su Yiu como un sacrificio di reconciliacion pa nos picanan.”​—1 Juan 4:9, 10.

Dios “no a spaar ni su mes Yiu, ma a entreg’e na morto pa nos tur”, pa asina nos por tin sigur cu Dios lo “duna nos bondadosamente tur otro cos” cu el a priminti. (Romanonan 8:32) Kico el a priminti di haci pa nos den futuro? Haya sa den e siguiente articulo.