Ũkethĩwa thĩnanĩ mũnene, vate nzika wĩthĩwa wĩkwatĩtye mũndũ mwĩ ndũũ aũtetheesye. O ta ũu, yĩla andũ me mathĩnanĩ nĩmethĩawa mekwatĩtye Ngai amatetheesye, ĩndĩ andũ amwe maasya kana Ngai ti mũnyanya woo nũndũ mayonaa ayosa ĩtambya ya kũmatetheesya. Ĩndĩ ũw’o nĩ kana ve maũndũ maingĩ maseo Ngai wĩkĩte kwondũ witũ, na ve maũndũ angĩ ũkeka nĩ kana atũvetangĩe mathĩna ala matũkwataa. Nĩ maũndũ meva Ngai ũkeka ĩvinda yũkĩte?

Ngai akavetanga ũthũku w’onthe kwa kwananga ũla ũtumaa ũthũku wĩthĩwa. Mbivilia nĩyĩeleetye ũla ũtumaa ũthũku wĩthĩwa kwa kwasya atĩĩ: “Nthĩ yonthe yĩ ungu wa vinya wa ũla mũthũku.” (1 Yoana 5:19) “Ũla mũthũku” nĩ Satani, ũla nĩwe Ndevili, na nĩwe Yesũ wamwĩtie “mũnene wa nthĩ ĩno.” (Yoana 12:31) Nũndũ Satani nĩwe ũtongoesye andũ aingĩ, nĩwe ũtumaa mathĩna methĩwa ĩũlũ wa nthĩ. Ĩndĩ we Ngai avangĩte kwĩsa kwĩka ata?

O mĩtũkĩ Yeova Ngai akatũmĩa Mwana wake, Yesũ Klĩsto, “kũmũmina ũla wĩ na ũtonyi wa kũete kĩkw’ũ, nake nĩ Ndevili.” (Aevelania 2:14; 1 Yoana 3:8) Mbivilia yonanĩtye kana Ndevili mwene nĩwĩsĩ vatiele “kavinda o kanini” anangwe. (Ũvuany’o 12:12) O na Ngai nũvangĩte kwananga andũ onthe ala mekaa mothũku.​—Savuli 37:9; Nthimo 2:22.

Amina kũvetanga ũthũku w’onthe ĩũlũ wa nthĩ, Mũmbi witũ akoosa ĩtambya nĩ kana eanĩsye kĩeleelo kyake. Kĩeleelo kĩu nĩ andũ mate na naĩ kwĩkala ĩũlũ wa nthĩ yĩ nzeo tene na tene. Nĩ maũndũ meva tũkona mayĩanĩa?

Nthĩ ĩkeethĩwa na mũuo na ĩte na mũisyo. Mbivilia yaĩtye atĩĩ: “Ala auu makatiĩwa nthĩ, na makeetan’ya mũuonĩ mwingĩ.”​—Savuli 37:11.

Kũkeethĩwa lĩu mwingĩ mũno. Mbivilia yaĩtye atĩĩ: “Kũkeethĩwa lĩu mwingĩ mũno wa mbaa ngetha nthĩ iĩmanĩ ĩũlũ.”​—Savuli 72:16.

Andũ makeethĩwa na nyũmba nzeo na makatanĩaa wĩa woo. Mbivilia yaĩtye atĩĩ: “Na makaaka nyũmba, na kũtũa nthĩnĩ wasyo; na makavanda mĩũnda ya mĩsavivũ, na makaya ũsyao wayo. . . . Na anyuve makwa makatanĩaa wĩa wa moko moo ĩvinda ĩasa.”​—Isaia 65:21, 22.

We wĩ na mea ma kwona maũndũ asu maseũvĩte ũu mayĩkĩka? O mĩtũkĩ maũndũ asu makilyĩ maneanĩa.

Ĩvindanĩ yĩĩ, vai mũndũ ũtawaa na vai mũndũ ũtesa kũkw’a. Ĩndĩ maũndũ asu makilyĩ kũthela. O mĩtũkĩ Ngai nũkatũmĩa vinya wa nthembo ya wovosyo ĩla Yesũ waumisye nĩ kana “kĩla mũndũ ũmũĩkĩĩaa ndakanangwe, ĩndĩ akwate thayũ wa tene na tene.” (Yoana 3:16) Ũndũ ũsu ũkatuma maũndũ methĩwa mailyĩ ata?

Mowau makathela. Mbivilia yaĩtye atĩĩ: “Ũla ũtwĩe kw’o ndakasya, Nyie nĩ mũwau; andũ ala matwĩe kw’o makaekewa ũthũku woo.”​—Isaia 33:24.

Kĩkw’ũ kĩikathĩny’a andũ ĩngĩ. Mbivilia yaĩtye: “Nũmeletye kĩkw’ũ tene na tene; na Mwĩaĩi Yeova akavyaĩa methoi mothyũnĩ onthe.”​—Isaia 25:8.

Andũ makekala tene na tene. Mbivilia yaĩtye: “Mũthĩnzĩo ũla Ngai ũnenganae nĩ thayũ wa tene na tene kwĩsĩla Klĩsto Yesũ, Mwĩaĩi waitũ.”​—Alomi 6:23.

Andũ ala makwie makathayũũkw’a. Mbivilia yaĩtye: “Kũkeethĩwa na ũthayũũkyo wa ala alũngalu na ala mate alũngalu.” (Meko ma Atũmwa 24:15) Nthembo ya wovosyo ĩla Ngai wanenganie nĩyo ĩkatuma ala akw’ũ mathayũũkw’a.

Ngai akeanĩsya maũndũ asu onthe ata?

Ngai akeanĩsya kĩeleelo kyake kwa andũ na nthĩ kwĩsĩla silikalĩ ya ĩtunĩ. Klĩsto Yesũ nĩwe ũnyuvĩtwe ethĩwe e Mũsumbĩ wa silikalĩ ĩsu. (Savuli 110:1, 2) Silikalĩ ĩsu nĩyo Yesũ wawetaa yĩla weeie aatĩĩi make mavoyae atĩĩ: “Asa waitũ ũla wĩ ĩtunĩ, . . . Ũsumbĩ waku wũke.”​—Mathayo 6:9, 10.

Ũsumbĩ wa Ngai ũkasumbĩka ĩũlũ wa nthĩ na ũivetanga vyũ woo na mathĩna ala matũkwataa. Vai ũsumbĩ ũngĩ mũseo ta ũsu ũtonya kũsumbĩka andũ! Na nĩkyo kĩtumi Yesũ e ĩũlũ wa nthĩ waĩ na kĩthito kingĩ kya kũtavany’a “ũvoo mũseo wa Ũsumbĩ,” na weeie amanyĩw’a make mekae oou.​—Mathayo 4:23; 24:14.

Nũndũ Yeova Ngai nĩwendete andũ, nũmathĩte kana akeanĩsya maũndũ asu maseo. W’o ũndũ ũsu tyo waĩle kũtuma wenda kũmũmanya Ngai na wĩthĩwa na ngwatanĩo nzeo vamwe nake? Ũkatetheka ata wanyuva kwĩka ũu? Kĩlungu kĩla kĩatĩĩe nĩkĩeleetye ũndũ ũsu.