Ngkana iai am kangaanga, ko na boni bae ni kantaningaa raoraom ni kaan bwa e na buokiko. N iaiangoan anne, a taku tabeman bwa tiaki te rao ni koaua te Atua ibukina bwa e aki kona ni buokiia. Ni koauana, e aki tii karaoi baika bati te Atua ibukini kabwaiara, ma e na boni buokira naba n ara kangaanga ni kabane ao n rawawatara ngkai. Tera ae e na karaoia te Atua?

E na katoka te buakaka ni kabane te Atua n arona ni kamauna nibwan te buakaka. E kaota nibwan te buakaka te Baibara ngke e kangai: “A bane kaain te aonnaba ni mena i aani mwaakan teuare buakaka.” (1 Ioane 5:19) “Teuare buakaka” bon akea riki bwa bon tii teuare e aranna Iesu bwa “te tia tautaeka i aoia kaain te aonnaba aei” ae Tatan te Riaboro. (Ioane 12:31) Ana kariri Tatan nakoia kaain te aonnaba boni ngaia oin rikin te karawawata n te aonnaba. Tera ae e na karaoia te Atua?

E na waekoa Iehova ae te Atua ni kabongana Natina ae Iesu Kristo bwa “e na kamauna teuare kona ni karekea te mate, are taekan te Riaboro.” (Ebera 2:14; 1 Ioane 3:8) E boni kaotia te Baibara bwa e ataia te Riaboro ae “e a kimototo ana tai” imwaini kamaunaana. (Te Kaotioti 12:12) E na boni kamaunaia akana kakaraoa ae buakaka te Atua.​—Taian Areru 37:9; Taeka N Rabakau 2:22.

Imwini kamaunaan te buakaka ni kabane man te aonnaba, ao e nang karaoa te bwai teuana ara tia Karikiriki ni kakororaoa iai ana kantaninga n aki toki ibukia aomata ao te aonnaba. Tera ae ti kona ni kariariaa?

Te rau ae akea tokina ao te mweraoi. “A na abana te aonnaba akana nimamannei, ao e na korakora kimwareireia n te rau ae bati.”​—Taian Areru 37:11.

Te amwarake ae kamarurung ae bati. “E na bati te uita n te aonnaba, ao e na taonako i aon taubukini maunga.”​—Taian Areru 72:16.

Mwenga aika kamwengaraoi ao te mwakuri ae rauaki te aba iai. “A na katei auti ao a na maeka i nanoia, ao a na uniki kureebe ni nne ni kureebe ao ni kang uaaia. . . . Ao a na bati kimwareireia au aomata aika rineaki n aia mwakuri baia.”​—Itaia 65:​21, 22.

Ko ingainga ni kan nori baikai? A nang riki bwa aroni maiuia aomata ni katoabong.

A aoraki ao a mamate aomata ngkai, ma e na aki reitinako. E nang uotii kakabwaia te Atua ake a reke man ana karea ni kaboomwi Iesu bwa e aonga “n aki kamaunaaki ane e onimakinna, ma e na reke irouna te maiu are aki toki.” (Ioane 3:16) E na tera mwina?

E na kamaunaaki te aoraki. “Akea te tia maeka iai ae e na kangai: ‘I aoraki.’ A na kabwaraaki aia bure aomata aika maeka n te aba.”​—Itaia 33:24.

A nang aki manga karawawataaki aomata n te mate. “E na onga te mate n aki toki, ao e na kaoi rannimata mani maata ni kabane te Uea ae Moan te Rietata ae Iehova.”​—Itaia 25:8.

A na maiu n aki toki aomata. “Te bwaintituaraoi ae e anga te Atua, bon te maiu are aki toki rinanoni Kristo Iesu ae ara Uea.”​—I-Rom 6:23.

A na kautaki ake a a tia ni mate. “A na boni mangauti akana raoiroi ma akana aki raoiroi.” (Mwakuri 24:15) A na kakabwaiaaki man ana bwaintituaraoi te Atua ae te kaboomwi.

E na kangaa te Atua ni kakororaoi baikai ni kabane?

E na kakororaoa ana kantaninga te Atua ibukia aomata ao te aonnaba rinanon te tautaeka mai karawa, are mwiokoaki iai Kristo Iesu bwa te tia Kairiri. (Taian Areru 110:​1, 2) Bon te tautaeka, ke te tautaeka n uea, are e reireinia taan rimwina Iesu bwa a na tataro ibukina ni kangai: “Tamara are i karawa, . . . e bia roko am Tautaeka n Uea.”​—Mataio 6:​9, 10.

E na kairiri ana Tautaeka n Uea te Atua n te aonnaba, ao e na katoki maraki ni kabane ma rawawata n te aonnaba. Bon aei te Tautaeka n Uea ae te kabanea n raoiroi ibukia aomata! Anne bukina are e kakorakoraa iai Iesu n tataekina “te rongorongo ae raoiroi ae taekan te Tautaeka n Uea” aei n ana mwakuri ni minita n te aonnaba, ao e tuangia taan rimwina bwa a na karaoa naba anne.​—Mataio 4:23; 24:14.

Ibukin ana tangira ae korakora Iehova ae te Atua ibukia ana karikibwai aika aomata, e berita bwa e na karaoi baikana tamaroa akanne ibukia. Tiaki e kairiko anne bwa ko na kani kinaa ao ni kaania riki? Ko na kangaa ni kakabwaiaaki mani karaoan anne? E na kabwarabwaraaki n te kaongora ae imwina.