Vava okalanga mu mpasi, nanga ovingilanga vo nkundi aku kavanga diambu muna kusadisa. Muna kuma kiaki, akaka bevovanga vo Nzambi ke nkundi au ko kadi bemonanga vo ke vanganga diambu ko muna kubasadisa. Kansi e ziku kia diambu i kiaki: Nzambi mayingi kavangidi kala muna wete dieto ye ke kolo ko diambu diankaka kevanga mu kuma kia mpasi zawonso tunuananga zau o unu. Adieyi o Nzambi kesinga vanga?

Nzambi osinga fokola e mbi yawonso vava kesukisa e tuku dia mambu mawonso mambi. Nkand’a Nzambi usenzekanga e tuku diadi muna mvovo emi: “E nza yawonso muna wisa kia ndiona wambi ina.” (1 Yoane 5:19) “Ndiona wambi” oyikwanga mu sono kiaki i ndiona Yesu kayikila vo “nyadi a nza yayi,” i sia vo, Satana wa Nkadi ampemba. (Yoane 12:31) Wau vo Satana oyalanga e nza yayi, yandi i tuku dia mpasi zawonso zina ova nza. Adieyi o Nzambi kesinga vanga?

Ke kolo ko, Yave wa Nzambi osadila Mwan’andi Yesu Kristu mu ‘fwasa ndiona una yo nkuma watwasa lufwa, i sia vo, Nkadi ampemba.’ (Ayibere 2:14; 1 Yoane 3:8) Nkand’a Nzambi usonganga vo Nkadi ampemba ozeye wo vo “kolo kiandwelo kaka kasidi kiau” muna fwaswa emvimba. (Lusengomono 12:12) Nzambi osukisa mpe awonso bevanganga oma ma mambi.—Nkunga 37:9; Ngana 2:22.

Vava kefokola e mbi yawonso ova nza, o Mvangi eto olungisa e kani diandi dia sia vo wantu alunga bazinga yakwele mvu muna paradiso ova ntoto. Aweyi ukala e zingu muna paradiso?

Luvuvamu ye kiese. “Alembami bevwa nza; Beyangalela muna mawete mayingi.”—Nkunga 37:11.

Ulolo wa madia mambote. “O ulolo wa masa ukala muna nsi, yakuna ntandu a miongo, e mbongo andi ivwembeta.”—Nkunga 72:16.

Nzo zambote-mbote ye salu kiakiese. “Betunga nzo yo kala mo; bekuna mpatu za vinyo, yo dia bundu yau. . . . Ana nsolele bekwaminin’o mona wete wa salu ya moko mau.”—Yesaya 65:21, 22.

Nga olakukilanga mambu mama o moyo? Ke kolo ko, awonso bezingila ova ntoto bemona mawete mama.

O unu, mayela yo lufwa lulenda lwakila yeto awonso. Kansi, ke kolo ko ediadi ke divangama diaka ko. Nzambi osadila kimenga kia Yesu kia lukûlu kimana “konso on’okwikilanga muna yandi ke fwaswa ko, moyo a mvu ya mvu kevua.” (Yoane 3:16) Nkia nsambu ditwasa?

Mayela ke mekala diaka ko. ‘Ke mosi ko ovova vo: Yela nyela. O nkangu una ukala mo uyambulwilwa o bi wau.’—Yesaya 33:24.

Wantu ke befwa diaka ko. ‘Osukisa lufwa yakwele mvu; o Mfumu Yave okunguna mansanga muna ndose zawonso.’—Yesaya 25:8.

Wantu bezinga yakwele mvu. “O lukau lwa Nzambi i moyo a mvu ya mvu muna Kristu Yesu wa Mfumu eto.”—Roma 6:23.

Awana bafwa befuluka. “Vekala yo lufuluku lwa ansongi ye awana balembi songa.” (Mavangu 24:15) Muna kuma kia lukau lwa Nzambi lwa lukûlu, awana bafwa befuluka.

Aweyi o Nzambi kelungisila mawonso mama?

Muna lungisa e kani diandi mu kuma kia wantu ye ntoto, Nzambi osadila luyalu lwa zulu luna vo Yesu Kristu i Mfumu ona kasola. (Nkunga 110:1, 2) Lwalu i luyalu yovo kintinu kina o Yesu kayika muna sambu kalonga kwa alandi andi, oku vo: “E Se dieto koko zulu, yambula . . . Kintinu kiaku kiza.”—Matai 6:9, 10.

Kintinu kia Nzambi kiyala e nza yawonso yo fokola e mpasi zawonso. E Kintinu kiaki i luyalu lusundidi tuyalu twawonso twayala kala ova nza. Kiaki i kuma Yesu kayivanina muna salu kia samuna e “nsangu zambote za Kintinu” vava kakala ova ntoto. Watuma mpe alongoki andi kimana bayivana muna salu kiaki.—Matai 4:23; 24:14.

Muna kuma kia zola kwandi muna wantu, Yave wa Nzambi wasia e nsilu miami miawonso muna wete diau. Nga ediadi ke difwete kufila ko mu toma kunzaya yo kumfinama? Nkia nsambu obaka avo ovangidi wo? E longi dilanda divana e mvutu za kiuvu kiaki.