Zu-loees sasa, ned buud fãa ratame t’a zoa maan bũmb n sõng-a. Neb wʋsg sẽn tagsd woto wã yĩngã, b yetame tɩ Wẽnnaam pa b zoa ye. Bala a pa maand bũmb n sõngd-b b sã n wa be yell pʋgẽ ye. Wẽnnaam yaool n zoe n maana bũmb wʋsg tõnd neer yĩnga. La pa rẽ bal ye. A na n wa maana bũmb sẽn na yɩl tɩ zu-loeesã la namsgã sẽn be rũndã-rũndã wã sa. Bõe la Wẽnnaam na n wa maane?

Wẽnnaam na n sãama sẽn kɩt-a tɩ wẽnemã beẽ wã, tɩ wẽnem buud fãa sa. Biiblã wilgda a soab ning sẽn kɩt tɩ wẽnemã beẽ wã. A yetame yaa: “Dũniyã zãng bee wẽng soabã nugẽ.” (1 Zã 5:19) “Wẽng soabã” pa ned a to n zʋʋg a Zeezi sẽn bool a soab tɩ “dũni-kãngã naabã” rat n yeel t’a Sʋɩtãana. (Zã 12:31) Yaa a Sʋɩtãan sẽn dɩt naam dũniyã gill zugã yĩng la d sẽn ne zu-loees toor-toor tẽngã zugã. Bõe la Wẽnnaam na n wa maane?

Ka la bilfu, Wẽnnaam a Zeova na n tũnuga ne a Bi-ribl a Zeezi Kirist n ‘sãam soab ning sẽn da tar-a pãng tɩ kʋ wã, sẽn dat n togs tɩ Sʋɩtãanã.’ (Ebre-rãmbã 2:14; 1 Zã 3:8) Sɩd me, Biiblã meng wilgdame t’a Sʋɩtãan miime tɩ ‘ketã bilf’ tɩ b sãam-a. (Vẽnegre 12:12; MN) Sẽn paase, Wẽnnaam na n sãama neb nins fãa sẽn maand wẽngã.—Yɩɩn-sõamyã 37:9; Yel-bũnã 2:22.

Naandã sã n wa kɩt tɩ wẽnem buud fãa sa, a na n pidsa a raabã tẽngã la ninsaalbã wɛɛngẽ. Bark bʋs la d na n paame?

Laafɩ la bãane. “Sik-m-mens rãmbã n na n soog tẽngã, la b na n paama vɩ-bãane, ne sũ-noog meng-menga.”—Yɩɩn-sõamyã 37:11.

Rɩɩbã na n sekame. “Tẽngã na n pida ne bɩle wʋsgo, la koodã na n miimda tãmsã zut wa Libã tãngã zug tɩɩsã sẽn miimdã. Tẽngã nebã na n fɩɩga wa moogã sẽn be weoogẽ wã.”—Yɩɩn-sõamyã 72:16.

Zags sẽn yaa neeba, la tʋʋm sẽn kõt sũ-noogo. “Bãmb na n mee rot n zĩnd b pʋse. B na n sela tɩɩs n dɩ b biisi. . . . La neb nins mam sẽn yãkã na n dɩɩ b nus tʋʋmã yõodo.”—Ezayi 65:21, 22.

Yãmb data ne y sũur fãa n paam bark-kãensã bɩ? Ka la bilfu, nebã fãa na n paama bark-kãensã beoog sẽn vẽeg fãa.

Ninsaal buud fãa bẽedame la a kiidẽ. La na n saa ka la bilfu. Wẽnnaam na n kɩtame tɩ d paam n dɩ a Zeezi maoongã yõodo. Woto “ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.” (Zã 3:16) Vɩɩmã na n yɩɩ wãn-wãna?

Bãag kõn leb n zĩnd ye. “Tẽngã ned kõn yeel t’a ka keem ye! Neb nins sẽn be tẽn-kãng pʋgã na n paama b kongrã sugri.”—Ezayi 33:24.

Kũum kõn leb n tall pãng ãdem-biisã zug ye. ‘Sẽn-Ka-Saab na n sãama kũum pãng wakat sẽn ka sɛt yĩnga. Zu-soab a Zeova na n yẽesa nemsã fãa nintãmã.’—Ezayi 25:8.

Nebã na n vɩɩmda wakat sẽn kõn sa. “Kũun ning Wẽnnaam sẽn kõtã yaa vɩɩm sẽn ka sɛta, tõnd Zu-soab a Kirist Zeezi maasem yĩnga.”—Rom dãmbã 6:23; MN.

Sẽn ki-bã na n vʋʋgame. “Wẽnnaam na n vʋʋga nin-tɩrsã ne sẽn pa-b nin-tɩrsã me.” (Tʋʋma 24:15, MN) B na n dɩɩ a Zeezi maoongã sẽn yaa Wẽnnaam kũunã yõodo.

Wãn to la Wẽnnaam na n pids bõn-kãensã fãa?

Yaa ne saasẽ goosneemã maasem la Wẽnnaam na n pids a raabã tẽngã la ninsaalbã wɛɛngẽ. A yãka a Zeezi Kirist t’a yaa Rĩma. (Yɩɩn-sõamyã 110:1, 2) Yaa goosneem-kãng bɩ Rĩun-kãng yĩng la a Zeezi sẽn yeel a karen-biisã tɩ b pʋʋs n yeel yaa: “Tõnd ba sẽn be arzãna, bɩ . . . yãmb soolmã wa.”—Matye 6:9, 10.

Wẽnnaam Rĩungã na n dɩɩ naam tẽngã gill zugu, la a kɩt tɩ namsg buud fãa sa. Rĩun-kãng sõmblem ka to ye. Rẽ n so t’a Zeezi sẽn wa n be tẽngã zugã, a modga wʋsg n moon “Rĩungã koe-noogã.” A yeela a karen-biisã me tɩ b maan woto.—Matye 4:23; 24:14, MN.

Wẽnnaam a Zeova sẽn nong ninsaalbã wʋsgã, a pʋlmame t’a na n maana bõn-kãensã fãa n kõ-ba. Rẽ yĩngã, y pa rat n bao n bãng-a sõma, la y paam a zood sɩda? Y sã n bao n bãng Wẽnnaam sõma, wãn to la na n naf yãmba? Sõsg ning sẽn pʋgdã na n goma rẽ yelle.