Se kuali touampo eli se akajya katli tijmatij techpaleuis kema tijpiasej kuesoli. Yeka, sekij kiijtouaj toTeotsij amo eli touampo, pampa moiljuiaj amo techpaleuia. Maske kiampa moiljuiaj, ya techpaleuijtok ika miak tlamantli, uan nojkia nechka kisenkauas nochi kuesoli tlen tijpiaj uan kitlamiltis tlaijiyouilistli. ¿Tlake kichiuas toTeotsij?

ToTeotsij kitlamiltis katli kichiua ma onka tlen amo kuali. Biblia kiijtoua ajkia eli: “Nochi sekinok tlakamej kampa ueli ipan Tlaltipaktli mokauaj ipan ichikaualis Axkualtlakatl” (1 Juan 5:19). Nopa “Axkualtlakatl” eli Satanás, Jesús kiijtok yaya “tlen tlanauatia ipan ni Tlaltipaktli” (Juan 12:31). Satanás kichijtok ma onka miak kuesoli. ¿Tlake kichiuas toTeotsij?

Jehová nechka kitekiuis iKone uan kiampa kitsontlamiltis “ichikaualis nopa Axkualtlakatl tlen kipixki tlanauatili para ma onka miki[li]stli ipan Tlaltipaktli” (Hebreos 2:14; 1 Juan 3:8). Biblia kiijtoua Satanás “kimati axpoliui miak tonali para toTeko kitlajtolsenkauas” (Apocalipsis [Revelación] 12:12). ToTeotsij nojkia kintsontlamiltis maseualmej katli amo kualmej (Salmo 37:9; Proverbios 2:22).

Kema ya kitlamiltijtos tlen amo kuali, toTeotsij kichiuas tlen kinekiyaya ma mochiua ipan Tlaltipaktli uan kej kinekiyaya ma itstokaj maseualmej. Kema nopa mochiuas, ¿kenijkatsa tiitstosej?

Nochipa tiitstosej ika tlaseuilistli uan ayokmo timajmauisej. “Tlakamej tlen moiknonekij iixpa toTeko itstosej ipan nopa kuali tlali uan tlauel pakisej, pampa yajaya kinteochiuas hasta mokauas” (Salmo 37:11).

Onkas miak tlakualistli. “Onkas miak trigo ipan nochi nopa tlali, uan hasta nopa kuatinij tlen onka ipan tepetinij ma temakasej inintlajka” (Salmo 72:16).

Nochi tijpiasej tochaj uan tekitl tlen techpaktis. “Kema se tlakatl kichijchiuas ichaj, yajaya itstos ipan ichaj para nochipa, pampa ayok ualasej soldados tlen tlaxoleuaj keja achtouia. Nojkia notlakauaj kitokasej xokomekamili, uan yajuantij kikuasej itlajka. Uan yajuantij kipiasej nopa pakilistli para kitekiuisej nochi tlen kipiaj ipampa ininteki” (Isaías 65:21, 22).

¿Mitspaktiskia tiitstos kema kiampa mochiuas? Nechka moaxitis nochi ni tlamantli.

Maske ipan ni tonali nochi timokokouaj uan timikij, amo nochipa kiampa panos. Pampa Jesús motemaktilik, Jehová kiijtoua “nochi tlen kineltokasej, axpoliuisej, pero kipiasej yolistli tlen yankuik para nochipa” (Juan 3:16). Uajka ¿kenijkatsa tiitstosej ipan nopa tonali?

Ayokmo aka mokokos. “Ayok kiijtosej para mokokouaj pampa toTeko Dios kintlapojpoljuis inintlajtlakoljuaj” (Isaías 33:24).

Ayokmo aka mikis. “Kitlamiltis miki[li]stli para nochipa uan kinuachilis ininixayo nochi tlakamej” (Isaías 25:8).

Maseualmej itstosej nochipa. “ToTeko Dios techmaka se regalo kema tijneltokaj toueyiTeko Jesucristo, uan nopa regalo eltok yolistli yankuik para nochipa” (Romanos 6:23).

Moyolkuisej katli miktokej. “ToTeko kinyolitia tlakamej tlen ya miktokej, tlen kuajkualmej uan tlen axkuajkualmej” (Hechos 24:15). Katli miktokej nojkia kinpaleuis tlen Jesús kichijki.

¿Kenijkatsa kichiuas toTeotsij ni tlamantli?

Ika Jesús iTlanauatijkayo, toTeotsij kiaxitis tlen mosentlalijtok kichiuas ipan Tlaltipaktli uan maseualmej itstosej nochipa kej ya kinekiyaya (Salmo 110:1, 2). Jesús kinmachtik itokilijkauaj ma tlajtlanikaj nopa Tlanauatijkayotl kema kiijtok: “ToTeko toTata tlen tiitstok nepa iluikak. [...] Xiuala, xitlanauatiki nikaj” (Mateo 6:9, 10).

Toteotsij iTlanauatijkayo tekichiuas ipan Tlaltipaktli uan kitlamiltis nochi kuesoli uan tlaijiyouilistli tlen nama onka. ¡Nelia eli se kuali tlanauatijkayotl! Yeka, kema Jesús itstoya ipan Tlaltipaktli kichijki kampeka kimoyauas “kejatsa eltos kema toTeko tlanauatis” uan kiniljuik itokilijkauaj nojkia ma tlajtolmoyauakaj (Mateo 4:23; 24:14).

Jehová techtenkauilijtok nochi ni tlamantli pampa tlauel techiknelia. Tijmatisej ni kichiua ma tijnekikaj kuali tikixmatisej uan ma tijchiuakaj kampeka timouampojchiuasej iuaya. ¿Kenijkatsa mitspaleuis tlaj kiampa tijchiuas? Ma tikitakaj ipan seyok tlamachtili.