Jngo xi ñaki miyoná mani basenkaoná kʼianga kjoa bitjatojiaan. Tjínkʼa chjota xi kʼoatso nga tsín miyoná mani je Niná nga̱ kʼoasʼin síkjaʼaitsjen nga tsín basenkaoná. Tonga je Niná nkjín koya jmeni xi tísʼín, kʼoa jeme kjoaʼaxin je kjoa xi tjínná kao kjoañʼai. Jméni xi sʼin.

Je Niná kjoaʼaxin ʼyani xotísʼín nga kjoatsʼen tjín. Je Biblia itso: “Ngakijnda sonʼndebi tíjnakao na̱i” (1 Juan 5:19). Kʼianga i̱ kitso je Jesús “xi batéxoma sonʼndebi” tʼatsʼe je Na̱i kinchja̱ni (Juan 12:31). Jé Na̱i kjinentsja sonʼnde kuinga kʼoasikji kjoa tjínni. Tonga jméni xi sʼin je Niná.

Je Niná jeme sichjén je ʼNdíle ánni “nga sikjetʼasíni”, xi tsonile, nga kjoaʼaxin je xi kjoabiya tísíkʼéjnabasen, je Na̱i (Hebreos 2:14; 1 Juan 3:8). Je Biblia kʼoatso nga je Na̱i bení “nga tochoa nichxin tjínle” nga tjóxin (Apocalipsis 12:12). Je Niná kʼoati sikjeson je chjotatsʼen (Salmo 37:9; Proverbios 2:22).

Kʼianga jetjóxin kjoatsʼen, je Niná kʼiaa sitjoson jmeni xi tjínndajinle xi kao chjota kʼoa kao Sonʼnde. Jósʼin kuiyoaa nga kʼia.

Nyʼán sʼin kuiyoaa kʼoa tsín tixkón sʼin kuiyoñá. “Tonga je xi ndʼé tsʼee koa̱n i̱ sonʼnde, kʼoa ñaki kʼoetsaojin jokji nyʼán sʼin koatio” (Salmo 37:11).

Nʼio sʼe̱ tsojmi xi ma chine. “Nʼio sʼe̱ tsojmintje i̱ sonʼnde; toxkia sʼee ya jko̱nindo. Kʼoakoa̱nchon tsojmintje jochon ya Líbano, kʼoa ya naxinandá, je chjota kʼoakoa̱nchon jochon jñá xi tjín sonʼnde” (Salmo 72:16).

Sʼe̱ná ndʼia xi ndakjoan kʼoa tsjoa koaya tokoán je xá xi sʼiaan. “Kʼoenda niʼya kʼoa yaa koatioʼya; kʼoa kʼoentje xka̱totsee kʼoa je ski̱ne tole. [...] Kʼoa je xá xi sʼin je xi an kiskoejian ñaki tsjoa koaya kon” (Isaías 65:21, 22).

A meli ya kuijnai kʼianga jeʼndenaxó koa̱n i̱ Sonʼnde.

Nichxin xi tiyoaa ndʼaibi sokóchʼinná kʼoa biyañá, tonga je Niná jeme kjoaʼaxin ngayeje jebi. Je Jeobá kjoaʼaxin je chʼin kao kjoabiya xi totʼatsʼe nga kʼoasʼin kʼienntjainá je Jesús, “jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:16). Jósʼin kuiyoaa nga kʼia.

Alikui tisʼe̱ni chʼin. “Nijngojin xi ya kʼoéjna kʼoakuitso: Timʼeña. Je chjota xi koatio i̱ sonʼnde jéní xi jekichatʼale jéele” (Isaías 33:24).

Alikui tisʼe̱ni kjoabiya. “Tondiaa kjoaʼaxin je kjoabiya, kʼoa je Jeobá xi batéxomale ngayeje xi tjín kʼoejon ndáxko̱n ngatsʼi chjota” (Isaías 25:8).

Koatio ngantsjai je chjota. “Tonga je kjoatjaole Niná kjoabijnachon ngantsjai ní, xi totʼatsʼe Cristo Jesús Nainá” (Romanos 6:23).

Je xi jekʼien kjoaʼáyanile. “Kjoaʼáyale xi kʼen, nda tsa kao chjota xi tjínle kjoakixi, kao chjotatsʼen” (Hechos 24:15). Saʼnda xi jekʼien kjoaʼáyanile xi totʼatsʼe je kjoabʼechjíntjaile Jesús.

Jméni xi sʼin je Niná kʼianga kuitjoson jebi.

Je Jeobá sitjoson jmeni xi tjínndajinle kʼoa jé Jesucristo sichjén kʼianga koatexoma (Salmo 110:1, 2). Tʼatsʼe Chjotaxá jebi kinchja̱ni je Jesús kʼianga i̱ kitsole je chjotatjenngile: “Nʼainajin xi tijnai ngʼajmi [...]. Katanroa Chjotaxáli” (Mateo 6:9, 10, TNM).

Kʼianga koatexoma je Chjotaxále Niná kjoaʼaxin je kjoañʼai kao kjoachjaʼatokon xi tjín. Chjotaxá jebi nʼio ndasʼin koatexoma. Je Jesús nʼio “kinchja̱yajinni énnda xi tʼatsʼe kjoatéxomale ngʼajmi” kʼoa kʼoati kitsole je chjotatjenngile nga kʼoati katasʼín (Mateo 4:23; 24:14).

Je Jeobá kui kjoanichikontʼain jebi tsjoáná nga̱ nʼio tsjoakená. A tsí matsjoali nga jchasai xi tʼatsʼe Niná kʼoa nga miyoli koa̱n. Kui chótʼayajiaan jebi ya kjoaʼmiya xi fisani.