Peteĩ amígo ningo haʼe pe persóna oĩtava nepytyvõ hag̃uáicha ehasa jave peteĩ mbaʼe ijetuʼúva. Upévare oĩ heʼíva Ñandejára ndahaʼeiha ñane amígo pórke opensa hikuái haʼe ndojapoiha mbaʼeve ñanderehehápe. Péro haʼe ojapóma ñanderehehápe hetaiterei mbaʼe ha amo gotyove ojapóta álgo oipeʼapaite hag̃ua umi mbaʼe ñanembosufríva ha umi provléma jarekóva. ¿Mbaʼépa ojapóta Ñandejára amo gotyove?

Ñandejára oipeʼapaitéta umi mbaʼe vai, ha upearã ohundíta pe omoñepyrũ vaʼekuépe umi mbaʼe. La Biblia omombeʼu porã máva káusarepa oĩ hetaite mbaʼe vai: “Ko múndo kompletoite oĩ pe aña poguýpe” (1 Juan 5:19). Pe “aña” haʼe hína Satanás, ha Jesús heʼi vaʼekue avei hese haʼeha “ko múndo ruvicha” (Juan 12:31). Satanás káusare ningo la oĩ hetaite mbaʼe ombosufríva la héntepe. ¿Mbaʼépa ojapóta Ñandejára?

Koʼẽrõitéma Jehová ojevaléta itaʼýrare ‘ohundi hag̃ua pe ikatúvape oporojuka, upéva hína pe Aña’ (Hebreos 2:14; 1 Juan 3:8). La Bíbliape heʼi voi pe Diablo oikuaaha “mbykypaitemaha itiémpo” térã saʼíma ofaltaha oñehundi hag̃ua (Apocalipsis 12:12). Ñandejára ohundíta avei umi persóna iñañávape (Salmo 37:9; Proverbios 2:22).

Ñandejára ohundi rire umi mbaʼe vai, oñenkargáta oñekumpli hag̃ua la haʼe oipota vaʼekue iñepyrũ guive umi hénte ha ko yvýpe g̃uarã. ¿Mbaʼéichapa jaikóta upéva oiko vove?

Jaikóta pyʼaguapýpe ha ndajakyhyjemoʼãvéima mbaʼevégui. “Umi hénte ivuénova opytáta ko yvy ape ári, haʼekuéra ovyʼaitereíta pórke oikóta pyʼaguapýpe ha noñekevrantamoʼãi mbaʼevete asýre” (Salmo 37:11).

Ndofaltamoʼãi jaʼu vaʼerã. “Ko yvy oprodusi porãitereíta, umi montáña ruʼãme entéro, hembypáta la ojekosecha vaʼerã” (Salmo 72:16).

Jarekóta ñande róga tee ha javyʼáta ñande traváhore. “Umi hénte ojogapóta ha oikóta hóga teépe, oñotỹta parrál ha hoʼúta hiʼa. [...] Umi che aiporavo vaʼekue ipyʼaite guive odisfrutáta itravahokuégui” (Isaías 65:21, 22).

¿Reikosépa nde peteĩ múndo peichaguápe? Koʼẽrõitéma koʼã mbaʼe oñekumplipaitéta.

Koʼág̃arupi ningo enterovéva ñanderasy ha upéi ñamano, péro koʼẽrõite ndahaʼemoʼãvéima upéicha. Jehová, itaʼýra Jesús sakrifísio rupive osalváta enterove umi ojeroviávape hese ha oipytyvõta chupekuéra oikove hag̃ua pára siémpre (Juan 3:16). ¿Mbaʼépa oikóta upéi?

Opaitéta umi mbaʼasy. “Ni peteĩ oikóva ko yvy ape ári ndeʼimoʼãvéima: ‘Cherasy hína’. Umi hénte oikóvape ko yvýpe oñeperdonátama umi mbaʼe vai ojapo vaʼekue” (Isaías 33:24).

Opaitéta ñemano. “Ñandejára Jehová ogovernáva opa mbaʼe ohundíta pe ñemano opa ára g̃uarã, ha omokãta umi hénte resay” (Isaías 25:8).

Jaikóta para siémpre. “Ñandejára orregala jeikove opaveʼỹva ñande Ruvicha Cristo Jesús rupive” (Romanos 6:23).

Umi omano vaʼekue oikove jeýta. ‘Oñemoingove jeýta umi hekojojáva ha hekojojaʼỹva’ (Hechos 24:15). Chupekuéra ohupytýta avei pe rregálo Ñandejára omeʼẽva Jesús sakrifísio rupive.

¿Mbaʼéichapa Ñandejára ojapóta koʼã mbaʼe?

Ñandejára okumplíta umi mbaʼe ojapose vaʼekue ymaite guive la hénte ha ko yvýpe g̃uarã, upearã omoĩ peteĩ goviérno yvágape ha oelehi Jesúspe ogoverna hag̃ua (Salmo 110:1, 2). Upéva hína pe goviérno térã Rréino Jesús voi heʼi vaʼekue isegidorkuérape ojerure hag̃ua iñemboʼépe: “Ore Ru reiméva yvágape [...]. Tou ne Rréino” (Mateo 6:9, 10).

Ñandejára Rréino ogovernáta ko yvy ha oipeʼapaitéta umi mbaʼe ñanembosufríva. Ndaipóri ótro goviérno iporãvéva ikatúva jareko. Upévare Jesús oĩrõ guare ko yvy ape ári oñehaʼãmbaite vaʼekue “omombeʼu umi marandu porã oñeʼẽva Ñandejára Rréinore” ha omanda idisipulokuérape ojapo hag̃ua avei upéva (Mateo 4:23; 24:14).

Jehová ningo ñanderayhúgui opromete ñandéve koʼã mbaʼe iporãitéva. Koʼã mbaʼe ñanemomýi ñañehaʼã hag̃ua jaikuaave chupe ha jaiko iñamígoramo. ¿Mbaʼépa ehupytýta ejapóramo upéva? Jahechamína upéva pe artíkulo oúvape.