Sipos yu fesem hadtaem, yu save se gudfala fren blong yu bambae i halpem yu. Taswe, sam man oli talem se God i no fren blong olgeta from we hem i no mekem wan samting blong givhan long olgeta. Be, blong talem stret, God i mekem plante samting finis blong givhan long yumi, mo bambae hem i mekem plante moa samting yet blong stretem ol trabol we oli mekem yumi safa. ?Bambae hem i mekem wanem?

God bambae i spolem stamba blong ol rabis fasin. Baebol i talem hu nao i stamba, i se: “Fulwol i stap long paoa blong Man ya we i rabis.” (1 Jon 5:19) “Man ya we i rabis” hemia Setan, mo Jisas i talem se hem i “rulum wol ya.” (Jon 12:31) Ol trabol long wol tede i kamaot long paoa blong Setan. ?God bambae i mekem wanem?

I no longtaem, Jehova God bambae i yusum Pikinini blong hem Jisas, blong “finisim Setan, hemia man ya we i gat paoa blong mekem man i ded.” (Hibrus 2:14; 1 Jon 3:8) Baebol i soemaot se Setan i save se “i gat smol taem nomo blong hem i stap yet.” (Revelesen 12:12) Mo tu, God bambae i finisim ol man we oli mekem rabis fasin.—Ol Sam 37:9; Ol Proveb 2:22.

Afta we God i finisim ol rabis fasin, bambae hem i mekem plan blong hem long saed blong wol mo ol man, i kamtru blong olwe. ?Wanem bambae i hapen?

Pis mo seftaem blong olwe. “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:11.

Plante gudfala kakae. “Yu mekem we bambae i gat plante kakae long ples ya, we bambae ol hil oli fulap gud long hem.”—Ol Sam 72:16.

Evriwan i gat haos mo gudfala wok. “Man we i wokem haos blong hem, hem bambae i save stap gud long hem . . . Man we i planem plantesen blong grep, hem bambae i dring waen blong ol grep ya . . . Ol samting we olgeta oli hadwok long hem, bambae oli save harem gud long hem longtaem.”—Aesea 65:21, 22.

?Yu wantem tumas blong luk ol gudfala samting ya? I no longtaem, olgeta man bambae oli gat wan gudfala laef olsem.

Tede, sik mo ded i kasem yumi evriwan. Be i no longtaem, samting ya bambae i no moa hapen. God bambae i yusum ransom sakrefaes blong Jisas blong mekem se “olgeta man we oli soemaot se oli bilif long hem, oli no ded be oli kasem laef we i no save finis.” (Jon 3:16) ?Bambae i olsem wanem long taem ya?

Bambae i no moa gat sik. “Bambae i no moa gat man olbaot long kantri ya we i save talem se hem i sik, from we Hae God bambae i fogivim ol man blong ples ya, i tekemaot ol sin blong olgeta.”—Aesea 33:24.

Bambae i no moa gat ded. “Hem bambae i mekem we ded bambae i go lus olgeta. Bambae hem i ravemaot wota blong ae blong yufala.”—Aesea 25:8.

Ol man bambae oli laef olwe. “Presen we God i givim tru long Masta blong yumi Kraes Jisas, hemia laef we i no save finis.”—Rom 6:23.

Ol dedman bambae oli laef bakegen. “Ol man we oli stret wetem ol man we oli no stret bambae oli laef bakegen.” (Ol Wok 24:15) Blesing ya bambae i kamaot from presen we God i givim, hemia ransom sakrefaes blong Pikinini blong hem.

 ?Olsem wanem God bambae i mekem ol samting ya?

God bambae i yusum wan gavman long heven we Jisas Kraes i King blong hem, blong mekem plan blong hem long saed blong wol mo ol man i kamtru. (Ol Sam 110:1, 2) Hemia gavman o kingdom we Jisas i tijim ol man blong hem blong prea from, taem hem i talem se: “Papa blong mifala long heven . . . Yu mekem Kingdom blong yu i kam.”—Matiu 6:9, 10.

Kingdom blong God bambae i rulum fulwol mo finisim ol trabol we i stap mekem ol man oli harem nogud. !I no gat wan gavman we i gud moa i winim Kingdom ya! Taswe taem Jisas i stap long wol, hem i wokhad blong talemaot “gud nius blong Kingdom,” mo i talem long ol disaepol blong hem blong oli mekem sem wok ya.—Matiu 4:23; 24:14.

Jehova God i promes blong mekem ol nambawan blesing ya oli kamtru, from we hem i lavem tumas ol man. ?Olsem wanem? ?Hemia i mekem se yu wantem save hem mo kam klosap long hem? ?Samting ya bambae i givhan long yu olsem wanem? Nekis haf bambae i eksplenem.