Juntiquil wem bʌ amigo jiñʌch muʼ bʌ i coltañonla cheʼ mi lac ñusan wocol tac. Jin chaʼan, an muʼ bʌ i yʌlob chaʼan Dios mach la camigojic, come miʼ ñaʼtañob chaʼan maʼañic chuqui miʼ mel ti lac tojlel. Pero añix chuqui melbil i chaʼan ti lac tojlel i mach jalix yom chaʼan miʼ tojʼesan lac wocol tac i miʼ jisan. ¿Chuqui mi caj i mel Dios?

Dios mi caj i jisan jiñi muʼ bʌ i tech jontolil tac. Jiñi Biblia miʼ yʌl majqui: «Pejtelel i chaʼañoʼ bʌ pañimil añob tiʼ cʼʌb jini xjontolil» (1 Juan 5:19). Jiñi «xjontolil» jiñʌch Satanás, tsaʼ bʌ i taja ti tʼan Jesús jaʼel bajcheʼ i «yum jini pañimil» (Juan 12:31). Jiñi wocol tac muʼ bʌ i ticʼlan wiñicob xʼixicob (quixtañujob) yaʼ chucul tiʼ pʼʌtʌlel jiñi Diablo. ¿Chuqui mi caj i mel (chaʼlen) Dios chaʼan jiñi?

Mach jalix yom, Jehová mi caj i cʼʌn i Yalobil chaʼan miʼ jisan jiñi «xiba» o Diablo (Hebreos 2:14; 1 Juan 3:8). Tiʼ sujm, jiñi Biblia miʼ yʌl chaʼan jiñi Diablo yujil chaʼan «lʌcʼʌlix i yorajlel» mi caj i jisʌntel (Apocalipsis 12:12). Yicʼot jaʼel, Dios mi caj i jisan jiñi quixtañujob jontoloʼ bʌ (Salmo 37:9; Proverbios 2:22).

Cheʼ tsaʼix i jisa jontolil, jiñi tsaʼ bʌ i Meleyonla (Pʌtʌyonla) mi caj i tsʼʌctesan chuqui ñaʼtʌbil i chaʼan tiʼ tojlel jiñi quixtañujob yicʼot chaʼan ili Pañimil. ¿Bajcheʼ yilal mi caj lac chumtʌl ti jiñi bʌ ora?

Ñʌchʼtʌlel yicʼot maʼañic chuqui mi caj lac bʌcʼñan. «Jini utsoʼ bʌ i pusicʼal mi caj i yʌqʼuentelob i wenlel. Tijicña mi caj i yubiñob cheʼ ñʌchʼʌlob i pusicʼal» (Salmo 37:11).

Cabʌl wem bʌ bʌlñʌcʼʌl. «Mi caj i yʌcʼ cabʌl i cuch jini cholel yaʼ ti joctʌl cʼʌlʌl ti pam tac jini wits» (Salmo 72:16).

Wem bʌ la cotot yicʼot eʼtel. «Mi caj i waʼchocoñob i yotot. Yaʼi mi caj i chumtʌlob. Maʼanic majch mi caj i chilbeñob. Cheʼ miʼ pʌcʼob tsʼusubil, mi caj i cʼuxbeñob i wut. [...] Tijicñayob jini yajcʌbiloʼ bʌ c chaʼan, come i chaʼañobʌch pejtelel i wut i yeʼtel» (Isaías 65:21, 22).

¿Muʼ baʼ mulan chumtʌl ti jumpʼejl pañimil bajcheʼ jiñi? Mach jalix yom chaʼan cheʼʌch mi caj i yujtel.

Wʌle ora, ti lac pejtelel mi laj cʼamʼan yicʼot mi lac chʌmel (sajtel), pero mach cheʼix mi caj la cajñel bajcheʼ jiñi. Tiʼ coltaya i cuxtʌlel Jesús, Jehová lʌcʼʌlix mi caj i mel chaʼan «majqui jach miʼ ñop i Yalobil, maʼanic miʼ sajtel. Miʼ taj i cuxtʌlel mach bʌ anic miʼ jilel» (Juan 3:16). ¿Bajcheʼ yilal mi caj lac chumtʌl ti jiñi bʌ ora?

Mi caj i jilel cʼamʌjel tac. «Maʼanix mi juntiquilic muʼ bʌ caj i yʌl: ‹Cʼamon› [...]. Come lac Yum mi caj i laj ñusʌbeñob i mul» (Isaías 33:24).

Maʼañix majch miʼ caj ti chʌmel. «Mi caj i junyajlel jisan jini pʼʌtʌl bʌ muʼ bʌ i yʌcʼonla ti chʌmel. Cheʼ jini maʼanix majqui mi caj i chʌmel tiʼ pejtelel ora. Lac Yum Dios mi caj i sujcubeñonla i yaʼlel lac wut» (Isaías 25:8).

Tiʼ pejtelel ora mi caj i chumtʌl jiñi quixtañujob. «Lac majtan chʼoyol bʌ ti Dios jiñʌch laj cuxtilel mach bʌ anic miʼ jilel ti lac Yum Cristo Jesús» (Romanos 6:23).

Mi caj i chaʼ tejchelob jiñi chʌmeñoʼ bʌ. «Mi caj i chʼojyelob jini chʌmeñoʼ bʌ, jini tojoʼ bʌ yicʼot jini mach bʌ tojobic» (Hechos 24:15). Jiñi tsaʼix bʌ chʌmiyob mi caj i tajob i wenlel jaʼel chaʼan jiñi majtañʌl tsaʼ bʌ i yʌcʼʌ Dios, jiñi i tojol mulil.

¿Chuqui mi caj i mel Dios chaʼan miʼ mel pejtelel iliyi?

Dios mi caj i tsʼʌctesan chuqui ñaʼtʌbil i chaʼan ti tojlel jiñi quixtañujob yicʼot chaʼan ili Pañimil cheʼ bʌ miʼ cʼʌn jumpʼejl yumʌntel am bʌ ti panchan am bʌ tiʼ wenta Jesús (Salmo 110:1, 2, TNM). Jiñʌch jiñi yumʌntel tsaʼ bʌ i cʌntesa Jesús jiñi xcʌntʼañob i chaʼan chaʼan miʼ cʼajtiñob yicʼot ili tʼan tac: «C Tat lojon añet bʌ ti panchan [...]. Laʼ tilic a yumʌntel» (Mateo 6:9, 10).

Jiñi i Yumʌntel Dios mi caj i yuman ili Pañimil i mi caj i jisan pejtelel muʼ bʌ i yʌcʼ lac chʼijiyemlel yicʼot jiñi wocol. Jiñʌch jumpʼejl yumʌntel ñumen wem bʌ yom bʌ tiʼ tojlel jiñi quixtañujob. Jin chaʼan, Jesús tsiʼ chaʼle wersa chaʼan miʼ sub «jini wen tʼan chaʼan i yumʌntel Dios» cheʼ bʌ wʌʼto an ti Pañimil i tiʼ sube jiñi xcʌntʼañob i chaʼan chaʼan yom miʼ melob jeʼel (Mateo 4:23; 24:14).

Jehová an i subeyonla pejtelel ili wen tac bʌ tʼan come miʼ wen cʼuxbiñonla. ¿Mach ba muqʼuic i ñijcañet jiñi chaʼan maʼ ñumen cʌn yicʼot maʼ chaʼlen wersa a sujtel tiʼ yamigo? ¿Chuqui bʌ wenlel tac mi caj a taj cheʼ mucʼʌch a mel? Laʼ laj qʼuel yaʼ ti yambʌ temaj.