Ikuti naa muyanda kumuzyiba kabotu muntu umwi, inga cainda kubota kuzyiba nzyaakazuzikizya kale mpoonya abuyumuyumu mbwaakazunda. Ncimwi buyo, ikuti kamuyanda kumuzyiba kabotu Leza, mweelede kuzyiba nzyaakacita kale. Mbomuyaabucita oobo, inga mwagambwa kuzyiba nzyaakacita musyule mbozitugwasya lino alimwi ambozibujatikizya buumi bwesu bwakumbele.

Jehova Leza ngo Mulengi wazintu zyoonse, alimwi “bube bwakwe butalibonyi bulalibonya caantangalala kuzwa ciindi naakalenga nyika kuyakumbele, nkaambo bulabonwa muzintu nzyalengede.” (Baroma 1:20) “Walo ngo Mulengi wanyika kwiinda munguzu zyakwe, ooyo wakasitikizya nyika mbotu kwiinda mubusongo bwakwe alimwi ooyo iwakatandabula majulu mumaano aakwe.” (Jeremiya 10:12) Zintu zigambya nzyaakalenga azyalo zilayubununa Leza mbwatubikkila maano.

Atulange-lange Jehova mbwaakatupanga munzila iilibedelede kwiinda mukutulenga “mucinkozya cakwe.” (Matalikilo 1:27) Eeci caamba kuti, wakapa kuti katucikonzya kutondezya bube bwakwe butaliboteli naaba asyoonto buyo. Wakatulenga katujisi bube bwakumuuya, nkokuti bube butugwasya kuzyiba mbwazibona zintu alimwi azyeelelo zyakwe. Mbotuyaabuzumanana kupona kweelana azyeelelo eezyi, tulakkomana kapati alimwi akupona buumi bulaampindu. Pele kwiinda zyoonse, wakapa kuti katucikonzya kuba acilongwe anguwe.

Ciindi notulanga zintu nzyaakalenga Leza anyika, tulabona mbwalimvwa kujatikizya ndiswe. Mumajwi aamwaapostolo Paulo, Leza “tanaakalilekela kubula bumboni nkaambo wakacita zibotu, [wakatupa] mvwula kuzwa kujulu aziindi eelyo nokuba micelo minji, alimwi [wakatukkutya] azilyo akuzuzya myoyo [yesu] akubotelwa.” (Milimo 14:17) Leza wakatupa zintu zinji kutali buyo zyakulya kutegwa tuzumanane kupona. Pele wakatupa zintu zinji ziindene-indene kutegwa katukkomana mubuumi. Pele zyoonse eezyi nkadyonko buyo twayeeya zintu nzyatubambilide kumbele.

 Jehova wakalenga nyika kutegwa bantu kabakkala alinjiyo lyoonse mane kukabe kutamani. Bbaibbele lyaamba kuti: “Nyika wakaipa bana babantu,” alimwi “[tanaakailenga] buyo kakunyina kaambo, pele [wakaibumba] kutegwa kaikkalwa bantu.” (Intembauzyo 115:16; Isaya 45:18) Pele ino kaikkalwa abani alimwi kwaciindi cilamfwu buti? Bbaibbele lyaamba kuti: “Balulami bayookona nyika, alimwi bayookkala alinjiyo lyoonse mane kukabe kutamani.”—Intembauzyo 37:29.

Aboobo, Jehova wakalenga mwaalumi wakusaanguna alimwi amukaintu, Adamu a Eva mpoonya wakababikka munyika yaparadaiso ‘kutegwa kabalima akwiilanganya.’ (Matalikilo 2:8, 15) Leza wakabapa mulimo uukkomanisya naakati: “Amuzyalane muvwule, muzuzye nyika.” (Matalikilo 1:28) Aboobo ba Adamu a Eva bakajisi bulangizi bubotu bwakupona lyoonse anyika. Cuusisya ncakuti, bakasala kutamumvwida Leza aboobo bakasweekelwa bulangizi bwakuba akati kabantu “balulami” balo “bayookona nyika.” Nokuba boobo, kweelana ambotutiibone, nzyobakacita tiizyakacinca makanze aa Jehova kujatikizya ndiswe naa nyika. Calino, atulange-lange cintu acimwi Leza ncaakacita.

Bbaibbele alimwi lyaambwa kuti ndi Jwi lya Leza. Nkaambo nzi Jehova ncaakatupeda Bbaibbele? Wakacita oobo kutegwa twiiye kujatikizya nguwe. (Tusimpi 2:1-5) Kwaamba masimpe, Bbaibbele talikonzyi kuyiingula mibuzyo yoonse njotukonzya kuba anjiyo kujatikizya Leza, alimwi kunyina bbuku likonzya kucita boobo. (Mukambausi 3:11) Nokuba boobo, zyoonse zili mu Bbaibbele zilatugwasya kuti tumuzyibe Leza. Tulamuzyiba bwini mbwabede kwiinda mukubona mbwabalanganya bantu. Tulaiya kujatikizya bantu mbayanda alimwi ambasulide. (Intembauzyo 15:1-5) Tulaiya kujatikizya mbwabubona bukombi, zyeelelo zyakulilemeka alimwi azintu zyakumubili. Alimwi Bbaibbele lilatupandulwida kabotu kujatikizya bube bwa Jehova kwiinda mumajwi alimwi amuzintu nzyaakacita Mwanaakwe, Jesu Kristo.—Johane 14:9.

Kaambo akambi Jehova ncaakatupeda Jwi lyakwe Bbaibbele, nkakuti tuzyibe mbotukonzya kupona buumi bukkomanisya alimwi bulaampindu. Mu Bbaibbele, Jehova ulatwaambila mbotukonzya kuba amukwasyi uukkomene, mbotukonzya kukkutila azintu nzyotujisi alimwi ambotukonzya kulwana penzi lyakuciindizya kulibilika. Kweelana ambokutiipandululwe mumagazini eeyi, Bbaibbele lilijisi bwiinguzi kumibuzyo iiyandika kapati, mbuli yakuti: Nkaambo nzi ncokuli mapenzi manji boobu? Ino zintu ziyooba buti kumbele aamazuba? Alimwi lilapandulula Leza ncaakacita kale kutegwa makanze aakwe aakusaanguna akazuzikizyigwe.

Kwaamba masimpe, Bbaibbele ndibbuku ligambya kapati. Kuli twaambo atumbi tunji tutondezya kuti Bbaibbele ndibbuku lilibedelede nkaambo Mulembi wandilyo ngu Leza. Lyakatola myaka iinda ku 1,600 kalilembwa abantu babalilwa ku 40, nokuba boobo lijisi mutwe wamakani mupati omwe nkaambo Leza ngo Mulembi wandilyo. (2 Timoteyo 3:16) Mukwiimpana amabbuku aambi aakaindi, nokuba kuti lyakkala kwamyaka minji, Bbaibbele licisyomeka kweelana ambwaatondezya malembe manji aakaindi aamba zyamu Bbaibbele. Kuyungizya waawo, Bbaibbele lyazumanana kubako nokuba kuti bantu bamwi bali kusola kukasya kuti lisandululwe, limwaigwe alimwi akubalwa. Mazuba aano, Bbaibbele ndebbuku limwaigwa kapati alimwi akusandululwa. Kubako kwa Bbaibbele ncitondezyo cakuti “ijwi lya Leza wesu linooliko lyoonse mane kukabe kutamani.”—Isaya 40:8.

Cintu acimbi Leza ncaakacita, mbubambe bwaalubazu businizya kuti makanze aakwe kujatikizya ndiswe ayoozuzikizyigwa ncobeni. Kweelana ambokwaambwa kale, makanze a Leza aakusaanguna akali aakuti bantu kabakkala anyika lyoonse. Nokuba boobo, ciindi Adamu naakasala kutamumvwida Leza mpoonya akubisya, wakasweekelwa coolwe cakupona buumi butamani kutali buyo alikke, pele alimwi abana bakwe ibakali kuyoozyalwa kumbele. Bbaibbele lyaamba kuti: ‘Cibi cakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.’ (Baroma 5:12) Kutamvwida kwamuntu kwaakanyonganya makanze aa Leza. Ino Jehova wakacita buti?

Nzyaakacita Jehova zileendelana abube bwakwe. Cabululami, Leza wakapa buyo ba Adamu a Eva mulandu akaambo kamicito yabo, pele caluyando wakabikka bubambe bumwi bwakugwasya bana babo bakumbele. Akaambo kabusongo bwakwe, Jehova wakazyiba mbwaakeelede kucita mubukkale oobu, mpoonya cakutasowa ciindi wakaamba nzila njaakali kuyoobelesya. (Matalikilo 3:15) Nzila yakuzwa mucibi  alufwu yakali kuyoopegwa kwiinda mu Mwana wa Leza, Jesu Kristo. Ino eeci cakali kujatikizya nzi?

Kutegwa anunune bantu kuzwa kumapenzi aakaboola akaambo kabuzangi bwa Adamu, Jehova wakatuma Jesu anyika kuti azooyiisye bantu nzila iitola kubuumi alimwi “akupa buumi bwakwe kuti bube cinunuzyo cakununuzya banji.” a (Matayo 20:28; Johane 14:6) Jesu wakali kweelela kupa cinunuzyo nkaambo wakali muntu uulondokede mbuli Adamu. Pele mukwiimpana a Adamu, Jesu wakazumanana kumvwida, mane kusikila ciindi naakafwa. Mbwaanga Jesu tanaakeelede kufwa, Jehova wakamubusya kutegwa apiluke kujulu. Jesu lino wakali kukonzya kucita ncaakaalilwa kucita Adamu, nkokuti kupa bantu bamvwida bulangizi bwakupona buumi butamani. Bbaibbele lyaamba kuti: “Nkaambo mbubonya ibanji mbobakaba basizibi kwiinda mukutamvwida kwamuntu omwe, mbubonya buyo kwiinda mukumvwida kwamuntu omwe ibanji bayooba balulami.” (Baroma 5:19) Kwiinda mucinunuzyo cacipaizyo ca Jesu, Leza uyakucizuzikizya cisyomezyo cakwe cakuti bantu bakapone anyika lyoonse mane kukabe kutamani.

Kuli zinji nzyotwiiya kujatikizya Jehova mbwaakacita kumapenzi aakaba akaambo kakutamvwida kwa Adamu. Twabona kuti kunyina cikonzya kukasya Jehova kumanizya cintu ncaakatalisya; ijwi lyakwe “ncobeni liyoozwidilila.” (Isaya 55:11) Alimwi tulaiya kubona Jehova mbwatuyanda kapati. Bbaibbele lyaamba kuti: “Lino oobu mbolwakayubununwa luyando lwa Leza kulindiswe, Leza wakatuma Mwanaakwe simuzyalwaalikke munyika ikutegwa tukonzye kuba abuumi kwiinda mulinguwe. Iluyando lwaambwa waawa taluli akaambo kakuti swebo twali kumuyanda Leza pe, pele walo nguwakatuyanda akutuma Mwanaakwe kuti abe cipaizyo cakumanya zibi zyesu akutuyanzanya a Leza.”—1 Johane 4:9, 10.

Leza “tanaakalesya Mwanaakwe mwini kupenga, pele wakamulekela kuti atufwide swebo toonse,” aboobo tulisinizyide kuti Leza ‘uyootupa zintu zimbi zyoonse’ zyalo nzyaakasyomezya. (Baroma 8:32) Ino ncinzi Leza ncaasyomezya kutucitila? Amuzumanane kubala.