តើព្រះនឹងធ្វើអ្វី?
បើអ្នកជួបការពិបាក អ្នកច្បាស់ជារំពឹងថាមិត្តល្អនឹងធ្វើអ្វីមួយដើម្បីជួយអ្នក។ ដោយយល់ដូច្នេះ អ្នកខ្លះនិយាយថាព្រះមិនមែនជាមិត្តភក្ដិទេ ដោយសារពួកគេមានអារម្មណ៍ថាព្រះមិនបានធ្វើអ្វីដើម្បីជួយពួកគេឡើយ។ តាមការពិត ព្រះមិនគ្រាន់តែបានធ្វើអ្វីជាច្រើនដើម្បីជាប្រយោជន៍ដល់យើងប៉ុណ្ណោះទេ ប៉ុន្តែលោកក៏នឹងធ្វើអ្វីមួយដើម្បីដោះស្រាយរាល់បញ្ហានិងទុក្ខវេទនាដែលយើងកំពុងជួបប្រទះនៅសព្វថ្ងៃនេះដែរ។ ដូច្នេះ តើព្រះនឹងធ្វើអ្វី?
អំពើអាក្រក់សព្វបែបយ៉ាងនឹងលែងមានទៀត
ព្រះនឹងបំបាត់អំពើអាក្រក់សព្វបែបយ៉ាងដោយបំផ្លាញប្រភពនៃអំពើអាក្រក់ទាំងនោះ។ គម្ពីរបង្ហាញប្រាប់ថាតើប្រភពនោះជាអ្វី ពេលដែលចែងថា៖ «ពិភពលោកទាំងមូលនៅក្រោមអំណាចរបស់មេកំណាច»។ (យ៉ូហានទី១ ៥:១៩) ច្បាស់ណាស់ «មេកំណាច»នោះគឺជាបុគ្គលដែលលោកយេស៊ូបានហៅថា «អ្នកគ្រប់គ្រងពិភពលោកនេះ» ពោលគឺមេកំណាចសាថាន។ (យ៉ូហាន ១២:៣១) ឥទ្ធិពលរបស់សាថានមកលើពិភពលោកគឺជាប្រភពនៃទុក្ខវេទនានិងបញ្ហាដែលមាននៅលើផែនដី។ តើព្រះនឹងធ្វើយ៉ាងណា?
មិនយូរទៀត ព្រះយេហូវ៉ានឹងប្រើបុត្ររបស់លោក គឺលោកយេស៊ូគ្រិស្ដឲ្យ«បំផ្លាញចោលអ្នកដែលមានសមត្ថភាពបណ្ដាលឲ្យស្លាប់ ពោលគឺមេកំណាច»។ (ហេប្រឺ ២:១៤; យ៉ូហានទី១ ៣:៨) តាមពិត គម្ពីរបង្ហាញថាមេកំណាចផ្ទាល់ដឹងថា«វាមានពេលតែបន្តិចបន្តួច»មុនវានឹងត្រូវបំផ្លាញ។ (ការបើកបង្ហាញ ១២:១២) ព្រះនឹងបំបាត់ចោលអំពើអាក្រក់ទាំងអស់ ព្រមទាំងអ្នកដែលប្រព្រឹត្តអំពើអាក្រក់នោះផងដែរ។—ទំនុកតម្កើង ៣៧:៩; សុភាសិត ២:២២
ផែនដីទៅជាសួនឧទ្យាន
ក្រោយពីបំបាត់ចោលអំពើអាក្រក់ទាំងអស់ពីផែនដី អ្នកបង្កើតរបស់យើងនឹងចាត់វិធានការដើម្បីសម្រេចគោលបំណងរបស់លោកដែលឲ្យមនុស្សរស់ជារៀងរហូតលើផែនដី។ នៅគ្រានោះ តើយើងអាចទន្ទឹងរង់ចាំអ្វីខ្លះ?
សេចក្ដីសុខនិងសន្តិភាពជារៀងរហូត។ «មនុស្សរាបសា គេនឹងបានផែនដីជាមរដក ហើយនឹងបានចិត្តរីករាយ ដោយសេចក្ដីក្សេមក្សាន្តដ៏បរិបូរ»។—ទំនុកតម្កើង ៣៧:១១
អាហារជាបរិបូរ។ «នឹងមានស្រូវជាបរិបូរនៅក្នុងស្រុក រហូតដល់កំពូលភ្នំ»។—ទំនុកតម្កើង ៧២:១៦
ផ្ទះសមរម្យនិងការងារដ៏ស្កប់ចិត្ត។ «គ្រានោះ មនុស្សនឹងសង់ផ្ទះ ហើយនឹងអាស្រ័យនៅផង ក៏នឹងដាំចំការទំពាំងបាយជូរ ហើយនឹងបរិភោគផលដែរ។ . . . ពួករើសតាំងរបស់អញនឹងប្រើប្រាស់ការដែលដៃគេធ្វើជាយឺនយូរទៅ»។—អេសាយ ៦៥:២១, ២២
តើអ្នកចង់ឃើញស្ថានភាពបែបនេះឬទេ? មិនយូរទៀត មនុស្សគ្រប់គ្នានឹងមានស្ថានភាពដូចនេះរាល់ថ្ងៃ។
ជំងឺនិងសេចក្ដីស្លាប់នឹងលែងមានទៀត
សព្វថ្ងៃនេះ មនុស្សទាំងអស់ឈឺហើយទីបំផុតស្លាប់ ប៉ុន្តែនេះនឹងមិនមានយូរទៀតឡើយ។ មិនយូរទៀត ព្រះនឹងជួយមនុស្សឲ្យទទួលប្រយោជន៍ពេញលេញពីគ្រឿងបូជាលោះរបស់លោកយេស៊ូ ដើម្បីឲ្យ«អស់អ្នកដែលបង្ហាញជំនឿលើបុត្រនោះអាចមានជីវិតដែលគ្មានទីបញ្ចប់ ហើយមិនត្រូវបំផ្លាញឡើយ»។ (យ៉ូហាន ៣:១៦) តើនាំឲ្យមានលទ្ធផលយ៉ាងណាខ្លះ?
ជំងឺនឹងត្រូវលុបបំបាត់។ «ពួកអ្នកដែលនៅក្នុងក្រុងគេនឹងមិនថា៖ ‹ខ្ញុំឈឺ›ទៀតឡើយ។ ព្រះទ្រង់នឹងអត់ទោសចំពោះអំពើទុច្ចរិតរបស់ប្រជាជនផង»។—អេសាយ ៣៣:២៤
សេចក្ដីស្លាប់នឹងលែងមានទៀត។ «ទ្រង់នឹងបំផ្លាញសេចក្ដីស្លាប់ឲ្យសូន្យបាត់ទៅជាដរាប នោះព្រះអម្ចាស់យេហូវ៉ា ទ្រង់នឹងជូតទឹកភ្នែកពីមុខមនុស្សទាំងអស់»។—អេសាយ ២៥:៨
មនុស្សនឹងរស់ជារៀងរហូត។ «អំណោយដែលព្រះផ្ដល់ឲ្យគឺជាជីវិតដែលគ្មានទីបញ្ចប់ ដោយគ្រិស្ដយេស៊ូ ជាម្ចាស់របស់យើង»។—រ៉ូម ៦:២៣
មនុស្សស្លាប់នឹងត្រូវប្រោសឲ្យរស់ឡើងវិញ។ «មនុស្សសុចរិតនិងមនុស្សមិនសុចរិតនឹងត្រូវប្រោសឲ្យរស់ឡើងវិញ»។ (សកម្មភាព ២៤:១៥) ពួកគេនឹងទទួលប្រយោជន៍ពីថ្លៃលោះដែលជាអំណោយពីព្រះ។
តើព្រះនឹងសម្រេចអ្វីទាំងអស់នេះតាមរបៀបណា?
ការស្ថាបនារដ្ឋាភិបាលដ៏ល្អឥតខ្ចោះ
ព្រះនឹងសម្រេចគោលបំណងរបស់លោកសម្រាប់មនុស្សជាតិនិងផែនដី តាមរយៈរដ្ឋាភិបាលនៅស្ថានសួគ៌ ដោយមានលោកយេស៊ូគ្រិស្ដជាអ្នកគ្រប់គ្រងដែលព្រះបានតែងតាំង។ (ទំនុកតម្កើង ១១០:១, ២) លោកយេស៊ូបានបង្រៀនអ្នកកាន់តាមលោកឲ្យអធិដ្ឋានអំពីរដ្ឋាភិបាលឬរាជាណាចក្រនោះ ដោយពោលថា៖ «ឱបិតារបស់យើងដែលនៅស្ថានសួគ៌ . . . សូមឲ្យរាជាណាចក្ររបស់លោកបានមកដល់»។—ម៉ាថាយ ៦:៩, ១០
រាជាណាចក្រព្រះនឹងគ្រប់គ្រងមកលើផែនដី ហើយបំបាត់ចោលការឈឺចាប់និងទុក្ខវេទនាទាំងអស់ពីផែនដីនេះ។ រាជាណាចក្រនេះគឺជារដ្ឋាភិបាលល្អបំផុតដែលមនុស្សជាតិអាចមាន! នេះជាមូលហេតុដែលលោកយេស៊ូខំព្យាយាមប្រកាស«ដំណឹងល្អអំពីរាជាណាចក្រ»ក្នុងអំឡុងកិច្ចបម្រើផ្សាយរបស់លោកនៅផែនដី ហើយបានប្រាប់អ្នកកាន់តាមលោកឲ្យធ្វើដូចគ្នាដែរ។—ម៉ាថាយ ៤:២៣; ២៤:១៤
ដោយសារព្រះយេហូវ៉ាស្រឡាញ់មនុស្សដែលលោកបានបង្កើតយ៉ាងខ្លាំង នោះលោកបានសន្យាថានឹងធ្វើអ្វីដ៏អស្ចារ្យទាំងអស់នេះដើម្បីពួកគេ។ ដោយដឹងដូច្នេះ នោះច្បាស់ជាធ្វើឲ្យអ្នកចង់ស្គាល់លោកនិងចូលទៅជិតលោក មែនទេ? បើអ្នកធ្វើដូច្នេះ តើអ្នកនឹងទទួលប្រយោជន៍អ្វីខ្លះ? អត្ថបទបន្ទាប់នឹងពន្យល់។
តើព្រះនឹងធ្វើអ្វី? ព្រះនឹងលុបបំបាត់ជំងឺនិងសេចក្ដីស្លាប់ ធ្វើឲ្យមនុស្សទាំងអស់មានសាមគ្គីភាពក្រោមរដ្ឋាភិបាលនៃរាជាណាចក្រព្រះ ហើយធ្វើឲ្យផែនដីទៅជាសួនឧទ្យាន