Ke o kɛ nyagba ko ngɛ kpee ɔ, atsinyɛ jemi ko be he kaa o maa suɔ nɛ o huɛ kpakpa ko nɛ e pee nɔ́ ko kɛ ye bua mo. Ngɛ enɛ ɔ nɛ wa le ɔ tsuo se ɔ, nihi fuu deɔ ke a kɛ Mawu be nyɛe maa pee huɛ ejakaa a susu kaa e pee we nɔ́ ko kɛ yi bua mɛ. Ngɛ anɔkuale mi ɔ, Mawu pee níhi nɛ́ wa ma ná he se momo. Jehanɛ se hu ɔ, e maa kpale je haomihi kɛ nɔ́ namihi nɛ waa kɛ ngɛ kpee mwɔnɛ ɔ tsuo kɛ je. Mɛni Mawu maa pee?

Mawu ma je níhi nɛ ngɔɔ yi wu tso ní peemihi kɛ baa kɛ je, nɛ enɛ ɔ ma ha nɛ yi wu tso ní peemihi tsuo a se maa po. Baiblo ɔ tsɔɔ nɔ́ he je nɛ yi wu tso ní peemihi ngɛ nɔ yae ɔ. E de ke: “Wa le kaa wa je Mawu mi, se je ɔ tsuo lɛɛ, nɔ yayami ɔ nɛ ngɛ lɛ kudɔe.” (1 Yohane 5:19) Jamɛ a “nɔ yayami ɔ” nɔuu nɛ Yesu tsɛ lɛ ke “je nɛ ɔ nɔ yelɔ ɔ,” nɛ ji Satan Abosiami. (Yohane 12:31) Satan ngɛ adesahi nɛ a ngɛ je ɔ mi ɔ a nɔ he wami náe, nɛ lɔ ɔ lɛ ha nɛ ní yayamihi ngɛ nɔ yae ngɛ zugba a nɔ mwɔnɛ ɔ nɛ. Mɛni Mawu maa pee?

Yehowa Mawu maa gu e Bi Yesu Kristo nɔ kɛ “kpata nɔ nɛ e ma nyɛ maa gbe nɔ, nɛ ji Abosiami ɔ hɛ mi.” (Hebri Bi 2:14; 1 Yohane 3:8) Ngɛ anɔkuale mi ɔ, Baiblo ɔ tsɔɔ kaa Abosiami nitsɛ le kaa “be bɔɔ pɛ nɛ e ngɛ” nɛ́ a kɛ ma kpata e hɛ mi. (Kpo Jemi 12:12) Kɛ piɛɛ he ɔ, Mawu ma je nihi tsuo nɛ a peeɔ ní yayami ɔmɛ kɛ je.​—La 37:9; Abɛ 2:22.

Ke Mawu je yi wu tso ní peemihi tsuo kɛ je ta a, e ma ha nɛ e yi mi tomi kaa adesahi nɛ a hi si ngɛ zugba a nɔ kɛ ya neneene ɔ maa ba mi. Mɛni níhi wa ma nyɛ maa hyɛ blɔ?

Tue mi jɔmi kɛ he piɛ pomi kɛ ya daa. “Nihi nɛ a he jɔ ɔ, mɛɛ a maa hi zugba a nɔ ngɛ kplɔkɔtɔ, kɛ tue mi jɔmi mi.”​—La 37:11.

Niye ní kpakpa maa ba babauu. ‘Zugba a maa ba ní saminya, nɛ a ma ná blɛfo babauu ngɛ yo ɔmɛ tsuo pɛpɛɛpɛ a nɔ.’​—La 72:16.

We kpakpahi kɛ ní tsumi nɛ ma ha wa tsui nɛ nɔ wa mi. “A maa po wehi, nɛ mɛ nitsɛmɛ a maa hi mi; a maa pee wai ngmɔhi, nɛ mɛ nitsɛmɛ a maa ye a mi yiblii. . . . A ma ná mɛ nitsɛmɛ a nine nya ní tsumi mi ní maa ye, nɛ a bua maa jɔ a he saminya.”​—Yesaya 65:21, 22.

Anɛ o suɔ nɛ o ná si himi nɛ ɔ mi blɔ fami nɔ́ lo? E be kɛe nɛ si himi nɛ ɔ maa ba.

Mwɔnɛ ɔ, nɔ ko be nyɛe maa tu hiɔ kɛ gbenɔ nya fo, se e be kɛe nɛ lɛ tsuo se maa po. Mawu maa ngɔ Yesu kpɔmi afɔle sami ɔ kɛ tsu ní konɛ “nɔ fɛɛ nɔ nɛ e heɔ lɛ yeɔ ɔ, a ko kpata e hɛ mi, mohu ɔ, e ná neneene wami.” (Yohane 3:16) Mɛni maa jemi kɛ ba?

Hiɔ be si hie hu. “Nihi nɛ ngɛ zugba a nɔ ɔ, a ti nɔ kɔ nɔ ko be dee hu ke, ‘I be he wa mi.’ A maa ngɔ ma a tsuo a he yayami kɛ pa mɛ.”​—Yesaya 33:24.

Gbenɔ be adesahi a nya dooe hu. ‘Nyɔmtsɛ Mawu maa ye gbenɔ nɔ kunimi; e ma tsu nɔ tsuaa nɔ hɛ mi vo nyu, nɛ e ma je zo nɛ gbe e ma a ngɛ je ɔ mi tsuo ɔ kɛ je. Yehowa lɛ de.’​—Yesaya 25:8.

Nihi maa hi si kɛ ya neneene. “Nike ní nɛ Mawu kɛ haa ji neneene wami kɛ gu Kristo Yesu, wa Nyɔmtsɛ ɔ nɔ.”​—Roma Bi 6:23.

Nihi nɛ a gbo ɔ maa ba wami mi ekohu. “A ma tle nihi nɛ a da kɛ nihi nɛ a dɛ tsuo si kɛ je gbeje” (Ní Tsumi 24:15) A ma ná Mawu nike ní nɛ ji kpɔmi nɔ́ ɔ he se.

Mɛni blɔ nɔ Mawu maa gu kɛ pee ní nɛ ɔmɛ tsuo?

Mawu ma ha e yi mi tomi kɛ ha adesahi kɛ zugba a maa ba mi kɛ gu hiɔwe nɔ yemi ko nɛ e hla Yesu Kristo kaa Nɔ Yelɔ ngɛ nya a nɔ. (La 110:1, 2) Nɔ yemi aloo matsɛ yemi nɛ ɔ nɛ Yesu de e kaseli ɔmɛ ke a sɔle ngɛ he ɔ nɛ. E ke a sɔle ngɛ he ke: “Wa Tsɛ nɛ o ngɛ hiɔwe, . . . ha nɛ o Matsɛ Yemi ɔ nɛ ba.”​—Mateo 6:9, 10.

Mawu Matsɛ Yemi ɔ maa ye je ɔ tsuo nɔ, nɛ e ma je aywilɛho kɛ nɔ́ nami tsuo kɛ je. Matsɛ Yemi nɛ ɔ ji nɔ yemi kpakpa nɛ adesahi ma nyɛ ma ná! Enɛ ɔ he je nɛ Yesu ngɔ e nyɛmi tsuo kɛ fiɛɛ “Matsɛ Yemi ɔ he sane kpakpa a” benɛ e ngɛ sɔmɔe ngɛ zugba a nɔ ɔ, nɛ e de e se nyɛɛli ɔmɛ ke mɛ hu a pee jã nɔuu.​—Mateo 4:23; 24:14.

Akɛnɛ Yehowa Mawu ngɛ suɔmi kɛ ha adesahi he je ɔ, e wo si kaa e maa pee ní kpakpa nɛ ɔmɛ tsuo kɛ ha mɛ. Anɛ enɛ ɔ ha we nɛ o bua nɛ jɔ kaa o maa le lɛ konɛ o hɛ kɛ su e he lo? Ke o pee jã a, mɛni se o ma ná? Munyu nɛ nyɛɛ se ɔ maa tsɔɔ mi.