Ñe kwõn kar iioon juon apañ ilo mour eo am̦, ejjel̦o̦k pere kwõnãj kar kõtmãne bwe juon jeram̦ em̦ool enaaj kar kõm̦m̦an jabdewõt men ñan jipañ eok. Eñin unin, jet rej ba bwe Anij ejjab juon jeran em̦m̦an kõnke rej l̦õmn̦ak bwe Anij ejjab kõm̦m̦an jabdewõt men ñan jipañ er. Ilo m̦ool, elõñ men ko me Anij ear kõm̦m̦ani ñan kõj bwe jen bõk tokjãn jãni, im ebar wõr men ko ej pojak in kõm̦m̦ani ñan kõm̦adm̦õdi aolep apañ ko jej iiooni im jej eñtaan kaki rainin. Ta eo Anij enaaj kõm̦m̦ane?

Anij enaaj kõjem̦l̦o̦k aolep men ko renana ilo an naaj jol̦o̦k eo ej wũnjãn nana otemjej. Baibõl̦ ej kwal̦o̦k wõn eo ej wũnjãn men in ilo an ba, ‘Aolepen lal̦ in ej pãd ium̦win pein Ri-Nana eo.’ (1 Jon 5:19, UBS) “Ri-Nana eo” eoon in ej kõnono kake ej jitõñl̦o̦k ñan Setan Tepil̦, eo Jesus ear ba ej “irooj in lal̦ in.” (Jon 12:31) Aet, Setan ej pãd ilikin aolep men ko renana rej wal̦o̦k ilo lal̦ in. Ta eo Anij enaaj kõm̦m̦ane?

Ejjabto Jeova Anij enaaj em̦m̦akũt ikijjeen Nejin, Jesus Christ, ñan ‘ko̦kkure tepil̦ eo, eo kajoor in mej ippãn.’ (Hibru 2:14; 1 Jon 3:8, UBS) Ilo m̦ool Baibõl̦ ej kwal̦o̦k bwe Tepil̦ eo “ejel̦ã bwe jidik wõt an iien” m̦okta jãn an naaj Anij ko̦kkure. (Revelesõn 12:12, UBS) Anij enaaj bar jol̦o̦k aolep men ko renana im ro rej kõm̦m̦ani men kein.​—Sam 37:9; Jabõn Kõnnaan 2:22, UBS.

Ãlikin an naaj jol̦o̦k aolep men ko renana jãn lal̦ in, ri-Kõm̦anm̦an eo ad enaaj em̦m̦akũt ñan kajejjet karõk eo an ñan armej bwe ren weeppãn im mour indeeo ijin ioon lal̦. Ta eo jemaroñ reim̦aanl̦o̦k ñane?

Aenõm̦m̦an im jokwane ñan indeeo. “Ro ettã bũrueer renaaj jolõt ãneo, im renaaj m̦õn̦õn̦õ kõn aenõm̦m̦an el̦ap.”​—Sam 37:11.

Elõñ kain m̦õñã ko rõũne. “Ãneo en obrak kõn wiit; keinikkan ko ren kabwe ioon tol̦ ko.”​—Sam 72:16, UBS.

Enaaj em̦m̦an m̦õko im wõr jerbal ko rem̦m̦an. “Renaaj kalõk m̦õko, im jokwe ilo er; im renaaj kallib jikin kallib in kũreep, im m̦õñã jãn leen. . . . Ro Iar kããlõt er, enaaj etto aer m̦õn̦õn̦õ kake jerbal an peier.”​—Aiseia 65:21, 22.

Kokõn̦aan ke lo an aolep men kein wal̦o̦k? Eokwe, ejjabto jãn kiiõ jenaaj mour im m̦õn̦õn̦õ kaki men kein aolep raan.

Rainin aolep rej nañinmej im tokãlik mej, bõtab ejjabto eban bar wal̦o̦k men kein. M̦õttan jidik Anij enaaj kajejjet kũtien aolep jeraam̦m̦an ko kar kallim̦ur kaki im rej itok jãn katok in mour eo an Jesus bwe “jabdewõt eo ej lõke E en jab jako, a en mour indeeo.” (Jon 3:16) Ta ko renaaj wal̦o̦k?

Enaaj ejjel̦o̦k nañinmej. “Ri-jokwe ie ejãmin ba, ‘inañinmej.’ Naaj jol̦o̦k bõd an ro ri-jokwe ilowaan.”​—Aiseia 33:24.

Ejãmin bar wõr mej. Enaaj “orañl̦o̦k mej ñan indeeo, im Irooj Jeova enaaj kõm̦õrãik dãnnin kõmjaal̦al̦ jãn mejãer otemjej.”​—Aiseia 25:8.

Armej renaaj mour ñan indeeo. “Men in jouj an Anij, mour indeeo ilo Christ Jesus ad Irooj.”​—Rom 6:23.

Ro rar mej renaaj bar mour. “Ro rem̦m̦an im ro renana, renaaj jerkak jãn mej.” (Jerbal 24:15, UBS) Renaaj bõk tokjãn jãn menin letok eo an Anij ikijjeen katok in mour eo an Jesus.

Ewi wãween an Anij nãj kajejjet aolep men kein?

Anij enaaj kajejjet karõk eo an ñan armej im ñan lal̦ in ikijjeen kien eo an ilañ, me ear jitõñ Jesus bwe en tõl ie. (Sam 110:1, 2) Eñin ej kien ak aelõñ eo me Jesus ear katakin ri-kal̦oor ro an bwe ren jar kake im ba: “Jememwõj ilañ, . . . en itok Am̦ aelõñ.”​—Matu 6:9, 10.

Aelõñ eo an Anij enaaj tõl aolepen lal̦ in im enaaj kõjem̦l̦o̦k aolep jorrããn im eñtaan ko rej wal̦o̦k ilo lal̦ in. Alikkar, Aelõñ in ej kien eo em̦m̦antata ñan armej ro! Eñin unin ke Jesus ear pãd ioon lal̦, ear lukkuun kate e ñan ‘kwal̦o̦k ennaan eo em̦m̦an kõn Aelõñ in lañ’ im ear ba ñan ri-kal̦oor ro an bwe ren bar kõm̦m̦ane men in.​—Matu 4:23, UBS; 24:14, UBS.

Kõn yokwe eo an ekanooj l̦ap ñan armej ro, Jeova Anij ej kallim̦ur bwe enaaj kõm̦m̦ani aolep men kein rem̦m̦an ñan er. Men in ej ke kõm̦m̦an bwe kwõn kõn̦aan jel̦ã kõn e im epaake e? El̦aññe enãj kããlõt eo am̦ in, enãj ta mel̦el̦ein ñan kwe? Katak eo tok juon enaaj kõmel̦el̦e.