Sɛ e le e janvuɛ kpa kun naan sa ɲan e’n, e lafi su kɛ ɔ́ súan e bo. I sɔ’n ti’n, sran wie’m be waan Ɲanmiɛn timan e janvuɛ. Afin ɔ yo be kɛ, kɛ sa kekle tɔ be su’n, Ɲanmiɛn yoman like fi manman be sa. Nga be wunmɛn i wlɛ’n, yɛle kɛ Ɲanmiɛn yoli ninnge kpanngban mannin e. Kpɛkun ɔ́ wá yó ninnge wie mun naan sa kwlaa nga be o e su’n, be wie. ?Ngue yɛ Ɲanmiɛn wá yó-ɔ?

Kɛ ɔ ko yo naan sa tɛtɛ kwlaa b’a wie’n, Ɲanmiɛn wá núnnún sran ng’ɔ kpɛli be ba’n. Biblu’n kan sran sɔ’n i ndɛ. Ɔ se kɛ: “Mɛn wunmuan’n wo klunwifuɛ’n i sa nun.” (1 Zan 5:19) Klunwifuɛ sɔ’n yɛle mmusu’m be si Satan. Zezi seli kɛ Satan yɛ ɔ “sie mɛn” nga-ɔ. (Zan 12:31) I ti yɛ sran’m be wun be ɲrun dan-ɔn. ?Ngue yɛ Ɲanmiɛn wá yó-ɔ?

Ɔ ka kan’n, Ɲanmiɛn Zoova maan i Wa Zezi Klisi wá “núnnún Suɛn tɔnfuɛ mɔ i ti yɛ sran wu’n, i mlɔnmlɔn.” (Ebre Mun 2:14; 1 Zan 3:8) Biblu’n se kɛ mmusu’m be si Satan bɔbɔ “si kɛ i blɛ’n w’a sɔnman kun.” (Sa Nglo Yilɛ 12:12) Ɲanmiɛn wá núnnún be kwlaa nga be klun yo wi’n.—Jue Mun 37:9; Nyanndra Mun 2:22.

Ɲanmiɛn seli kɛ asiɛ’n káci lika klanman yɛ sran mɔ fɔ nunman be nun’n bé trán su tititi. Kɛ ɔ ko nunnun klunwifuɛ mun’n, yɛ i klun sa sɔ’n kpɛ́n su-ɔ. ?Blɛ sɔ’n nun’n mɛn’n yó sɛ?

Fɔundi nin alaje. “Yalɛfuɛ mun yɛ mɛn’n ɔ́ wá yó be liɛ-ɔ. Bé wún jɔ́ be kpa fɔuun!”—Jue Mun 37:11.

Aliɛ’n bú. “Maan ble’n ɔ su lele ɔ bu mɛn’n nun. Maan kpɔlɛ’m be su’n, be wun kɛ aunngban’n ɔ keje ble ja kpanngban.”—Jue Mun 72:16.

Junman nin sua kpakpa mun. “Sɛ min sran’m be kplan sua’n, bé trán be nun, sɛ be ta vinyi’n, bé dí i su mma. [...] Yɛ min sran kpa’m bé dí be bɔbɔ be sa nuan ninnge’m be su.”—Ezai 65:21, 22.

?A kunndɛ kɛ sa kwlaa nga Biblu’n kan be ndɛ lɛ’n, be ju? Ɔ ka kan’n, be kwlaa nga bé wá trán mɛn klanman’n nun’n, bé ɲán ninnge sɔ mun tititi.

Andɛ’n, e ngba e tɔ tukpacɛ kpɛkun e wu. Sanngɛ ɔ su yoman sɔ kun. Ɲanmiɛn wá yó maan sran’m bé ɲán tɛ nga Zezi fɛli i wun yili’n, i su ye. I liɛ’n, be kwlaa nga be lafi Zezi su’n, be su mlinman, sanngɛ bé “ɲán nguan m’ɔ leman awieliɛ’n.” (Zan 3:16) ?Kɛ ɔ ko yo sɔ’n, sran’m be liɛ yó sɛ?

Sran’m be su tɔman tukpacɛ kun. “Zerizalɛmfuɛ’n wie fi su seman kɛ: ‘N kpinndinman.’ B’a yaci be mɔ be tran Zerizalɛm’n be sa tɛ’n w’a cɛ be.”—Ezai 33:24.

Sran’m be su wuman kun. “Ɔ́ núnnún wie’n mlɔnmlɔnmlɔn. Anannganman ɔ́ núnnún sran’m be kwlaa be nyinmuɛn’n.”—Ezai 25:8.

Sran’m bé trán nguan nun titi. “Like nga Ɲanmiɛn fa cɛ e’n, yɛle nguan m’ɔ leman awieliɛ’n Klisi Zezi m’ɔ ti e Min’n i ti.”—Rɔmunfuɛ Mun 6:23.

Be nga be wuli’n, bé sá be sin nguan nun ekun. “N lafi Ɲanmiɛn su kɛ be nga be yoli sa kpa-o, be nga b’a yoman sa kpa-o, bé cɛ́n.” (Sa Nga Be Yoli’n 24:15) E ti tɛ mɔ Ɲanmiɛn yili’n ti’n, be nga be wuli’n, bé cɛ́n nguan.

?Ngue yɛ Ɲanmiɛn wá yó naan i kwlaa sɔ’n w’a kpɛn su-ɔ?

Kɛ ɔ ko yo naan Ɲanmiɛn w’a yo like ng’ɔ seli kɛ ɔ́ yó mán sran mun asiɛ’n su’n, ɔ takali awa kun ɲanmiɛn su lɔ. Kpɛkun ɔ kpali Klisi Zezi kɛ ɔ yo i su Famiɛn. (Jue Mun 110:1, 2) Zezi seli i sɔnnzɔnfuɛ’m be kɛ be srɛ naan Famiɛn dilɛ sɔ’n i blɛ’n ju. I waan kɛ bé srɛ́ Ɲanmiɛn’n, maan be se kɛ: “E Si m’ɔ o ɲanmiɛn su lɔ’n, [...] maan ɔ Famiɛn dilɛ’n i blɛ’n ju.”—Matie 6:9, 10.

Ɲanmiɛn wá síe asiɛ’n sufuɛ mun, kpɛkun ɔ́ yó maan be su afɛ’n nin ɲrɛnnɛn kwlaa bé wíe. Ɲanmiɛn i Famiɛn dilɛ’n i kunngba cɛ yɛ ɔ kwla yo sran’m be ye sakpa-ɔ. I sɔ’n ti’n, i nun mɔ Zezi o asiɛ’n su wa’n, ɔ boli “Ɲanmiɛn i Famiɛn dilɛ’n i jasin fɛ’n” kleli sran mun. Kpɛkun ɔ wlɛli i sɔnnzɔnfuɛ’m be fanngan kɛ be yo sɔ wie.—Matie 4:23; 24:14.

Klolɛ dan mɔ Ɲanmiɛn Zoova klo sran mun ti’n, i waan ɔ́ yó ninnge ɲɛnmɛnɲɛnmɛn sɔ mun mán be. ?A kloman kɛ á sí i naan á fá ɔ wun mɛ́ntɛn i? ?Sɛ a fɛ i sɔ ajalɛ’n, i su ye benin yɛ á ɲɛ́n i-ɔ? Ndɛ akpasua nga i sin liɛ’n wá yíyí nun.