Karāmpe ēte putꞌokꞌe niatpo hap turān etikyꞌesat ewyꞌok piat epowȳro hap hanti. Mītꞌīn teꞌeruwanentup hawe Tupana uiwyꞌokꞌi kat pote uiwyꞌok pote uipowȳro irane raꞌyn iꞌatuꞌe. Maꞌato Tupana tunug̃ kahato raꞌyn kat koꞌi kat koꞌi aipowȳro hamo. Iꞌewȳte tutunug̃ poꞌog̃ hamo ahepiat niatpo hap koꞌi yne hoꞌopot hap koꞌi momã hamo. Maꞌato kat hap koꞌi asom pyno Tupana tunug̃.

Tupana timomã hamo yne hamuat saꞌag̃ nug̃ haria wȳwo hawyi ȳt katꞌi poꞌog̃ hamuat raꞌyn. Tupana Ehay henoi miotā̃ e — Mesuwarotiaria ahiag̃ ehay upi yn teꞌeruwanentup katupono ahiag̃ emīt no teꞌeropyhuꞌat e. (1 Iuwãu 5:19) Miꞌi hap etiat Iesui henoi wy miotā̃ e Iꞌatuporekuat mesuwarotiat ahiag̃ e. (Iuwãu 12:31) Ahiag̃ hoꞌomoꞌakag̃nia mesuwarotiaria mītꞌīn taꞌatunug̃ saꞌag̃ aimosoꞌopot koꞌi hamo. Maꞌato kat asom Tupana tunug̃ hamuat ahiag̃ momã hamo.

Ieuwa tiꞌaira tosaꞌyru Iesui yne ahiag̃ minug̃ saꞌag̃ koꞌi momã hamo kat pote miꞌi hap kaipyi tūt g̃uꞌuro hap. (Epereu 2:14, TNM; 1 Iuwãu 3:8) Tupana Ehay henoi ahiag̃ tikuap ti raꞌyn tomomã hamuat hap iꞌewȳte ȳt pya iraꞌyn uheꞌāt e ahiag̃. (Iesui Aru e Hap 12:12) Iꞌewȳte Tupana timomã hamuat torānia ȳt nakuꞌi nug̃ haria. — Saumu 37:9; Porowepiu 2:22.

Toimomã kahu torānia saꞌag̃ koꞌi wȳwo hawyi ainug̃ hat tunug̃ hamuat raꞌyn yne tomikyꞌesat mītꞌīn upiat hap. Aikotā̃ hap koꞌi asom tutunug̃ hamuat.

Mītꞌīn tukupteꞌen hamuat woꞌowese hawyi g̃enꞌe hap wȳwoꞌi hamo. Mītꞌīn paa iꞌatuꞌe rakaria pe yne mesūwat yi iꞌatupo pe topyhuꞌat e. Miꞌi hawyi iꞌatumowepīt wakuat nug̃ hap iꞌatuwoꞌowese hap topyhuꞌat e. — Saumu 37:11.

Torãnia hamuat raꞌyn iꞌatumiꞌu. Mesūwat yi tote wuatꞌi mikoi hẽtyt kahuria kahato hat kahato rakaria wo yihot pe iꞌewȳte yityꞌok koꞌi tote wy e. Ipoityi kahato miꞌu koꞌi iꞌewȳte kat kat ywa koꞌi neꞌi wy e. — Saumu 72:16.

Torānia hamuat raꞌyn iꞌatuꞌyat iꞌatuwepīt motpap hap wȳwo. Miꞌi hawyi ti aru eiweꞌyat nug̃ yat nug̃ kahato itote e. Miꞌi hawyi eiminug̃ eiꞌyat pe raꞌyn eweikupteꞌen. Miꞌi hawyi eiweꞌypia nug̃ kahato eimikoi uwa sapo hy kahato toig̃ itote eimikoi kaipyi. Miꞌi koꞌi eipo wuat eiminug̃ koꞌi eimowepīt hap topyhuꞌat e. — Isaia 65:21, 22.

Meig̃muewuat wakuat koꞌi wemoherep hamuat hap ehekatup kahato raꞌyn apo. Miꞌi hap eꞌāt ȳt pyaꞌi raꞌyn putꞌokꞌe hamo.

Korā̃ mītꞌīn iꞌatuꞌahū hawyi iꞌatukuꞌuro maꞌato miꞌi hap koꞌi ȳt wuatꞌi eꞌāt pe hamoꞌi. Iesui kuꞌuro hap upi mesup tan epote Tupana tunug̃ kuap yne hamuat tomikyꞌesat koꞌi. Miꞌi pote uwe uwe Iesui mohey haria wyti aru ȳt ikuꞌuro sēseꞌi maꞌato wuatꞌi eꞌāt pe raꞌyn iꞌatuehaig̃te hap toig̃neꞌen e Iesui. (Iuwãu 3:16) Miꞌi hap etiat wyti Tupana Ehay henoi poꞌog̃. Erehaꞌat pyno.

Ȳt katꞌi poꞌog̃ hamuat ahū hap. Mekewat eꞌāt pe ti aru ȳt uweꞌi poꞌog̃ uiꞌahū e katupono Uito wāure wo areig̃neꞌen iꞌatuminug̃ saꞌag̃ etiat e Tupana. — Isaia 33:24.

Ȳt katꞌi poꞌog̃ hamuat g̃uꞌuro hap. Taꞌi Uito Tupana atimomã wyti aru g̃uꞌuro hap. Ehepiat hoꞌopot hap tokosap taꞌyn hawyi aru ȳt katꞌi raꞌyn poꞌog̃ eiꞌatuehahy hap e Tupana. — Isaia 25:8.

Wuatꞌi eꞌāt pe mītꞌīn tukuptꞌen hamuat. Tupana wat ȳt haꞌup takatꞌi tutum teꞌen neꞌi wuatꞌi eꞌāt piat aheig̃neꞌen hamuat hap. — Humanu 6:23.

Ikuꞌuro rakaria teꞌeruwehymūt hamuat g̃uꞌuro pyi. Mītꞌīn wakuaria iꞌewȳte ȳt nakuariaꞌi teꞌeruwehymūt rẽ aru e. (Iesui Potmūꞌeria 24:15) Iesui kuꞌuro hap puo pyi ikuꞌuro rakaria tukupteꞌen kuap pakupꞌi wuatꞌi eꞌāt pe.

 Maꞌato aikotā̃ hap puo pyi miꞌi hap koꞌi Tupana tunug̃ kuap hamuat.

Tupana tunug̃ tomikyꞌesat koꞌi mītꞌīn piat hamo toiꞌaira Iesui mesūwat yi morekuat no atipy tote pyi hamo. (Saumu 110:1, 2) Miꞌi morekuat ūt hap upi Iesui aimūꞌe miotā̃ e — Uruꞌȳwot atipy piat uruikyꞌesat kahato ereig̃neꞌen wuatꞌi mītꞌīn Akag̃ Koro wo e. — Mateu 6:9, 10.

Iesui raꞌyn mesūwat yi porekuat no hawyi toimomã yne hamo raꞌyn saꞌag̃ koꞌi hap iꞌewȳte mītꞌīn mosoꞌopot koꞌi hap. Miꞌi pote Iesui yn poꞌog̃ waku torānia morekuaria koꞌi kai. Karāmpe Iesui toig̃neꞌen mesūwat yi tote turān tohenoi kahato Tupana topyhuꞌat morekuat no hap etiat hap iꞌewȳte toikyꞌesat topotmūꞌeria piat henoi hap wy.— Mateu 4:23; 24:14.

Ieuwa tunug̃ kahato hamo wakuat koꞌi aheupi kat pote aikyꞌe kahato. Miꞌi hap etikuap hawyi etikuap terān poꞌog̃ Tupana etiat hawyi iwyꞌok wo poꞌog̃ terān asom ereig̃neꞌen. Miꞌi hap etunug̃ mote waku epe te hamo. Kat pote asom epe te hamo waku. Etikuap hamo typuatꞌi miwan me.