Ni dredre na bula o na namaka me vukei iko e dua nomu itokani vinaka. Nida vakasamataka tiko qori, so era kaya ni sega ni itokani vinaka na Kalou ni sega ni dau veivukei. Ia levu sara na ka sa cakava oti e yaga vei keda, ena vakaotia tale ga na noda leqa kece kei na noda rarawa nikua. Na cava ena vakarau cakava na Kalou?

Ena vakaotia na veika ca kece na Kalou ni vakarusai koya sara ga e vakavuna tiko. E kaya na iVolatabu: “E lewa tiko na vunica na vuravura taucoko.” (1 Joni 5:19) O koya na “vunica” qori o Setani na Tevoro, e tukuna o Jisu ni ‘lewa tiko na vuravura qo.’ (Joni 12:31) Na nona veivakamuai sara ga o Setani e vakavuna tiko na ituvaki ca e vuravura. Na cava gona ena cakava kina na Kalou?

Dua na gauna tiko ga qo, na Kalou o Jiova ena vakayagataki Luvena o Jisu Karisito me ‘vakawabokotaka na Tevoro, o koya e dau vakavuna tiko na mate.’ (Iperiu 2:14; 1 Joni 3:8) E tukuni tale ga ena iVolatabu ni kila vinaka sara tu ga na Tevoro “ni sa lekaleka [na] gauna” me rusa kina. (Vakatakila 12:12) Na Kalou ena vakarusai ira tale ga na dauvakavuna tiko na ka ca.—Same 37:9; Vosa Vakaibalebale 2:22.

Ni sa oti na veika ca kece e vuravura ena qai vakayacora na Dauveibuli na nona inaki me baleti keda kei na vuravura. Cava eda rawa ni rai vakanamata kina?

Tawamudu na vakacegu kei na veitaqomaki. “Era na taukena na vuravura na yalomalumalumu, era na kunea na marau vakasakiti ena levu ni vakacegu.”—Same 37:11.

Levu na kakana vinaka qai bulabula. “Ena levu na covuata e vuravura, ena vuabale ena dela ni veiulunivanua.”—Same 72:16.

Vale vinaka kei na cakacaka e veivakacegui. “Era na tara vale era na tiko kina, era na tea na loganivaini era na kania na vuana . . . era na marautaka vakalevu na cakacaka ni ligadra o ira au digitaka.”—Aisea 65:21, 22.

Vakacava o rai vakanamata mo marautaka na bula qori? Sa voleka sara nida marautaka e veisiga na veivakalougatataki qori.

Nikua eda na tauvimate kece, da mate sara, ia sa na vakarau oti qori. Sa voleka ni vakayagataka na Kalou na yaga ni nona isoro ni veivoli o Jisu vei “ira na vakaraitaka nodra vakabauti koya, mera rawata ga na bula tawamudu.” (Joni 3:16) Cava ena yaco?

Ena oti na tauvimate. “Ena sega ni kaya e dua na lewenivanua: ‘Au tauvimate.’ O ira na tiko ena vanua ena vosoti na nodra cala.”—Aisea 33:24.

Sa na oti vakadua na mate. “Ena tiloma vakadua o koya na mate, ena qusia na Turaga Cecere Duadua o Jiova na wainimata mai na matadra kece.”—Aisea 25:8.

Eda na bula tawamudu. “Na iloloma ni Kalou na bula tawamudu ena vuku i Karisito Jisu na noda Turaga.”—Roma 6:23.

Era na vakaturi na sa mate. “Nira na vakaturi mai na yalododonu kei ira na sega ni yalododonu.” (Cakacaka 24:15) Ena yaga vei ira na iloloma ni Kalou, oya na isoro.

Ena cakava vakacava kece qori na Kalou?

Ena vakayacora na Kalou na nona inaki me baleti keda kei na vuravura ni vakayagataka na nona matanitu vakalomalagi, e kena iLiuliu digitaki o Jisu Karisito. (Same 110:1, 2) Qo e dua dina na matanitu, e vakavulica o Jisu vei ratou na nona imuri me ratou masuta: “Tamai keimami mai lomalagi, . . . me yaco mai na nomuni Matanitu.”—Maciu 6:9, 10.

Na Matanitu ni Kalou ena veiliutaki e vuravura, qai vakaotia vakadua na rarawa kece kei na mosi e yaco tiko kina. Na Matanitu qo e vinaka duadua vei ira kece na matanitu era sa veiliutaki oti! Qori na vuna e gumatua kina o Jisu me vunautaka “na itukutuku vinaka ni Matanitu” ena nona cakacaka vakaitalatala e vuravura, qai uqeti ira tale ga kina nona tisaipeli mera cakava.—Maciu 4:23; 24:14.

Na nona lomani keda vakalevu na Kalou o Jiova, e yalataka kina ni na vakayacora na veika totoka qori ena vukuda sara ga. Vakacava, sega ni uqeti iko qori mo kilai koya, mo drau veivolekati tale ga? Ena yaga vakacava ni o cakava qori? Ena vakamacalataki na kena isau ena ulutaga tarava.