Tingki susa hita, pos do rohanta urupan ni ale-alenta do hita. Alai adong do halak na mandok, Debata i ndang boi gabe ale-alenta ala didok roha nasida ndang diurupi nasida tingki susa. Alai sasintongna, Debata ndang holan mangalehon na denggan tu hita. Adong do na laho ulahononna asa malua hita sian hasusaan. Aha ma i?

Ndang adong be hajahaton haduan. Alana, ripashonon ni Debata nama na parohon hajahaton i. Di Bibel dipaboa do ise na parohon hajahaton. Didok do, “Di bagasan huaso ni Sibolis do saluhut portibi on.” (1 Johannes 5:19) Jala didok Jesus do, “Sibolis” i “parhuaso ni portibi on”. (Johannes 12:31) Sibolis do na mambahen portibi on gabe gok hajahaton. Jadi aha ma na laho ulahonon ni Debata?

Satongkin nai marhite Jesus, ripashonon ni Debata Jahowa ma “Sibolis na parohon hamatean i”. (Heber 2:14; 1 Johannes 3:8) Sasintongna didok di Bibel, Sibolis pe diboto do “otik nama tingkina”, alana laho diripashon do ibana. (Pangungkapon 12:12) Dohot do angka halak na jahat diripashon Debata.​—Psalmen 37:9; Poda 2:22.

Dung diripashon Debata hajahaton sian tano on, pasautonna ma sangkapna tu jolma dohot tu tano on. Satongkin nai, aha do na laho masa?

Dame jala aman ma portibi on. “Sai na teanon ni angka parlambohi do sogot tano i, jala hahilashononna hinadeak ni hadameon.”​—Psalmen 37:11.

Gok sipanganon. “Jadi gabe situtu ma eme di tano on ro di punsu ni angka dolok”.​—Psalmen 72:16.

Jabu na denggan jala karejo na palashon roha. “Paulionnasida ma angka bagas, laos inganannasida, suanonnasida ma hau anggur jala panganonnasida parbuena. . . . Jala jadijadian ni tangannasida ingkon halak na hupillit marsaulihonsa.”​—Jesaya 65:21, 22.

Olo do hamu mangkilala sisongon i? Satongkin nai, i ma na laho tahilala ganup ari.

Sude do halak saonari boi hona sahit jala mate, alai satongkin nai ndang songon i be. Alana laba ni tobusan ni Jesus, i ma “asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna”. (Johannes 3:16) Jadi, i ma na laho pasauton ni Debata. Aha ma na laho masa?

Ndang adong be sahit. “Na so tupa be dohonon ni pangisina: Na gale do ahu, ai bangso na maringan disi nunga maruli hasesaan ni dosa.”​—Jesaya 33:24.

Ndang adong be hamatean. “Bondutonna ma hamatean salelenglelengna jala apusan ni Tuhan Jahowa ma iluilu sian nasa bohi.”​—Jesaya 25:8.

Mangolu saleleng-lelengna ma sude jolma. “Silehon-lehon ni Debata do hangoluan na saleleng ni lelengna marhite Kristus Jesus Tuanta.”​—Rom 6:23.

Dipahehe ma sude angka halak na naung mate. “Na adong do haheheon tu halak na burju dohot halak na jahat.” (Ulaon ni Apostel 24:15) Ala adong do tobusan umbahen na masa i tu nasida.

Songon dia do Debata pasauthon i sude?

Pasauton ni Debata ma sangkapna tu jolma dohot tu tano on marhite sada harajaon di surgo. Jala Jesus ma Rajana. (Psalmen 110:1, 2) Harajaon on do na dipaboa Jesus tingki mangajari siseanna martangiang. Didok do, “Ale Amanami na di banua ginjang, . . . sai ro ma Harajaonmu.”​—Mateus 6:9, 10.

Harajaon ni Debata ma annon na mamarenta di tano on. Salpuhononna ma sude hasusaan dohot parungkilon. Ndang hea dope adong pamarentaon na songon on! I do alana marsitutu do Jesus mamaritahon “barita na uli taringot tu Harajaon” i tingki di tano on. Jala dijujui ibana do angka siseanna asa dohot mamaritahon i.​—Mateus 4:23; 24:14.

Ala holong do roha ni Jahowa tu jolma, dijanjihon Ibana do on sude tu hita. Pasti gabe lomo do rohanta mananda Ibana jala marale-ale tu Ibana. Molo diulahon hamu i, adong do labana tu hamu. Aha ma i? Dipaboa do i di artikel na mangihut.