Se wa kexile mu bhita mu ibhidi, sé phata ki weji kingila kwila kamba dyé dya kazola u ku kwatekesa? Mukonda dya kiki, amoxi amba kwila Nzambi ki dikamba, mukonda ene a banza kwila Nzambi ka mu bhanga kima ku mwenyu wâ. Mu kidi Nzambi, ka bhange ngó ima yavulu phala o mbote yetu, maji wa-nda zubha we o ibhidi i twene mu dibhana na-yu lelu. Ihi ya-nda bhanga Nzambi?

Nzambi wa-nda zubha o kuyibha kwoso, mu kubwikisa o ima yoso i bheka o kuyibha. O Bibidya ijimbulula se nanyi wa mu bheka o ibhidi yoso yiyi, kyoso kyambe: “O mundu woso-phe wa zeka mwa Kadyaphemba.” (1 Nzwá 5:19) Kifwa, o nguma yiyi, yó a mu tumbula kwa Jezú kwila “o sobha ya mundu yú,” Satanaji, o Dyabhu. (Nzwá 12:31) O ibhangelu ya Satanaji ku mundu yene ya mu bheka o kuyibha mu ixi. Ihi ya-nda bhanga Nzambi?

Bhu kaxi ka mon’ê Jezú Kidistu, Jihova Nzambi wa-nda bhanga kima phala “kutolola yó woso wa kwata o nguzu ya kalunga, mwène Dyabhu.” (Jihebelewu 2:14; 1 Nzwá 3:8) Mu kidi o Bibidya i londekesa kwila Dyabhu wejiya kuma “o thembu yê ya butu kya” phala ku mu bwika. (Dijingunwinu 12:12) Kwa kambe ngó, Nzambi wa-nda zubha o ima yoso i bheka o kuyibha.—Jisálamu 37:9; Jisabhu 2:22.

Kyoso kya-nda zubha o kuyibha kwoso mu ixi, o Mubhangi wetu, wa-nda bhanga yoso phala ku kumbidila o vondadi yê ya kubhanga o ixi kukituka Palayízu phala o athu a yuka a kale ni mwenyu wa kalelaku. Ihi i tu kingila kupholo?

Kutululuka ni kukondama kwa kidi. “Oso-phe a lenduka, ene a lundula o ixi; A kala ku ngalasa ni kutululuka kwavulu.” —Jisálamu 37:11.

Ima yavulu yambote ni kudya “Mu ngongo mu kale nzungule ya masa katé ni ku thandu dya milundu; ixina yê i kale mu lokosa kala muxitu wa Libanu; athu mu jimbonge joso a kale mu fwafwa kala yangu mu mukáwu.”—Jisálamu 72:16.

Jinzo jambote ni salu yambote. “Ene-phe a kà tunga jinzo, anga a kala-mu; a kà dima milenga ya mivide, anga a kà dyá idima yê.”—Izaya 65:21, 22.

O kwila wala ni hânji ya kumona o ima yiyi ku dikumbidila? Kwa kambe ngó, o ima yiyi twa-nda i mona kudikumbidila.

Lelu etwenyoso twene mu kata ni kufwa, maji kiki, ki kya-nda bhita dingi. Mu kusuluka Nzambi wa-nda tu bhana o mbote ijila ku sata ya kukula kwa Jezú. Mu kiki, “woso u mu xikana mwène, kafwe, maji a kale ni mwenyu ki wabhwa.” (Nzwá 3:16) Ihi i twa-nda tambula?

Ki kwa-nda kala dingi mawuhaxi. “Ki bhwa kà kala mukwa-bhata mu Jeluzaleme wila: Nga kata. lémbwa, mukonda o mundu wa kà tunga-mu, ki wa kà kala dingi ni kikuma, mbata o ituxi yâ yoso a kà a loloka-yu.”—Izaya 33:24.

Ki kwa-nda kala dingi kalunga. “O kalunga wa ka kà bhwisa-ku nzaká, kyenyiki Jihova wa kà kondona o masoxi mu pholo joso, inga mu ixi yoso u katula-mu o kusebhuluka kwa mundu wê, kuma Jihova mwene wa ki tange.” —Izaya 25: 8.

Athu a-nda kala ni mwenyu wa kalelaku. “Maji o ujitu-phe wa Nzambi mwenyu ki wabhwa, mwa [Kidistu] Jezú, Ngana yetu.”—Loma 6:23.

Athu afu a-nda ku a fukununa. “Kukala difukunukinu dya athu ayuka ni athu abhukumuka.” (Ikalakalu 24:15) Ene a-nda katula mbote ku ujitu wa bhana Nzambi, o sata ya kukula.

Kyebhi Nzambi kya-nda kumbidila o ima yiyi?

Nzambi wa-nda kumbidila o vondadi yê bhu kaxi ka utuminu wa dyulu ni Jezú Kidistu kala o Sobha a mu tumbika. (Jisálamu 110:1, 2) Yú wene o unguvulu mba utuminu wa tangela Jezú ku maxibulu mê phala kubhinga mu musambu ni izwelu: “Tata yetu wene mu dyulu, . . . Utuminu wé wize.” —Matesu 6:9, 10.

O Utuminu wa Nzambi, wa-nda tumina mu ixi yoso ni kuzubha o jiphaxi mu ngongo. Yú wene o Utuminu wa beta-kota wa mesena o athu! Kiki kyene kya bhangesa Jezú kuswina mu kuboka “o Njimbu yiyi yambote ya Utuminu” mu kithangana kya ukunji wê mu ixi ni kutangela o maxibulu mê kubhanga o kikalakalu kiki. —Matesu 4:23; 24:14.

Bhu kaxi ka henda yê ya dikota ku athu, Jihova Nzambi wa kanena kubhanga o ima yoso ya yuka phala ene. O kwila kiki ki kyeji kubhangesa ku mwijiya dingi ni ku mu zukama? Mbote yahi i wa-nda katula se u sola o kubhanga kiki? O milongi ya kayela ya-nda jimbulula.