Akuthandabuzwa ukuthi nxa usebunzimeni uyabe ukhangelele ukuthi umngane wakho akuncedise. Yikho abantu abanengi besithi uNkulunkulu kayisuye mngane wabo ngenxa yokuthi babona angani akulalutho alwenzayo ukuze abancedise ngenhlupho zabo. Kodwa iqiniso yikuthi kunengi uNkulunkulu asekwenzile ukuze asincedise futhi uzakhipha konke okusenza sihlupheke. Kuyini uNkulunkulu azakwenza?

UNkulunkulu uzaqeda bonke ububi ngokukhipha lowo obubangelayo. IBhayibhili liyasitshela ukuthi ngubani obubangelayo. Lithi: “Umhlaba wonke ungaphansi kwamandla omubi.” (1 UJohane 5:19) “Omubi” lo okukhulunywa ngaye ngulowo uJesu athi ‘ngumbusi womhlaba,’ uSathane uDeveli. (UJohane 12:31) USathane nguye owenza ukuthi kube lobunzima obungaka emhlabeni. Kuyini uNkulunkulu azakwenza?

Sekuseduze ukuthi uJehova uNkulunkulu asebenzise iNdodana yakhe uJesu Khristu ukuthi “atshabalalise lowo olamandla okubangela ukufa, okutsho uDeveli.” (KumaHebheru 2:14; 1 UJohane 3:8) IBhayibhili litshengisa ukuthi uSathane laye uyakwazi ukuthi usesalelwe ‘yisikhathi esifitshane.’ (ISambulo 12:12) UNkulunkulu uzakhipha bonke ababangela ububi.​—IHubo 37:9; IZaga 2:22.

Nxa esekhiphe bonke ububi uNkulunkulu uzagcwalisa injongo yakhe emayelana labantu kanye lomhlaba. Kuyini esingakukhangelela?

Kuzaba lokuthula lokuvikeleka. “Abathobekileyo bazakudla ilifa lelizwe bakholise ukuthula okukhulu.”​—IHubo 37:11.

Ukudla okwakha umzimba kuzaba kunengi. “Akuthi amabele ande elizweni lonke; azunguze eziqongweni zamaqaqa.”​—IHubo 72:16.

Izindlu ezinhle lomsebenzi osuthisayo. “Bazakwakha izindlu bahlale kuzo; bazahlanyela izivini badle izithelo zazo. . . . Bazakholisa umsebenzi wezandla zabo okwesikhathi eside.”​—U-Isaya 65:21, 22.

Uyafisa yini ukuphila endaweni enjalo? Sekuseduze ukuthi abantu baphile endaweni enjalo.

Abantu bonke bayagula futhi ngokuhamba kwesikhathi bayafa kodwa konke lokhu sekuzaphela. Masinyane uNkulunkulu uzakwenza ukuthi konke okuhle okwaba khona ngenxa yenhlawulo kaJesu kugcwaliseke. Uzakwenza lokhu “ukuze wonke umuntu otshengisa ukuthi ulokholo kuyo angabhujiswa, kodwa abe lokuphila okungapheliyo.” (UJohane 3:16) Kuzabe sekunjani emhlabeni?

Ukugula kuyabe kungasekho. “Akula muntu ohlala eZiyoni ozakuthi, ‘Mina ngiyagula;’ labantu abahlala khona bazathethelelwa izono zabo.”​—U-Isaya 33:24.

Abantu abasoze baphinde bafe. “Uzakuginya kokuphela ukufa. UJehova Wobukhosi uzakwesula izinyembezi ebusweni babantu bonke.”​—U-Isaya 25:8.

Abantu bazaphila kuze kube nini lanini. “Isipho esisiphiwa nguNkulunkulu yikuphila okungapheliyo ngoKhristu uJesu iNkosi yethu.”​—KwabaseRoma 6:23.

Abafileyo bazavuswa. “Abafileyo bazavuswa, abalungileyo labangalunganga.” (ImiSebenzi 24:15) Isipho sikaNkulunkulu senhlawulo yiso esizakwenza ukuthi abafileyo bavuswe.

UNkulunkulu uzakwenza njani konke lokhu?

UNkulunkulu uzayigcwalisa injongo yakhe ngabantu kanye lomhlaba esebenzisa uMbuso osezulwini obuswa nguJesu Khristu. (IHubo 110:1, 2) Lo yiwo umbuso uJesu atshela abalandeli bakhe ukuthi bawuthandazele lapho esithi: “Baba wethu osezulwini, . . . UMbuso wakho kawuze.”​—UMathewu 6:9, 10.

UMbuso kaNkulunkulu uzabusa umhlaba uqede ukukhathazeka lokuhlupheka. Akula omunye umbuso ongcono kulokaNkulunkulu. Lokhu yikho okwenza uJesu wazimisela ukusebenza nzima etshumayela “izindaba ezinhle zoMbuso” ngesikhathi esasemhlabeni futhi watshela labafundi bakhe ukuthi benze njalo.​—UMathewu 4:23; 24:14.

UJehova uthembise abantu ukuthi uzabenzela konke lokhu ngenxa yokuthi uyabathanda. Kambe lokhu akukwenzi yini ufise ukumazi njalo ubeseduze laye? Ukukhetha ukwenza lokhu kuzakunceda ngani? Sizaxoxa ngendaba le esihlokweni esilandelayo.