Maine troa traqa koi së la itre jol, tha luelue kö së, laka, tro kö la nyipi sinee së a xatua së. Matre, itre xan a mekun ka hape, tha sinee i angatre fe kö Akötresie, ke, pëkö hnei Nyidrëti hna kuca troa xatua angatr. Ngo ame pe, nyimutre la itre ewekë hnei Akötresie hna kuca thatraqai së. Nyidrëti a xatua së troa cile kowe la itre jol me akötr hne së hna melën enehila. Nemene la hnei Akötresie hna troa kuca?

Tro Akötresie a pane apatrene la qaane la ngazo, nge thupene lai, Nyidrëti a apatrene la ngazo. Tusi Hmitrötr a qaja amamane la qaane la ngazo, me hape: “Fene hnengödrai asëjëihë a meköle thene la ate ka ngazo.” (1 Ioane 5:19) Ame la “ate ka ngazo” tre, kolo atr hnei Iesu hna hën ka hape, “tane celë fen,” ene Satana Diabolo. (Ioane 12:31) Satana la ka amenune la itre atr, matre tha sesëkötre kö së laka, kolo palahi a ngazo catre la fen. Nemene la hnei Akötresie hna troa kuca?

Easenyi hë tro Iehova Akötresie a upi Iesu Keriso matre “tro nyidëti a apatenepi hnene la meci la ate tene mene hna mecin, ene diabolo.” (Heberu 2:14; 1 Ioane 3:8) Öni Tusi Hmitrötr, atre hi Diabolo ka hape, “xoxopate pe hi la ijine i nyën” qëmekene troa lepe apatrenyi nyën. (Hna Amamane 12:12) Ketre, tro Akötresie a apatrene la nöjei ngazo asë, memine fe la itre ka kuca la ngazo.—Salamo 37:9; Ite Edomë 2:22.

Thupene la hna apatrene la ngazo, tro hë Akötresie a eatrëne lo aja i Nyidrë kowe la itre atr me kowe la ihnadro. Nemene la itre manathith hne së hna troa kapa?

Tro sa lapa tingeting me lapa xetietë. “Tro la ange ka menyike a hetenyi la [“ihnadro,” MN], nge tro angat’ a madine la tingetinge atraqat.”—Salamo 37:11.

Troa mana la xen ka lolo. “Loi e eje la qite ka nyimute ngöne la nöj, hune la hene la ite wet.”—Salamo 72:16.

Tro sa hetre hnalapa me huliwa ka loi. “Tro angat’ a xupi ite uma me lapan’ it’ ej, nge tro angat’ a eënyi vine me iji wen’ it’ ej . . . nge tro la ite hnenge hna iëne a mele ahoeane kowe la huliwa ne la ite ime i angat.”—Isaia 65:21, 22.

Hapeu, aja i epuni kö troa hane mel e cili? Easenyi hë matre mele jë la itre atr ngöne la fene cili.

Ame enehila, kolo pala kö a tith la itre atr hnene la itre sine mec, nge angatre fe a mec. Ngo, easenyi hë matre patre pi hë la itre ewekë cili. Easenyi hë tro la itre atr a kapa la itre manathith hna aejëne hnene la mele hna huujën hnei Iesu, matre “tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.” (Ioane 3:16) Nemene la itre manathith cili?

Pëhë sine mec. “Tha tro kö a qaja hnene la ate lapan’ eje, ka hape, Ini a mec ; tro ha nue tije la ngazo ne la nöje hna lapan’ ej.”—Isaia 33:24.

Tha tro hmaca kö a mec la itre atr. “Tro nyidëti a cengöne apatene la mec, nge tro Joxu Iehova a köle tije la ite tenge timida qa ngöne la nöjei qëmek’ asëjëihë.”—Isaia 25:8.

Troa mel epine palua la itre atr. “Ame la ahnahna i Akötesie, te, mele ka tha ase palua kö göi Iesu Keriso Joxu shë.”—Roma 6:23.

Troa amelene hmaca la itre ka mec. “Tro ha mele hmaca la nöjei ka meköt, me ka tha meköti kö.” (Ite Huliwa 24:15) Ketre manathithi lai hna aejëne hnene la thupene mele hna hamëne hnei Akötresie.

Nemene la hnei Akötresie hna troa kuca matre troa eatrëne asë la itre ewekë cili?

Tro Akötresie a eatrëne la aja i Nyidrë kowe la itre atr, me kowe la ihnadro jëne la ketre baselaia hna acil e hnengödrai, nge Iesu la Joxu. (Salamo 110:1, 2) Hnei Iesu hna upe la itre ka xötrethenge nyidrë troa thith thatraqane la Baselaia cili, me hape: “Tretretro huni e koho hnengödrai, . . . Epi traqa pi la Baselaia i Cilie.”—Mataio 6:9, 10.

Tro la Baselaia i Akötresie a musi kowe la fen, nge tro ej a apatrene la itre ngazo me itre akötr. Pëkö ketre baselaia e celë fen ka sisitria hune la Baselaia cili! Celë hi kepine matre, hnei Iesu hna catre cainöjëne “la maca ka loi celë ne la baselaia” lo nyidrëti e celë fen, me upe la itretre dreng troa ujë tun.—Mataio 4:23; 24:14.

Hnei Iehova hna sisinyi laka, tro Nyidrëti a kuca la nöjei ewekë cili, ke, tru catre la ihnimi Nyidrë koi së, itre hnei Nyidrëti hna xup. Hapeu, aja së kö troa atrepengöi Nyidrë me easenyi koi Nyidrë? Maine eje hi, nemene la itre manathith hne së hna troa kapa? Tro la tane mekune celë a sa la hnying.