قۇداي تاعالانىڭ نەندەي وي-ماقساتى بار؟
باسىنا قيىندىق بۇلتى تورلاعاندا، ادام جان دوسى قاسىنان تابىلىپ، قول ۇشىن بەرەدى دەپ ۇمىتتەنەرى حاق. وسىنى ەسكەرسەك، ومىردە قيىنشىلىق كورىپ جۇرگەن كەيبىر ادامدار: «قۇداي تاعالانى قالاي دوس دەپ ايتا الاسىڭ؟ ول مەن ٷشىن ەشتەڭە ىستەپ جاتقان جوق قوي»،— دەپ جاتادى. اقيقاتىندا، اللا تاعالا ٴبىز ٷشىن كوپ جاقسىلىق جاساپ قانا قويعان جوق، ول بار تاۋقىمەتىمىز بەن قاسىرەتىمىزدەن ارىلتۋ ٷشىن ٴبىر قارەكەت جاساماق. ونىڭ نەندەي وي-ماقساتى بار؟
زۇلىمدىق اتاۋلىنىڭ تۇبىنە بالتا شابادى
قۇداي تاعالا زۇلىمدىق اتاۋلىنى جويۋ ٷشىن ونىڭ ٴتۇپ كوزىن قۇرتپاق. كيەلى جازبالار: «بۇكىل دۇنيە شايتاننىڭ بيلىگىندە»،— دەپ، زۇلىمدىقتىڭ ٴتۇپ كوزىن ايان ەتكەن (جوحاننىڭ 1-حاتى 5:19). يسا پايعامبار دا شايتان ٸبىلىستى «وسى دۇنيەنىڭ بيلەۋشىسى» دەپ اتاعان (جوحان 12:31). وسى شايتاننىڭ ادامزاتقا تيگىزىپ جاتقان ىقپالى جەر بەتىندەگى ايانىشتى حال-احۋالدىڭ ٴتۇپتامىرى بولىپ وتىر. ال بۇل ورايدا قۇداي تاعالا نە ىستەمەك؟
ول جۋىردا يسا ٴماسىح ارقىلى ارەكەت ەتىپ، ٸبىلىستىڭ كوزىن قۇرتادى (ەۆرەيلەرگە 2:14؛ جوحاننىڭ 1-حاتى 3:8). نەگىزى، كيەلى جازبالاردا ايتىلعانداي، ٸبىلىستىڭ ٶزى دە جويىلاتىن «ۋاقىتىنىڭ از قالعانىن بىلەدى» (ايان 12:12). قۇداي سونداي-اق كۇللى زۇلىمدىقپەن قوسا، زۇلىمدىق جاساۋشىلاردى دا جويادى (ٴزابۇر 37:9؛ ناقىل سوزدەر 2:22).
جەر بەتىن جۇماققا اينالدىرادى
زۇلىمدىقتىڭ تامىرىنا بالتا شاپقان سوڭ، جاراتۋشىمىز ادامزات پەن جەرگە بايلانىستى ٶزىنىڭ و باستاعى وي-ماقساتىن جۇزەگە اسىرۋعا كىرىسەدى. ولاي بولسا، الدا ٴبىزدى نە كۇتىپ تۇر؟
تاۋسىلماس تىنىشتىق پەن قاۋىپسىزدىك. «مومىندار جەردى مۇرا ەتەدى، كەرەمەت تىنىشتىق ورناعانىن كورىپ، شاتتىققا كەنەلەدى» (ٴزابۇر 37:11).
استا-توك ٴنارلى تاعام. «جەر بەتىنە استىق مول شىعادى، تاۋلاردىڭ باسىندا دا اعىل-تەگىل بولادى» (ٴزابۇر 72:16).
جايلى باسپانا مەن جاندى جادىراتاتىن جۇمىس. «جۇرت ۇيلەر سالىپ، سولارعا قونىستانادى، جۇزىمدىكتەر وتىرعىزىپ، جەمىسىن جەيتىن بولادى... تاڭداۋلىلارىم ەڭبەكتەرىنىڭ راقاتىن كورەدى» (يشايا 65:21، 22).
ٴسىز وسىنداي ٶمىردى اڭسايسىز با؟ جاقىندا بارشا جاننىڭ تاڭى وسىلاي اتىپ، كۇنى وسىلاي باتاتىن بولادى.
اۋرۋ مەن ٶلىمدى جوق قىلادى
بۇگىندە اۋىرمايتىن، ولمەيتىن پەندە جوق، ٴبىراق بۇل ماڭگى جالعاسپايدى. قۇداي تاعالا جۋىردا يسا پايعامباردىڭ تولەم قۇرباندىعى بەرەتىن يگىلىكتەردى جۇزەگە اسىرادى. سوندا «وعان سەنگەن اركىم جويىلماي، ماڭگىلىك ومىرگە يە بولا الادى» (جوحان 3:16). ەندى وسىعان توقتالىپ وتەيىك.
اۋرۋ دەگەن اتىمەن قۇريدى. «ەشكىم: «مەن ناۋقاسپىن»،— دەمەيتىن بولادى. ەل تۇرعىندارىنىڭ كۇنالارى كەشىرىلەدى» (يشايا 33:24).
ٶلىم بۇدان بىلاي ەشكىمدى جالمامايدى. «ٶلىمدى ٴبىرجولا جوق قىلادى، الەمنىڭ ٵمىرشىسى ەحوبا بارلىق كوز جاستى سۇرتەدى» (يشايا 25:8).
ادامدار ماڭگى جاسايدى. «قۇدايدىڭ سيى — يەمىز ٴماسىح يسا ارقىلى بەرىلەتىن ماڭگىلىك ٶمىر» (ريمدىكتەرگە 6:23).
مارقۇمدار ومىرگە قايتا ورالادى. «قۇداي ادىلدەردى دە، ادىلەتسىزدەردى دە قايتا تىرىلتەدى» (ەلشىلەردىڭ ىستەرى 24:15). تولەم قۇرباندىعىنىڭ ارقاسىندا ومىردەن وزعاندار قايتا تىرىلەدى.
قۇداي تاعالا مۇنىڭ ٴبارىن قالاي جۇزەگە اسىرادى؟
ٴمىنسىز ۇكىمەت ورناتادى
جاراتۋشىمىز ادامزات پەن جەرگە قاتىستى اۋەل باستاعى وي-نيەتىن كوكتەگى ۇكىمەت ارقىلى ىسكە اسىرادى. ول وسى ۇكىمەتتىڭ بيلەۋشىسى ەتىپ يسا ٴماسىحتى تاعايىنداعان (ٴزابۇر 110:1، 2). كەزىندە يسا پايعامبار ٸزباسارلارىنا وسى ۇكىمەت، ياكي پاتشالىق، تۋرالى «كوكتەگى اكەمىز،.. سەنىڭ پاتشالىعىڭ كەلسىن!» دەپ دۇعا ەتۋدى ۇيرەتكەن (ماتاي 6:9، 10).
قۇداي پاتشالىعى بۇكىل جەر بەتىنە بيلىك جۇرگىزىپ، ونى كۇللى زۇلمات پەن قاسىرەتتەن ارىلتادى. الەمدە بۇل پاتشالىققا تەڭ كەلەر ۇكىمەت جوق! سول سەبەپتەن دە يسا پايعامبار جەر بەتىندە بولعاندا، «پاتشالىق تۋرالى ىزگى حاباردى ۋاعىزداۋدا» الدىنا جان سالماعان. ول ٸزباسارلارىنا دا وسى ٸستى اتقارۋدى اماناتتاعان (ماتاي 4:23؛ 24:14).
پەندەلەرىنە دەگەن ماحابباتى وراسان زور بولعاندىقتان، ەحوبا قۇداي ولار ٷشىن وسى عانيبەت نارسەلەردى جاساۋدى ۋادە ەتۋدە. بۇل جايت، استە، ادامدا قۇداي تاعالانى تانىپ، وعان جاقىنداي تۇسۋگە دەگەن نيەت وياتار. ەگەر سىزدە دە وسىنداي نيەت پايدا بولسا، مۇنىڭ بەرەر يگىلىگى قانداي؟ كەلەسى ماقالا وسىعان ارنالادى.
قۇدايدىڭ نەندەي وي-ماقساتى بار؟ ول اۋرۋ مەن ٶلىمدى جويادى؛ ادامزاتتى ٶزىنىڭ پاتشالىق ۇكىمەتىنىڭ قول استىنا بىرىكتىرەدى؛ جەر بەتىن جۇماققا اينالدىرادى
قىزىقتى بولار مالىمەتتەر
كۇزەت مۇناراسى
قۇداي تاعالانى تانۋدىڭ بەرەر يگىلىگى قانداي؟
قۇدايمەن دوس بولاتىن ادامدار قالاي جارىلقانادى؟
كيەلى كىتاپ. سۇراقتار مەن جاۋاپتار
قۇداي پاتشالىعى دەگەن نە؟
قۇداي پاتشالىعى نەگە ادامي ۇكىمەتتەردىڭ بارىنەن اسىپ تۇسەتىنى جايىندا ٴبىلىڭىز.
كيەلى كىتاپ. سۇراقتار مەن جاۋاپتار
بار قايعى -قاسىرەتكە ٸبىلىس كىنالى مە؟
كيەلى كىتاپتا ادامداردىڭ نە سەبەپتى قينالىپ، ازاپ شەگەتىنى جازىلعان.
كۇزەت مۇناراسى
قۇداي بار قايعى-قاسىرەتتى توقتاتادى
قۇدايدىڭ بارلىق قايعى-قاسىرەت پەن ادىلەتسىزدىكتى جوياتىنىن قايدان بىلەمىز؟
