Aban buiti umadaü, ligía gürigia le aranseñubei lun líderaguniwa dan le gaturobulin wamá. Ligía añahein lubéi ariñagutiña mama lan wamada Bungiu ladüga samina hamá madügün lan ni kata wawagu. Ani le linarün katei, adügaali Bungiu saragu katei wawagu ani málühali aransehei sun waturobulin, gidaléime sun asufuriruni. Kaba ladüga?

Lagumuchuba Bungiu lau wuribani lau lagidaruni lébuna. Subudigüda tumuti Lererun Bungiu ka lan lébunabei wuribani dan le tariñagun: “Lábugiñeñanu lan lubafu Mafia sun ha lánigubaña ubóu” (1 Huan 5:19). Ariñagati Hesusu Mafia lan “agumadihabei lidan ubóu le” (Huan 12:31). Sun le ladügübei Mafia lébunabei haturóbulin gürigia. Kábati ladüga Bungiu?

Yarafa madise, layusurubei Heowá Liráü lun lagünrinchaguni “Mafia le ídangiñebei liabin óunweni houn gürigia” (Ebüréu 2:14; 1 Huan 3:8). Le linarün katei, arufudahatu Lererun Bungiu subudi lani Mafia “murusunrügaali lan” dan lubá lagünrinchawagun (Arufudúni 12:12). Lagünrinchagubaña giñe Bungiu gürigia wuribatiña (Sálumu 37:9; Ariñawagúni 2:22).

Lárigiñeme lagumuchun Bungiu lau wuribani, lagunfulirubei le meha labuserunbei houn gürigia luma lun Ubóu. Ida lubameti ibagari?

Darangilaü luma ichouruni lun súnwandan. “Ánhaña ha ǘnabubei hanaagun houngua, hagíaba laburiña múa, habagariduba lidan darangilaü le dayarüti” (Sálumu 37:11).

Saragu éigini buiti lun átuadi. “Ñeinlá saragu türigu fulasurugu, gibelá türigu lábulugu burí wübü!” (Sálumu 72:16).

Muna gadünamatu luma wadagimanu buiti. “Hábunaguba gürigia haban ábame haganóun tidan, hábunaguba beibei ábame héiginu tin. [...] Harihubei numutuniña le hawadigimaridubei lau háhabu” (Isaíasi 65:21, 22).

Hínsiñeti hamuga san hun hawinwandun lidan aban ubóu ítarati? Lagunfuliruba sun katei le yarafa madise.

Lau sun sandi wamá ani hilagua wagía uguñe weyu, mítaranbei súnwandan. Seremei sákürifisiu le ladügübei Hesusu, yarafa madise, ladügüba Heowá “lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Ida lúbameti ibagari?

Úaalime sandi. “Mariñagunbei ni aban lílana fulasu: ‘Sándiñadina’. Ladüga feruduna lubéi Wabungiute hafigoun” (Isaíasi 33:24).

Úaalime óunweni. “Lagünrinchagubei Wabureme óunweni lun súnwandan, laragahabei águiraü luéigiñe hagu sun gürigia” (Isaíasi 25:8).

Hawinwanduba gürigia lun súnwandan. “Edewehani le líchugubei Bungiu woun, ibagari le magumuchaditi lidan Wabureme Hesukrístu” (Rómana 6:23).

Habagaridayaba hilaaña. “Lásaaragüdübaña [...] hilaaña, dandu ha buídubaña kei ha wuribabaña” (Adügaü 24:15). Hibihuba giñe hilaaña buiti lídangiñe idewesei lúmagiñeti Bungiu le lánina lebegi esefuruni.

Kábati ladüga Bungiu lun lagunfulirun lau sun le?

Lagunfulirubei Bungiu lisuuni houn gürigia luma lun Ubóu lábugiñe Larúeihan Hesukrístu sielu (Sálumu 110:1, 2). Luaguméme arúeihani ligía lariñaga Hesusu houn ha afalarubalin lun hamuriahani dan le lariñagunbalin dimurei burí le: “Wáguchi Bungiu le siélubei, [...] ñǘbuinla barúeihan” (Matéu 6:9, 10).

Lagumadirubei Larúeihan Bungiu sun Ubóu ani lagidarubei sun igarigu luma asufuriruni le lídanbei. Anihán arúeihani le buídutimabei houn gürigia. Ligía láfaagunbei Hesusu saragu lun lapurichihani “uganu buiti luagu larúeihan Bungiu” dan le ya lubéi ubouagu ani óunaha lumutiña lani disipulugu lun hadügüni ligiaméme (Matéu 4:23; 24:14).

Adüga lumuti Heowá lubuidun burí füramase le woun ladüga weiri lan wínsiñe lun. Ma ínchaha lumutün le lúntima hasubudiruni Bungiu luma lun háfaagun lun gamadagua humá luma? Kaba buiti hibiha anhein hadüga? Ariha waméi lidan leweñegua arütíkulu.