Niponda weno̱ o bete̱medi ba ndutu, o mengane̱ diko̱m lo̱ngo̱ la bwam ná di waneye wa jongwane̱. Ońola nika nde bato bō̱ ba makwalano̱ ná Loba a titi babo̱ diko̱m ońolana ba mo̱nge̱le̱ ná a titi o bola to̱ lambo o jongwane̱ babo̱. Mbale̱ ńe nde ná, Loba a mábolea biso̱ mambo jita ońola bwam basu, nde a me̱nde̱ pe̱ bo̱le̱ mitakisan me̱se̱ na take di be̱nno̱ nin we̱nge̱. Nje Loba a me̱nde̱no̱ bola e?

Loba a me̱nde̱ sumwa mwanga ma bobe ná a bo̱le̱ bobe bwe̱se̱. Bibe̱l e mabonde̱ mu mwanga ma bobe na ben byala ná: “Wase ńe̱se̱ ńe owas’a ngin’a [“Ńabobe,” NW].” (1 Yohane 5:19) Nu ńe “ńabobe” e nde nu me̱ne̱ Yesu a bele̱no̱ ná “mwaned’a nin wase,” Satan Diabolo. (Yohane 12:31) Ngińa Satan a be̱nno̱ omo̱ń a wase nde ńe mwanga ma ndutu ye o wase. Nje Loba a me̱nde̱no̱ bola e?

Son a ponda Yehova Loba a me̱nde̱ bola lambo tongwea na Mun’ao, Yesu Kristo, o “bo̱le̱ nu ńena nu be̱n ngiń’a kwedi diboma, nika ńe nde ná Satan [Diabolo].” (Bonahebe̱r 2:14; 1 Yohane 3:8) Nde, Bibe̱l e malee̱ ná Diabolo mo̱me̱ne̱ a bi ná “a dian nde son a ponda” obiana a mańamsabe̱. (Bebīsedi 12:12) Loba a me̱nde̱ pe̱ bo̱le̱ bobe bwe̱se̱ na be̱se̱ ba mabole̱ mo̱.​—Myenge 37:9; Minia 2:22.

Niponda Loba a me̱nde̱no̱ bo̱le̱ bobe o wase, Muweked’asu a me̱nde̱ bola ná a londe̱ mwano mao ma bebaedi jombwea mbel’a moto na wase. Njika mambo jeno̱ ná jenge̱le̱ e?

Musango ma po̱ko̱po̱ko̱ na mbo̱le̱. “O mińa mao nute̱m na sim a be̱ munam, musango pe̱ mu yambe nate̱na mo̱di mu ńo̱ngo̱.”​—Myenge 72:7.

Njoaso’a da la bwam. “Mbasi i tute o ekombo, nate̱na o sas’a mudongo!”​—Myenge 72:16.

Mandabo ma bwam name̱ne̱ pe̱ n’ebolo e mabwesane̱ muńe̱nge̱. “Ba me̱nde̱ longa mandabo, na ja pe̱ oten, ba de̱ midiki ma wań, na da pe̱ bepuma bao. . . . Ba me̱nde̱ bolane̱ nje mā mabu ma po̱ngino̱ natē̱ ba dunse̱ mo̱.”​—Yesaya 65:21, 22.

Mo̱ o be̱n ńo̱ng’a je̱ne̱ man mambo e? Son a ponda di me̱nde̱ bwane̱ mo̱ muńe̱nge̱ buńa te̱.

O nin we̱nge̱ biso̱ be̱se̱ di maboa, di wo̱ pe̱. Nde nika e si me̱nde̱ pe̱ be̱. Son a ponda Loba a me̱nde̱ bola ná di tombwane̱ minam ma jabea la diko̱ti la Yesu ninka ná “to̱ nja nu dube̱ mo̱ a si mańama, nde a mabe̱ne̱ longe̱ la bwindea.” (Yohane 3:16) Njika minam mō̱ di me̱nde̱no̱ tombwane̱ e?

Maboa ma si me̱nde̱ pe̱ be̱. “To̱ moto a si me̱nde̱ pe̱ kwala na: Na si jai bwam, ebanja tumba di maje̱ oten di lakisabe̱.”​—Yesaya 33:24.

Kwedi e si me̱nde̱ pe̱ wanea mbel’a moto ndenge̱. “A me̱nde̱ mite̱le̱ kwedi po̱ko̱po̱ko̱. Sango Yehova a me̱nde̱ tuta miso̱di o miso̱ me̱se̱.”​—Yesaya 25:8.

Bato ba me̱nde̱ be̱ longe̱ o bwindea. “Jabea la ndedi la Loba le nde longe̱ la bwindea o Kristo Yesu, Sango asu.”​—Roma 6:23.

Bawedi ba me̱nde̱ pumbwabe̱le̱. “Bepumbwedi ba bate̱m na sim na basite̱m na sim be me̱nde̱ be̱.” (Bebolo 24:15) Di me̱nde̱ tombwane̱ minam ma jabea la Loba la diko̱ti.

Ne̱ni Loba a me̱nde̱no̱ londise̱ man me̱se̱ e?

Loba a me̱nde̱ londise̱ mwano mao ońola mbel’a moto na wase tongwea na janea di boki o mo̱ń, di be̱n Kristo Yesu ka Kiṅe̱ ni te̱se̱be̱. (Myenge 110:1, 2) Ońola di janea nde Yesu okwe̱le̱no̱ bokwedi bao o kane̱ na ben byala ná: “A Tete̱ ńasu ńe o mo̱ń. . . . Janea lo̱ngo̱ di ye.”​—Mateo 6:9, 10.

Janea la Loba di me̱nde̱ janea wase na bo̱le̱ pe̱ bobe bwe̱se̱ na take ńe̱se̱. Din Janea nde le janea di peti mbel’a moto ńeno̱ ná e be̱ne̱! Ońola nika nde Yesu a tuse̱no̱ ńolo o langwa “myango ma bwam ma janea” o pond’a dikalo lao o wase, a langwea pe̱ bokwedi bao ná ba bole mulemlem.​—Mateo 4:23; 24:14.

Ońola ndolo ninde̱ne̱ a to̱ndino̱ mbel’a moto, Yehova Loba a kakane̱ o bola man mambo ma betańsedi me̱se̱ ońol’abu. Mo̱ nika e si mabola ná o pule bia Loba na sisea mo̱ be̱be̱ e? Nje o me̱nde̱no̱ tombwane̱ yete̱na o po̱si o bola nika e? Mulopo m’ekwali mu mabupe̱ mu me̱nde̱ bola beteledi.