Pag may problema ka, aasahan mo na sarong marahay na amigo an magibo nin paagi para tabangan ka. Huli kaiyan, sinasabi kan iba na an Diyos bako nindang amigo huling pagmati ninda mayo man ginigibo an Diyos para tabangan sinda. Pero an totoo, kadakul nang ginibo an Diyos para sa sato, asin may gigibuhon pa siya para halion an gabos na problema saka pagsakit na inaatubang niyato ngunyan. Ano an gigibuhon nin Diyos?

Tatapuson nin Diyos an gabos na karatan paagi sa paghali kan gikanan kaiyan. Sinasabi kan Bibliya kun siisay an gikanan na iyan nin karatan: “An bilog na kinaban nasa kapangyarihan kan saro na maraot.” (1 Juan 5:19) An “saro na maraot” iyo man sana idtong inapod ni Jesus na “an tagapamahala kan kinaban na ini,” si Satanas na Diyablo. (Juan 12:31) An impluwensiya ni Satanas sa kinaban nin katawuhan an pinakadahilan kan makamumundong mga kamugtakan sa daga. Ano an gigibuhon nin Diyos?

Madali nang humiro an Diyos na Jehova paagi sa saiyang Aki, si Jesu-Cristo, tanganing ‘laglagon an saro na igwa kan kakayahan na magkawsa nin kagadanan, an buot sabihon, an Diyablo.’ (Hebreo 2:14; 1 Juan 3:8) An totoo, ipinapahiling kan Bibliya na aram mismo kan Diyablo na “halipot na sana an saiyang panahon” bago siya laglagon. (Kapahayagan 12:12) Lalaglagon man nin Diyos an gabos na naggigibo nin maraot.—Salmo 37:9; Talinhaga 2:22.

Pagkatapos na tapuson an gabos na karatan sa daga, an satong Kaglalang mahiro tanganing utubon an saiyang daing sagkod na katuyuhan para sa katawuhan asin sa daga. Ano an malalauman niyato?

Nagdadanay na katuninungan asin katiwasayan. ‘An mga mahuyo magmamana kan daga, asin magkakararanga nin labi-labi sa katuninungan.’—Salmo 37:11.

Abunda asin masustansiyang kakanon. ‘An daga magkakaigwa nin dakul na kakanon, an kabubuludan matatahuban nin mga tinanom.’—Salmo 72:16, An Marahay na Bareta Biblia.

Komportableng mga harong asin nakakakontentong trabaho. ‘Magpapatirindog sinda nin mga harong, asin mag-uuruntok sinda diyan, maggigiribo sinda nin mga ubasan asin kakakanon ninda an mga bunga kaiyan. . . . [Papakinabangan] kan sakuyang mga pinili an mga gibo nin saindang mga kamot.’—Isaias 65:21, 22.

Gustong-gusto mo na daw na mangyari an mga bagay na iyan? Dai mahahaloy, aroaldaw na maeeksperyensiyahan iyan kan gabos.

An gabos sa sato ngunyan nagkakahilang asin nagagadan, alagad madali nang magbago an siring na kamugtakan. Dai mahahaloy, itatao na nin Diyos an mga pakinabang kan atang na pantubos ni Jesus tanganing an “siisay man na nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Ano an magigin resulta?

Mawawara na an hilang. ‘Mayong [residente] an magsasabi: “Naghihilang ako.” An banwaan na mag-uuntok sa [daga] papatawadon kan saindang kasalan.’—Isaias 33:24.

Mawawara na an kagadanan. ‘Hahalunon niya an kagadanan sa kapangganahan asin papahidon kan [Soberanong] Kagurangnan [na Jehova] an gabos na luha kan gabos na lalawgon.’—Isaias 25:8.

An mga tawo mabubuhay sagkod lamang. “An regalo nin Diyos iyo an buhay na daing katapusan paagi ki Cristo Jesus na satuyang Kagurangnan.”—Roma 6:23.

Bubuhayon liwat an mga nagadan. “Bubuhayon liwat nin Diyos an mga matanos pati an mga bakong matanos.” (Gibo 24:15) Makikinabang sinda sa regalo nin Diyos na pantubos.

Paano uutubon nin Diyos an gabos na ini?

Uutubon nin Diyos an saiyang katuyuhan para sa katawuhan asin sa daga paagi sa sarong gobyerno sa langit, na an piniling Tagapamahala iyo si Cristo Jesus. (Salmo 110:1, 2) Ini an gobyerno, o kahadian, na itinukdo ni Jesus sa saiyang mga parasunod na ipamibi kan sabihon niya: “Ama niyamo na nasa langit, . . . dumatong lugod an Kahadian mo.”—Mateo 6:9, 10.

Mamamahala an Kahadian nin Diyos sa daga asin hahalion an gabos na kulog asin pagsakit. An Kahadian na ini an pinakamarahay na gobyernong mamamahala sa katawuhan! Iyan an dahilan kun taano ta nagmaigot si Jesus na ipahayag an “maugmang bareta kan Kahadian” durante kan saiyang ministeryo sa daga asin sinabi niya sa saiyang mga disipulo na gibuhon man iyan.—Mateo 4:23; 24:14.

Huli sa dakulang pagkamuot niya sa katawuhan, nanunuga an Diyos na Jehova na gigibuhon niya an gabos na magagayon na bagay na ini para sa sainda. Dai ka daw napapahiro kaiyan na lalo pang midbidon asin maparani sa saiya? Anong mga pakinabang an kakamtan mo sa paggibo kaiyan? Ipapaliwanag iyan sa masunod na artikulo.