Harsatna i tawh hian, i ṭhian ṭha chuan ṭanpui tûr chein thil engemaw a tih i beisei ngei ang. Chu chu rilruah dahin, mi ṭhenkhat chuan Pathianin an tân thil engmah tihsak lo nia an ngaih avângin ani chu ṭhian a ni lo tiin an sawi a. Dik tak chuan, Pathianin kan ṭhatna tûr thil tam tak a ti tawh mai ni lovin, tûn laia kan tawh buainate leh hrehawm tawrhnate kan hmachhawn theih nân hma a la bawk a ni. Pathianin eng nge a tih ang?

Pathianin suahsualna zawng zawng chu a lo chhuahna bul chawpin a nuai bo vang. Bible chuan a lo chhuahna bul chu heti hian a sawi a: “Khawvêl pumhlûm hi mi sual thu thuin a awm” tiin. (1 Johana 5:19) Chu “mi sual” chu tu dang ni lovin, Isua’n “khawvêl lal” tia a koh Diabol Setana a ni a. (Johana 12:31) Mihringte chunga Setana thununna hi khawvêl dinhmun hrehawm chhan ber a ni. Pathianin eng nge a tih ang?

Pathian Jehova chuan a Fapa, Isua Krista hmanga, “thihnain thihna thuneitu (chu chu Diabola a ni) a tihboral,” theih nân hma a la thuai ang. (Hebrai 2:14; 1 Johana 3:8) Dik tak chuan, Diabola pawhin tihboral a nih hmain “hun tlêm tê chauh a nei” tih a hriat thu Bible-in a sawi a. (Thu Puan 12:12) Pathian chuan suahsualna awmtîrtu zawng zawng pawh a tiboral bawk ang.—Sâm 37:9; Thufingte 2:22.

Leilung ata suahsualna zawng zawng a tihboral hnuah, min Siamtu chuan mihring leh leilung tâna a chatuan thiltum tifamkim tûrin hma a la tawh ang. A nih chuan, eng nge kan beisei theih?

Remna leh himna tluantling. “Thuhnuairawlhte erawh chuan ram hi an luah ang a: remna chênin an hmuingîl ang.”—Sâm 37:11.

Ei tûr ṭha tam tak. “Leiah, tlâng chungahte hian, buh tam tak a awm ang a.”—Sâm 72:16.

In ṭha leh hna lungawithlâk tak. “Tin, inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. . . . ka mi thlante chu rei tak an thawh chhuah chungah chuan an lâwm dâwn a ni.”—Isaia 65:21, 22.

Chutiang dinhmuna awm chu i châk tawh em? Chûngte chu nî tina mi zawng zawngte thiltawn a ni thuai tawh ang.

Tûn laiah, mi tin hian natna leh thihna kan tâwk a; mahse, hetiang hi a ni reng tawh lo vang. Pathianin Isua tlanna inthâwina hlâwkna chu a hmang thuai tawh ang, “amah chu tupawh a ring apiang an boral loh va, chatuana nunna an neih zâwk nân.” (Johana 3:16) Eng nge a rahchhuah ni ang?

Natna chu tihbo a ni tawh ang. “Chu mi khuaa awm chuan “Ka dam lo ve,” a ti lo vang a, a chhûnga mi awmte chu sual ngaihdamin an awm ang.”—Isaia 33:24.

Thihnain mihring a tibuai tawh lo vang. “Thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang.”—Isaia 25:8.

Mite chu chatuanin an nung tawh ang. “Pathian thilthlâwnpêk erawh chu kan Lalpa Krista Isua zârah chuan chatuana nunna a ni.”—Rom 6:23.

Mitthite chu an tho leh ang. “Mi felte leh fel lote thawhlehna a awm ang.” (Tirhkohte 24:15) Anni chuan Pathian pêk tlanna chu an hlâwkpui tawh ang.

 Engtin nge Pathianin chûng zawng zawng chu a hlen ang?

Pathian chuan mihring leh leilung tâna a thiltum chu Rorêl tûra a ruat Isua Krista vân sawrkârna hmangin a hlen ang. (Sâm 110:1, 2) Chu chu Isua’n a hnungzuite hnênah: “Kan Pa vâna mi, . . . I ram lo thleng rawh se,” tia ṭawngṭai tûra a hrilh sawrkâr, a nih loh leh ram kha a ni.—Matthaia 6:9, 10.

Pathian Ramin lei chungah ro a rêl ang a, tichuan, lei ata hrehawm tawrhna zawng zawng a nuai bo tawh ang. Chu Lalram chu mihringte neih theih azawnga sawrkâr ṭha ber a ni! Chuvângin, Isua leia rawng a bâwl chhûngin, “Ram Chanchhin Ṭha” hrilhnaah theih tâwp a chhuah a, a zirtîrte pawh chutianga ti ve tûrin a hrilh a ni.—Matthaia 4:23; 24:14.

A mihring siamte a hmangaih êm avângin, Pathian Jehova chuan chûng thil ropui takte chu an tân tihsak a tiam a. Chu chuan amah hriat leh hnaih duhna a neihtîr che a ni lâwm ni? Chutianga tih i tum chuan, engtin nge i hlâwkpui ang? A dawta thuziakin a hrilhfiah ang.