Akin kuali iuan timouikaj techpaleuia keman tikpiaj kuejmolmej. Yejua ika sekin kijtouaj ke Dios amo touan mouika, porin kinemiliaj ke amo techpaleuia. Sayoj ke, yejuatsin toka kichiuani miak taman uan amo uejkaua kiyektalis tokuejmoluan uan kitamis tajyouilis. ¿Toni kichiuas?

Dios kitamis tein amo kuali keman kiixpolos akin kipeualtij. Biblia kijtoua: “Nochi in taltikpakuani kinyekana ok yejua in amokuali” (1 Juan 5:19). “Amokuali” yejua Satanás, akin Jesús kijtoj ke “takitskijtok axkan taltikpak” (Juan 12:31). Amokuali kichiua maj tikpiakan kuejmolmej. ¿Toni kichiuas Dios?

Amo uejkaua, itechkopa iKonetsin, Jiova kiixpolos “Satanás ten kipiaya uelilis para techijtakojtoya tech in mikilis” (Hebreos 2:14; 1 Juan 3:8). Tein melauj, Biblia kinextia ke Amokuali kimati ke “amo kipia ok miak tonalme” uan kiixpoloskej (Apocalipsis 12:12). Dios no kinixpolos akin kichiuaj tein amo kuali (Salmo 37:9; Proverbios 2:22).

Satepan ke toTachijchiujkauj kitamis tein amo kuali, kichiuas maj tinemikan nochipaya nikan taltikpak, ijkon kemej kiixtalij. ¿Keniuj tinemiskej ijkuak?

Tinemiskej ika yolseuilis nochipaya. “Akin yolnejmachmej ininaxkatis taltikpak uan yekmelauj yolpakiskej porin kipiaskej ueyi yolseuilis.” (Salmo 37:11.)

Onkas tel miak takual. “Onkas tel miak tatet itech taltikpak; ininkuapan tepemej onkas okachi miak.” (Salmo 72:16.)

Tikpiaskej kani tinemiskej uan tekit tein techyolpaktis. “Kinchijchiuaskej kalmej uan ompa chanchiuaskej, uan kitokaskej uvajmekat uan kikuaskej itakilo [...] uan tekit tein kichiuaskej ika ininmauan notaixpejpenaluan senkis kinyolpaktis.” (Isaías 65:21, 22.)

¿Tikonuelitaskia ijkon tionnemis? Amo uejkaua mochiuas.

Axkan, tikokolispeuaj uan timomikiliaj, sayoj ke amo nochipa ijkon yeski. Amo uejkaua, ika inemilis Jesús tein kitemakak, Jiova kichiuas maj “nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa” (Juan 3:16). ¿Keniuj tinemiskej?

Amo akin kokolispeuasok. “Nion se taltikpaknenkej kijtos: ‘Nimokokoua’. Akin nemiskej itech taltikpak kintapojpoluiskej ininnepolol.” (Isaías 33:24.)

Amo akin momikilisok. “Kitamis mikilis nochipaya, uan toTajtsin Jiova akin okachi Ueyi Taixyekankej yekmelauj kinuachilis ininixayo nochin.” (Isaías 25:8.)

Tinemiskej nochipaya. “Totajtsin Dios techtayokolia yejua ne yek nemilis nachipa porin tipoutinemij iuan Totekotsin Cristo Jesús.” (Romanos 6:23.)

Oksepa nemiskej akin momikilijkejya. “Dios kinpankixtis yoltokke nochi in ánimajme, amo sayo in yolkualime. Ta, no nekes ten amo yolkualime.” (Hechos 24:15.) Dios no kinmakixtis akin momikilijkejya.

¿Keniuj kichiuas Dios nochi nejin?

Dios kichiuas tein kiixtalijtok nikan taltikpak itechkopa se tekiuajyot tein moajsi ompa iluikak uan kiixyekana Jesucristo (Salmo 110:1, 2). Nejon tekiuajyot yejua tein Jesús kinmachtij imomachtijkauan maj tajtanikan ijkon: “ToTajtsin akin tiyetok iluikak [...]. Maj uiki moTekiuajyo” (Mateo 6:9, 10, TNM).

ITekiuajyo Dios taixyekanas nikan taltikpak uan kitamis tekokojkayot uan tajyouilis. Nejin tekiuajyot yejua tein okachi kuali techixyekanas. Yejua ika, Jesús semi mochikauak kiteixmatiltis “kuali tanauatilmej ika Tekiuajyot” keman nemia nikan taltikpak uan kinnauatij imomachtijkauan maj no ijkon kichiuanij (Mateo 4:23, TNM; 24:14, TNM).

Jiova motenkaua techmakas nejin kualtsitsin taman porin semi techtasojta. ¿Melauj ke nejon mitsonolinia okachi kuali xikonixmati uan xionmochikaua kuali iuan tionmouikas? ¿Keniuj mitsonpaleuis komo tikonchiua? Maj tikitakan itech okse tamachtilis.