Ibale ndutu i nkwél we, ibabé pééna u yé u mbem le loñge yoñ liwanda i hôla we. Ni i mahoñol ma, ngandak bôt i nkal le Nyambe a ta bé loñge liwanda inyule ba nôgda le Djob a mboñ bé to yom inyu hôla bo. Maliga ma yé le, ha beh le Djob a ma boñ ngandak mam inyu loñge yés, a ga yoñ ki bitelbene le di yémbél mandutu momasôna ni njôghe yosôna di nok i len ini. Kii Djob a ga boñ?

Nyambe a ga mélés béba letee ni i nkañ. Bibel i nyelel njee a yé nkañ u ngéda i nkal le: “Nkoñ ‘isi wonsôna u niñi isi ane mut mbe.” (1 Yôhanes 5:19) “Mut mbe” nunu a yé nu Yésu a bi sébél le “ñane nkoñ isi,” hala wee Nsohop Satan. (Yôhanes 12:31) Bémbe i Satan i ngii nkoñ isi yon i yé njom i bisu i mandutu hana isi. Kii Djob a ga boñ?

Ndék ngéda, Yéhôva Nyambe ni njel man wé Yésu, a ga “tjé nu a gwé ngui i nol, hala wee Nsohop.” (Lôk Héber 2:14; 1 Yôhanes 3:8) I pot maliga, Bibel i nkal le yak Satan nyemede a nyi le “a ngi gwé ndigi ndék isii ngéda.” (Masoola 12:12) Djob a ga tjé yak ba bobasôna ba mboñ béba.​—Tjémbi 37:9; Bingéngén 2:22.

Mbus le a mélés béba hana nkoñ isi, Nhek wés a ga yoñ bitelbene i yônôs njômbi yé inyu bôt ba binam hana isi i boga ni boga. Ndi kii di nla nyamnda ni ngôñ i bem?

Nsañ ni nwee ibabé nwaa. ‘Bôt ba suhulnyu b’a kôdôl hisi, b’a nok ki lingoñoo inyu ngandak nsañ.’​—Tjémbi 37:11.

Bijek bilam iloo hihéga. ‘Blé i ga ba ngandak hana ‘isi yak ikepam ngi mababat ma dikôa.’​—Tjémbi 72:16.

Loñge bôlô ni mandap malam. “Ndi b’a oñ mandap, ba yén ki mu; b’a bel nwom mi minkôô mi wai, ba je ki matam map. . . . Mintebek nwem mi bôt ki nw’a togbene minson mi moo map ntandaa ngéda.”​—Yésaya 65:21, 22.

Baa u gwé ngôñ i tehe mahéñha ma? I ngi yii ndigi ndék ngéda le hala a ba kom kel inyu hiki mut.

I len ini bôt bobasôna ba gwé le ba nkon, ba wok ki, ndi hala a ga nom bé ntandaa ngéda. Ndék ngéda, Nyambe a ga umbe bés bisai bi bi nlôl i sesema i binoñ i Yésu inyu boñ le “hiki mut a ñunda le a nhémle nye a tjiba bañ, ndi a bana niñ boga.” (Yôhanes 3:16, MN.) Lisuk li ga ba lelaa?

Makon ma ga mal. “Mut nye ki nye a nyééne mu nkoñ u a’ kal bé le: ‘Me nkon.’ Bôt ba nyééne mu ba mal kôs nwéhél inyu liboñok jap libe.”​—Yésaya 33:24.

Nyemb i ga ba ha bé himala inyu bôt ba binam. “A’ milba nyemb i mba ni mba, Nwet le Yéhôva a’ tos ki gwiiha masu map momasôna.”​—Yésaya 25:8.

Bôt ba ga niñ mba ni mba. “Likébla li karis li Nyambe li yé niñ boga i Kristô Yésu Nwet wés.”​—Rôma 6:23.

Bawoga ba ga tuglana. “Bitugne gw’a ba inyu ba ba téé sép ni ba ba téé bé sép.” (Minson mi baôma 24:15) Ba ga kôhna bisai Djob a nti ni  njel binoñ.

Lelaa Djob a ga yônôs mam ma momasôna?

Djob a ga yônôs njômbi yé inyu bôt ba binam ni njel Ane i a bi téé i ngii, ñéga yo a bak Yésu Kristô. (Tjémbi 110:1, 2) I yé ngim énél, tole ane, i Yésu a bi niiga banigil bé i soohe haana le: “A Tata wés nu a yé ngii, . . . Ane yoñ i lo.”​—Matéô 6:9, 10.

I Ane i Djob i, i ga énél hisi, i ga mélés njôghe ni mandutu. Inyu hala nyen Yésu a bi boñ biliya i añal “ñañ nlam u Ane” ngéda a bé hana isi, a kal ki banigil bé le ba boñ nlélém.​—Matéô 4:23; 24:14.

Inyu ngandak gwéha a ngwés bôt ba binam, Yéhôva Nyambe a bi bôn le a ga boñ i mam malam ma momasôna inyu yap. Baa hala a nti bé we ngôñ i yéñ yi nye ni i kôôge nye bebee? Ibale u mboñ hala, bimbe bisai u ga kôhna? I yigil i i noñ ha, i ga toñol bisai bi.