Ныбжьэгъу пэжыр сыт щыгъуи къыбдэІэпыкъуну хьэзырщ. Ауэ Алыхьыр къадэІэпыкъуу цІыхухэм зэрызыхамыщІэм щхьэкІэ ар ямыныбжьэгъуу жаІэ. Пэжыр жыпІэмэ, Алыхьым дэ куэд къытхуищІащ. Абы нэмыщІ куэд мыщІэу абы ди гугъуехьхэм кІэ иритынущ. Дапхуэдэу?

Алыхьым кІэ къыхуигъэкІуэнущ Іейми, Іейр къызыбгъэдэкІми. «Дуней псори шейтІаным и ІэмыщІэ зэрилъри дощІэ»,— жеІэ Библием (1 Иуан 5:19). Хьисэ Мэссихьи зэрыжиІамкІэ, ШейтІаныращ дунейм и тепщэр (Иуан 12:31). Аращи, цІыхубэм апхуэдиз хьэзаб щІытелъыр дунейр Иблис и ІэмыщІэ зэрилъыращ. АтІэ дауэ Иеговэ псори зэрызригъэзэхуэжынур?

«ЛІэныгъэм тепщэныгъэ хузиІэ шейтІаныр» игъэкІуэдыну Иеговэ Хьисэ Мэссихь къалэн щищІащ (Еврейхэм 2:14; 1 Иуан 3:8). Библием зэрыжиІэмкІэ, ШейтІаным «зэману езым къыхуэнэжыр зэрымащІэр ещІэ» (Апокалипсис 12:12). Абы нэмыщІ нэгъуэщІхэм зэран хуэхъу псори Алыхьым щІылъэм тригъэкъэбзыкІынущ (Псалом 37:9; Притчи 2:22).

Алыхьым дуней псом Іейр тригъэкІуэдыкІа нэужь, щІылъэмрэ цІыхухэмрэ хуиІэ мурадыр игъэзэщІэжын щІидзэнущ. Сыт-тІэ Иеговэ дэ къытхуищІэнур?

Мамыру, шынагъэ щымыІэжу дыпсэунущ. «Іэдэбхэм щІыр щІэину ялъысынущ икІи мамырыгъэкІэ загъэнщІу псэунущ» (Псалом 37:11).

Ерыскъы узыншэ икІи шхыныгъуэ ІэфІхэр пэрыхьэту щыІэнущ. «ЩыІэнущ пэрыхьэту щІакхъуэр дуней псом, бгыщхьэхэм ар берычэту щыІэнущ» (Псалом 72:16).

УнэфІрэ удэзыхьэх лэжьыгъэрэ. «ЦІыхухэм унэхэр яухуэнущ икІи абыхэм щыпсэунущ, жызум хадэхэри хасэнущ икІи абыхэм къыпыкІэхэри яшхынущ. [...] ...Сэ къыхэсхахэм я ІэдакъэщІэкІыр куэдрэ къагъэсэбэпынущ» (Исаия 65:21, 22).

Ухуейт уэ а псор уи нэкІэ плъэгъуну? Куэд мыщІэу цІыху псоми апхуэдэ гъащІэ дахэ къалъысынущ.

Узыфэхэмрэ лІэныгъэмрэ нобэ цІыхухэм ятелъ нэлатщ. Ауэ сыт щыгъуи апхуэдэу щытынукъым. Куэд мыщІэу Хьисэ ита къурмэныпхъэм и фІыгъэкІэ «Тхьэм и КъуэмкІэ фІэщхъуныгъэ зиІэ дэтхэнэри мыкІуэду къелын икІи мыкІуэдыжын гъащІэ иІэ» хъунущ (Иуан 3:16). Сыт дэ абы къытхуихьынур?

Узыфэхэр афІэкІа щыІэжынукъым. «Зы цІыхуми жиІэнукъым: „Сэ сысымаджэщ“. А щІыналъэм щыпсэу лъэпкъым и гуэныхьыр хуэгъунущ» (Исаия 33:24).

ЦІыхубэр лІэныгъэм къыІэщІэкІынущ. «Абы лІэныгъэр игъащІэкІэ игъэкІуэдынущ, икІи псори зи ІэмыщІэ илъ Зиусхьэн Иеговэ цІыхухэм я нэпсхэр ящІилъэщІыкІыжынущ» (Исаия 25:8).

ЦІыхухэм гъащІэ мыухыж яІэу псэунущ. «Тхьэм къыдит тыгъэшхуэр мыкІуэдыжын гъащІэщ» (Рим 6:23).

ЛІахэр жэнэтыщІым къыщытэджыжынущ. «Щыпкъагъэ зиІи зимыІи Тхьэм» къигъэтэджыжынущ (Апостолхэм 24:15). ЛІахэр къызэрытэджыжынур зи фІыгъэр Алыхьым дэр щхьэкІэ ита щхьэщэхужыращ.

Дауэ Алыхьым а псор зэригъэзэщІэнур?

ЩІылъэмрэ цІыхухэмрэ яхуиІэ мурадыр игъэзэщІэн щхьэкІэ, Иеговэ уафэм Пащтыхьыгъуэ щытригъэуващ икІи Хьисэ Мэссихь абы и Пащтыхь ищІащ (Псалом 110:1, 2). А Пащтыхьыгъуэращ Хьисэ зи гугъу ищІар мыпхуэдэу щыжиІам: «Уэ ди Адэ лъапІэу уафэм щыІэ! [...] Уи Тепщэныгъэшхуэр кърекІуэ» (Маттэ 6:9, 10).

Алыхьым и Пащтыхьыгъуэр дуней псом и тепщэу щытынущ икІи цІыху псори гуауэмрэ гузэвэгъуэмрэ къыІэщІихынущ. А Пащтыхьыгъуэм хуэдэ щыІэкъым! Аращ Хьисэ щІылъэм щыщыІам псэемыблэжу «Тхьэм и Тепщэныгъэшхуэм теухуа хъыбарыфІыр» щІигъэІуар. Ар дыдэр ящІэну и гъэсэнхэми унафэ яхуищІащ (Маттэ 4:23; 24:14).

Апхуэдэ зэхъуэкІыныгъэфІхэр дунейм хилъхьэну Иеговэ хуэзыгъэушыр цІыхухэм яхуиІэ лъагъуныгъэшхуэращ. Апхуэдиз лъагъуныгъэ зыхэлъ Алыхьым теухуауэ нэхъыбэ къапщІэу, абы гъунэгъу ухуэхъуну ухуейт? Алыхьым теухуа щІэныгъэм сыт уэ къыпхуихьынур? КъыкІэлъыкІуэ статьям ар щызэпкърытхынщ.