Kon naa ka sa kalisdanan, seguradong magdahom ka nga tabangan ka sa imong maayong higala. Base niana, ang uban nag-ingon nga ang Diyos dili higala kay wala siyay gihimo sa pagtabang kanila. Ang tinuod, daghan nag nahimo ang Diyos para sa atong kaayohan, ug naa pa siyay himoon bahin sa tanan natong problema ug pag-antos karon. Unsay himoon sa Diyos?

Wad-on sa Diyos ang tanang pagkadaotan pinaagi sa pagwagtang sa hinungdan niini. Gisulti sa Bibliya ang hinungdan niini dihang kini miingon: “Ang tibuok kalibotan nailalom sa gahom sa usa nga daotan.” (1 Juan 5:19) Kining “usa nga daotan” mao usab ang gitawag ni Jesus nga “ang magmamando niining kalibotana,” si Satanas nga Yawa. (Juan 12:31) Ang impluwensiya ni Satanas sa kalibotan mao ang hinungdan sa makaluluoy nga kahimtang sa yuta. Unsay himoon sa Diyos?

Sa dili madugay, si Jehova nga Diyos molihok pinaagi sa iyang Anak, si Jesu-Kristo, aron ‘wagtangon ang usa nga may gahom sa pagpahinabog kamatayon, nga mao, ang Yawa.’ (Hebreohanon 2:14; 1 Juan 3:8) Gani, gipakita sa Bibliya nga ang Yawa mismo nahibalo nga “hamubo na lamang ang iyang panahon” sa dili pa siya laglagon. (Pinadayag 12:12) Wad-on sab sa Diyos ang tanang pagkadaotan ug kadtong mga naghimo niini.​—Salmo 37:9; Proverbio 2:22.

Human niya taposon ang tanang pagkadaotan sa yuta, tumanon sa atong Maglalalang ang iyang orihinal nga katuyoan sa tawo ug sa yuta. Unsay atong madahom sa umaabot?

Walay kataposang pakigdait ug kasegurohan. “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”​—Salmo 37:11.

Abunda ug makapahimsog nga pagkaon. “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”​—Salmo 72:16.

Komportableng puy-anan ug makapalipay nga trabaho. “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. . . . Gamiton sa bug-os sa akong mga pinili ang buhat sa ilang mga kamot.”​—Isaias 65:21, 22.

Nangandoy ba ka niana nga mga kahimtang? Sa dili madugay, ingon niana na ang kinabuhi sa tanan kada adlaw.

Ang tanan karon masakit ug mamatay, pero dili na ingon niana ang kahimtang sa dili madugay. Hapit nang ipahinabo sa Diyos ang mga benepisyo sa halad lukat ni Jesus aron “ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Unsa unyay mahitabo?

Wad-on ang sakit. “Walay pumoluyo nga moingon: ‘Ako masakiton.’ Ang katawhan nga magpuyo sa yuta mao kadtong mga gipasaylo sa ilang kasaypanan.”​—Isaias 33:24.

Ang mga tawo dili na mamatay. “Iyang lamyon gayod ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.”​—Isaias 25:8.

Ang mga tawo mabuhi hangtod sa hangtod. “Ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.”​—Roma 6:23.

Mabuhi pag-usab ang mga namatay. “Aduna unyay pagkabanhaw sa mga matarong ug sa mga dili-matarong.” (Buhat 24:15) Makabenepisyo sila sa lukat nga gasa sa Diyos.

Sa unsang paagi himoon sa Diyos kining tanan?

Tumanon sa Diyos ang iyang katuyoan sa tawo ug sa yuta pinaagig usa ka gobyerno sa langit, nga si Kristo Jesus ang gitudlo nga Magmamando. (Salmo 110:1, 2) Kini ang gobyerno, o gingharian, nga gitudlo ni Jesus nga iampo sa iyang mga sumusunod: “Amahan namo nga anaa sa mga langit, . . . paanhia ang imong gingharian.”​—Mateo 6:9, 10.

Ang Gingharian sa Diyos magmando sa yuta ug magwagtang sa tanang kasakit ug pag-antos sa katawhan. Kini nga Gingharian ang pinakamaayong gobyerno nga magmando sa tawo! Kanay hinungdan nga si Jesus naghago sa pagsangyaw “sa maayong balita sa gingharian” dihang dinhi siya sa yuta ug nagsugo sa iyang mga tinun-an sa paghimo usab niana.​—Mateo 4:23; 24:14.

Tungod sa dakong gugma ni Jehova nga Diyos sa tawo, siya nagsaad nga himoon kining tanang nindot nga butang para kanila. Dili ba kana magdasig nimo nga ilhon siya ug makigsuod kaniya? Unsay kaayohan kon himoon nimo kana? Hisgotan kana sa sunod artikulo.