Sanga lit masalahta, siarapken kel penampat temanta. Enterem kalak erpengakap maka sanga lit masalahna, la isampati Dibata ia. Emaka labo iakapna Dibata e temanna. Padahal melala si nggo ilakoken Dibata man banta. Selain si e, labo ipediat Dibata kita terus ngadapi masalah janah susah. Kai si nandangi ilakoken Dibata?

Lanai pagi lit kejahaten perban ikernepken Dibata me si tangtangna erban kejahaten. Ikataken Pustaka ise e, nina, “Kerina doni enda lit i bas kuasa si jahat.” (1 Johanes 5:19) “Si jahat” eme Setan si Iblis, si ikataken Jesus “penguasa doni enda.” (Johanes 12:31) Pengaruh Setan me si erbanca melala masalah bas doni enda. Emaka, kai si nandangi ilakoken Dibata?

Lanai ndekah, igunaken Dibata Jahwe me Jesus Kristus ‘ngkernepken Iblis si banci erban manusia mate.’ (Heber 2:14; 1 Johanes 3:8) Nina Pustaka, Iblis pe nggo itehna maka lanai ndekah ikernepken me ia. Itehna maka “waktuna kentisik nari ngenca.” (Ketangkasen 12:12) Ikernepken Dibata ka pagi kerina kalak jahat.​—Masmur 37:9; Kuan-kuanen 2:22.

Sura-sura Dibata gelah manusia si sempurna nggeluh rasa lalap i Pardis, doni si mejile ras sempurna. Emaka, kenca ikernepken Dibata kerina kejahaten, terjadi me sura-suraNa e. Kai saja si banci siarapken?

Perdamen ras keamanen rasa lalap. “Kalak si meteruk rukur ndatken taneh e, inanamina kedamen ras kesenangen.”​—Masmur 37:11.

Melala pangan si ergizi. “Mbuahlah page i belang-belang negeri, uruk-uruk dem alu ulih juma.”​—Masmur 72:16.

Rumah ras pendahin si erban meriah ukur. “Ipajekken bangsaKu pagi rumah janah ia nge ngiani rumah e, labo kalak si deban. Isuanna batang anggur janah ia nge si ngenanami ulihna . . . Kasa kai ulihna latih, tuhu-tuhu kel inanamina.”​—Jesaya 65:21, 22.

Merhat nge kam ngenanamisa? Lanai ndekah, bage me si inanami manusia tiap wari.

Gundari, kerina jelma pasti sakit janah dungna mate. Tapi lanai ndekah, kerina manpaat arah korban tebusen Jesus banci sigejapken. Ibereken Dibata kerina e gelah “ise pe si erkiniteken man [Jesus] la ikernepken tapi ndatken kegeluhen si rasa lalap.” (Johanes 3:16) Kai saja nge pagi si terjadi?

Lanai lit si sakit. “Lanai pagi lit si sakit ringan i bas negerita, janah kerina dosa enggo ialemi.”​—Jesaya 33:24.

Lanai lit kematen. “Kematen imasapken Jahwe si Erdolat seh rasa lalap. IapusiNa iluh i bas mata kerina jelma.”​—Jesaya 25:8.

Manusia nggeluh rasa lalap. “Pemere Dibata eme kap kegeluhen si rasa lalap erkelangken Kristus Jesus Tuanta.”​—Roma 6:23.

Kalak si nggo mate ipekeke. “Lit kekeken i bas si mate nari, eme kekeken kalak si benar, bage pe kalak si la benar.” (Perbahanen Rasul-Rasul 24:15) Kalak si mate pe ndatken manpaat arah tebusen.

Kai si ilakoken Dibata gelah kerina enda banci terjadi?

Sura-sura Dibata man manusia ras doni enda banci terjadi arah pemerentahen Dibata si lit i surga. Jesus me si ipilih Dibata jadi rajana. (Masmur 110:1, 2) Pemerentahen ntah pe kerajan e me si isuruh Jesus itotoken murid-muridna, “O Bapak kami si i surga, . . . rehlah min KerajanNdu.”​—Matius 6:9, 10.

Iperentah Kerajan Dibata pagi doni enda, janah isasapkenna kerina masalah si erban mesera geluhta. Kerajan enda me pemerentahen si mehulina kel! E me sebapna, sanga i doni iusahaken Jesus kel mberitaken “berita si meriah kerna Kerajan.” Isuruhna ka pengikutna ngelakoken si e.​—Matius 4:23; 24:14.

Perban keleng kel ate Jahwe manusia, erjanji Ia mereken pasu-pasu si luar biasa ndai man kalak e. Kenca itehndu e, merhat nge kam lebih nandai Dibata janah ndeher ras Ia? Adi ilakokenndu e, kai saja gunana bandu? Jawapenna lit bas artikel seterusna.